بەڕێوەبەری ناحیەی پیران: بەرنامە و پلانی باشمان هەیە بۆ زیاتر پێشكەشكردنی خزمەتگوزاری بە هاووڵاتییان

دیدار- مستەفا  دۆلەمەری

بەڕێوەبەری ناحیەی پیران لە سنووری قەزای مێرگەسۆر، لە دیدارێكی زاری كرمانجیدا، تیشك دەخاتە سەر كارو چالاكی و بەرنامەو پلانی داهاتوویان و كارو پڕۆژە خزمەتگوزارییەكانیان.

لە دەستپێكی قسەكانیدا، هەژار جەوهەر، بەڕێوەبەری ناحیەی پیران، دەڵێ:” ناحیەی پیران لە ڕووی ئیدارییەوە سەر بە قەزای مێرگەسۆرە، لە 53 گوند پێكدێت و بەشی زۆری گوندەكان ئاوەدانن، دانیشتووانی ئەم ناحیەیە بەشێكی زۆریان پێشمەرگە و فەرمانبەری حكوومین، ئەوانی دیكەش جوتیار و ئاژەڵدار و كاسبكارن”.

گووتیشی: ” لە ماوەی دەست بەكاربوونم وەك بەڕێوەبەری ناحیەی پیران، چەندین پڕۆژەی گرینگ ئەنجامدراون، وەك دوو بارە كاركردن لەسەر پڕۆژەی نەخۆشخانەی ٢٥ قەڵەوێرەیی شارۆچكەی پیران، كە ماوەیەكی زۆر كارەكانی راگیرابوون، بەڵام لە ئێستادا تەنها چەند كارێكی كەمی ماوە و لە ئایندەیەكی نزیكدا تەواو دەكرێت، نەخۆشخانەیەكی مۆدێرن و سەردەمیانە دروست دەكرێت و دەكەوێتە خزمەت هاووڵاتییان، بە تەواو بوونی خزمەتێكی زۆری دانیشتووانی پیران و دەورووبەری دەكات، كارێكی ترمان كە زۆر پێویست بوو بۆ خەڵكی ناوچەكە ئەویش قیڕتاو كردنی ڕێگەی سەرەكی پیران- مێرگەسۆر و راكێشانی تۆڕی ئاو بۆ شارۆچكەی پیران بوو، كە بەم هۆیە خەڵكێكی زۆر لەو پڕۆژەیە سوودمەند بوون، هەروەها دابینكردنی كارەبای وزەی خۆر بۆ گوندی ئینەمسید و بندەر، لە ئێستادا كارەبای ٢٤ كاتژمێریان هەیە و ئەوانەو چەندان پڕۆژەی دیكە ئەنجامدراون و بەردەوامیش دەبین”.

بەڕێوەبەری ناحیەی پیران،  ئاشكراشی كرد:” بۆ ئەمساڵ بەرنامەو پلانی باشمان هەیە، وەك دروستكردنی یاریگایەك بۆ گەنجەكانمان لە گوندی ئینەمسید، لە سنووری ناحیەی پیران و دروستكردنی  پردێك لە گوندی زەرگەتە و لە ئێستاشدا كاردەكەین لەسەر نۆژەنكردنەوەی بەشێكی ناحیەكەمان و چەندین پڕۆژەی گرینگ هەن كە ڕەزامەندیان لەسەر دراوە، بەڵام بەهۆی ئەو بارودۆخەی كە حكوومەتی عێراق بۆ هەرێمی كوردستانی دروستكردوە، كاریگەر بووە لەسەر كارو پڕۆژە خزمەتگوزارییەكانمان، بەتایبەتیش لە ڕووی گرفتی داراییەوە”.

دەشڵێت: “كاری زیاتر لەسەر وەبەرهێنان دەكەین بەهەماهەنگی كەرتی تایبەت، بۆ ڕەخساندنی هەلی كار بۆ گەنجان و خەڵكی سنوورەكەمان بەگشتی، ئەگەر بێت و چەند كارگەیەك دروست بكرێن، هاوشێوەی كارگەی زۆم لە سنووری قەزای مێرگەسۆر، هەروەها بایەخ بە دروستكردنی پارك و یاریگاو شوێنی وەرزشی دەدەین بۆ گەنجانمان، تا بتوانن كاتەكانیان تێدا ببەنە سەر”.

هەژار جەوهەر، ئاماژەی بەوەشدا :” لە رووی كشتوكاڵیەوە سنووری ئێمە ناوچەیەكی بە پیت و بەرەكەتە و چەندین سەرچاوەی ئاو هەن و ناحیەی پیران دەوڵەمەندە بە سامانی ئاوەوە، هەر جێگەیەك ئاوی هەبێت لە رووی كشتوكاڵیەوە بەرەوپێش چوونێكی زۆر بە خۆوە دەبینێت، بەڵام نەتواندراوە وەكو پێویست سوود لە بەروبوومەكان وەربگیرێت و بە بازاڕی بكرێت، بۆ ئەوەی سوود لە بەروبوومەكانی دەڤەرەكەمان وەربگیرێت پێویستە چەند كارگەیەك بكرێنەوە، بۆ ساغكردنەوەی بەربوومی هاووڵاتییان، بۆ نموونە پێش ئەوەی كارگەی زۆم لە قەزای مێرگەسۆر بكرێتەوە، خەڵكی ناوچەكە شیری ئاژەڵەكانیان بە شێوەیەكی جیاواز بەكار دەهێنا سودێكی وای نەبوو بۆیان، بەڵام لە ئێستادا بەهۆی هەبوونی كارگەی شیری زۆم لە هیچ ناوچەیەكی دەڤەری بارزان خاوەن ئاژەڵداڵەكان شیر بەفیرۆنادەن”.

بەڕێوەبەری ناحیەی پیران، گوتیشی:” مەلا مستەفا بارزانی، كارگەیەكی شیری لە دەڤەری بارزان دروستكرد بۆ ئەوەی دەرفەتی كار بۆ تاك بەتاكی سنووری قەزای مێرگەسۆر بڕەخسێنێت و خەڵك زیاتر گرینگی بە كاری ئاژەڵداری بدات و هاووڵاتییان بتوانن شیری ئاژەڵ و مانگاكانیان ساغ بكەنەوە و بیفرۆشن بەو كارگەیە، بۆ ئەم مەبەستەش چەند بنكەیەكی لە تەواوی ناحیەكانی قەزای مێرگەسۆر دانراون، راستەوخۆ شیر لە ئاژەڵداران دەكڕنەوە، ئەمەش بووەتە هاندەرێكی باش بۆ ئەوەی خەڵكی ناوچەكە ڕوو لە بەخێوكردنی ئاژەڵداری بكەن.