ڕاپۆرت- زاری كرمانجی
بەشێك لەو هاووڵاتییانەی زەوی سندوقیان هەیە تا ئێستا داواكاریان پێشكەش نەكردووە بۆ دروستكردنی خانووبەرە، هیوادارن وادەكە درێژبكرێتەوە و مامەڵەكانیان لێوەربگیرێت. بەڕێوەبەری گشتی شارەوانییەكانی سۆران، دەڵێت: كاتەكە تەواو بووە و داواكاری نوێی هاووڵاتییان لە ئێستادا وەرناگیرێت.
محەممەد عومەر، هاووڵاتییەكی سنووری ئیدارەی سەربەخۆی سۆرانە، بە زاری كرمانجی گووت: لە كابینەی نۆیەمی حكوومەتی هەرێمی كوردستان، لەلایەن مەسرور بارزانی سەرۆكی حكوومەتی هەرێمی كوردستان، چەند بڕیارێكی گرنگ دران، یەكێك لەوانەش ڕێگەپێدانی هاووڵاتییان بۆ دروستكردنی خانووبەرە، تایبەت بەوانەی زەوی سندوقیان هەیە، ئێمەش یەكێك بووین لەو كەسانەی لەو بڕیارە سوودمەند بووین و توانیمان بەپێی ڕێنماییەكانی وەزارەتی شارەوانی خانوو لەسەر زەوی سندوقی دروست بكەین”.
ئەو هاووڵاتییە ئاماژەی بەوەشدا: “هەروەك لەسەرەتاوە شارەوانییەكان وادەیەكیان دیاری كردبوو بۆ پێشكەشكردنی داواكاری هاووڵاتییان تایبەت بەوانەی كە زەوی سندوقیان هەیە، دواجار چەندین كەس داواكاریان پێشكەش كردوو و دوای گەڕانەوەی ناوەكانیان بەپێی تەواوكردنی مامەڵەكانیان و بەپێی ڕیزبەندی قۆناغ بە قۆناغ ناوەكانیان ڕاگەیەندرا، بەمەش خەڵكێكی زۆر لە بڕیارەكە سوودمەند بوون”.
ئەوەش دەخاتەڕوو: “ئەگەر لە ئێستادا وەرگرتنی مامەڵەی دروستكردنی خانوو لەسەر زەوی سندوقی ڕاگیرابێت، ئەوانەی گلەیی دەكەن زیاتر بۆ كەمتەرخەمی خۆیان دەگەڕێتەوە، چونكە درەفەتێكی زۆریان لەبەردەم بوو بۆ پێشكەش كردنی داواكارییەكانیان”.
جێگر سلێمان، هاووڵاتییەكی دیكەی سنووری ئیدارەی سۆرانە، لە ڕێگەی زاری كرمانجیەوە داواكاربوو لە شارەوانی و لایەنی پەیوەندیدار جارێكی دیكە وادەی وەرگرتنی مامەڵەی دروستكردنی خانوو لەسەر زەوی سندوقی درێژ بكرێتەوە، چونكە كاریگەری زۆری هەبووە لەسەر چارەسەر كردن و كەمكردنەوەی كێشەی نیشتەجێبوون، هەروەها جوولەیەكی دروست كردبوو لەسەر ڕەخساندنی هەلی كار بۆ پێشەوەر و كرێكاران”.
ئەوەش دەخاتەڕوو: “ڕاستە شارەوانییەكان وادەیەكیان دیاری كردبوو بۆ وەرگرتنی مامەڵەی دروستكردنی خانوو لەسەر زەوی سندوقی، بەڵام لەوانەیە لەو ماوەیەدا كەسانێك توانای كڕینی زەوی سندوقیان نەبووبێت، یان تازە هاوسەرگیریان كردبێت و بە هەر شێوەیەك لە شێوەكان پارچە زەوییەكی سندوقیان كڕی بێت و بیانەوێت خانووییەكی لەسەر دروست بكەن، هیوادارین ئەو لایەنە بە هەند وەربگیرێت و وەرگرتنی مامەڵەی ئەو كەسانەی خانوو لەسەر زەوی سندوقی دروست دەكەن بەردەوام هەبێت.
لای خۆیەوە خەسرەو ئیسماعیل، بەڕێوەبەری گشتی شارەوانییەكانی ئیدارەی سۆران، بە زاری كرمانجی راگەیاند” لە ئێستادا ئەو كاتە تەواو بووە بۆ وەرگرتنی داواكاری نوێ بۆ ماڵەی زەوی سندوقی، ئەنجوومەنی وەزیران كاتێكی دیاریكراوی دیار كردبوو بۆ ئەو بابەتە ئەوكاتەش بە كۆتا هات و ئەوانەی داواكاریان پێشكەش كردووە مامەڵەیان بۆ دەكرێت، بەڵام گەر كەسێك ئێستا داواكاری پێشكەش بكات وەرناگیرێت.
بەپێی زانیارییەكان، لەو ماوەیەدا زۆرترین داواكاری بۆ زەوی سندوقی لە سنووری شارەوانی سۆران و بەشێكی رواندز بوو، زۆرێك لەوانەی داواكاریان پێشكەش كردبوو بەپێی ڕێنماییەكانی شارەوانی مامەڵەیان بۆ كراوە و كارەكانیان ڕای كراو كێشەیان نەبووە.
