زاری كرمانجی-سۆران
بەڕێوەبەری كۆچ و كۆچبەران و ڕووبەڕووبوونەوەی قەیرانەكان لە ئیدارەی سۆران، دەڵێت: “لەگەڵ دروستبوونی شەڕی نێوان ئێران و ئیسڕائیل، پلان و بەرنامەی حكوومەتی هەرێمی كوردستان بەردەوام بووە، بۆ گەڕاندنەوەی هاووڵاتییانی هەرێمی كوردستان لەم وڵاتە.
عەباس ئەمیر بەڕێوەبەری كۆچ و كۆچبەران و ڕووبەڕووبوونەوەی قەیرانەكان لە ئیدارەی سۆران، بە زاری كرمانجی ڕاگەیاند: “دوای شەڕی نێوان ئێران و ئیسڕائیل و دروستبوونی ئاڵۆزییەكان، هەزاران كەس لە هەرێمی كوردستان بەمەبەستی گەشتیاری و خوێندن و كاری بازرگانی و سەردانی كردنی خزم و كەسەكانیان لە وڵاتی ئێران بوون و ویستی بە پەلەیان هەبوو بۆ گەڕانەوەیان، وەك ناوەندی هاوبەشی قەیرانەكان و پەیوەندیەكانی دەرەوەی هەرێمی كوردستان، زۆر بەخێرای هاتنە سەر خەت و تیمێكی هاوبەش لە دام و دەزگا پەیوەندیدارەكان پێكهێنرا، بۆ ئەوەی بە سەڵامەتی ئەو هاووڵاتییانەی هەرێمی كوردستان لە وڵاتی ئێرانن بگەڕێندرێنەوە، لەگەڵ ئەوەی هەندێكیان بەربەستیان بۆ دروست ببوو، بەڵام حكوومەتی هەرێمی كوردستان چەندین پلانی دانا بۆ گەڕانەوەیان و ئاسانكاری بەردەوامیان بۆ كرا”.
بەڕێوەبەری كۆچ و كۆچبەران و ڕووبەڕووبوونەوەی قەیرانەكان لە ئیدارەی سۆران، ئاشكراشی دەكات: “بەشێك لەو هاووڵاتییانەی هەرێمی كوردستان، كە بە فڕۆكە گەشتیان كردبوو هەوڵی ئەوەیان بۆ درا لە ڕێگای وشكانی بگەڕێنەوە، هەروەها دابین كردنی ئەمبوڵانس و ئۆتۆمبێلی فریاكەوتن بۆ ئەو كەسانەی بۆ نەخۆشی ڕوویان لە وڵاتی ئێران كردبوو، خۆشبەختانە پلان و بەرنامەكان سەركەوتوو بوونەو هەر زوو توانرا بەشی زۆری ئەو هاووڵاتییانە بەسەلامەتی بەگەڕێندرێنەوەو هەوڵەكانیش بەردەوام بوونە بۆ گەڕاندنەوەی سەرجەمیان.
