دیمانە – زاری كرمانجی:
لە گۆڕەپانی وەرزشی شاری سۆران چەندین ئافرەتی بوێر و لێهاتوو هەن كە لەم سێكتەرە خزمەت بە ئافرەتان دەكەن و هەمیشە مرۆڤی سوودبەخش بوونە بۆ كۆمەڵگە.
ڤانا ڕەشید، دەرچووی سكوڵی وەرزشی زانكۆی سۆران و ڕاهێنەری وەرزشی بە زاری كرمانجی ڕاگەیاند: كاتێك باسی وەرزش دەكەین لە كوردستان بە دڵنیاییەوە پێشكەوتنی بەرچاوی بەخۆیەوە بینیووە و یارییە وەرزشییەكان لە نێو یاریزانان پەرەیان سەندووە، بێگومان وەرزش بە گشتی لەچاو ساڵانی ڕابردوودا زۆر جیاواز دەردەكەوێت بەهۆی گەشەی ئاستی پێشكەوتنی كۆمەڵگە و پاڵپشتی كردنی وەرزش لەلایەن وەرزش دۆستان بە تایبەت لە ئافرەتاندا كە دەكرێت بلێین بە خۆشحاڵییەوە زۆر لە كچەكانمان ڕوویان كردۆتە وەرزش كردن، كچەكان لە زۆربەی یارییەكان و خول و پاڵەوانیەتییە وەرزشییەكان بەشداری كارایان هەیە و بەشێكیان چەندەها مەدالیا و پاڵەوانیەتییان بەدەستهێناوە لە ئاستی كوردستان و عێراقدا، لەگەڵ ئەوەشدا بۆ بەشێك لە ئافرەتانمان ئاستەنگ دروست دەكرێت لە بەردەمیان بەداخەوە بەهۆی تێگەیشتنی هەڵە لە وەرزشدا لەلایەن خێزان و چینێكی كۆمەڵگە كە ناتوانن بەهرە و خولیاكانیان لە وەرزشدا گەشە پێبدەن بە شێوەیەكی ئەكتیڤ بێنە نێو وەرزش و گرنگی بە لەش و تەندروستی خۆیان بدەن.
بە خۆشحاڵی زۆرەوە بە شێوەیەكی گشتی لە ئێستادا ئافرەتان ڕوو لە وەرزش دەكەن و حەزوو ئارەزویان بۆ وەرزش زیادی كردووە و وەرزش دەكەن بۆ ژیانێكی باشتر بۆ تەندروستیەكی چاكتر و بۆ پێگەیاندن و پەروەردەكردنی نەوەیەكی تەندروست، ئێستا ژمارەیەكی زۆر ئافرەتانی كورد لە هۆڵە وەرزشییەكان بوون بە ڕاهێنەری ئاست بەرز بێگومان ئەمە شانازییەكی گەورەیە كە ئافرەت ڕۆلێكی بەر چاوی گێراوە لە وەرزش، ئیتر داواكارم چیدی ڕێگری لە بەرەوپێشچوونی ئافرەت نەكرێت كاتێك حەزو خولیای وەرزشی هەبوو، و پێویستە شانازی بەو ئافرەتانە بكرێت كە بواری وەرزشی هەڵبژاردووە جا هەر جۆرە یارییەك بیت گرنگ ئەوەیە كە خۆی تیادا دەبینێتەوە و گرنگی بە خۆی بدات.
هیوادارم حكومەت و لایەنی پەیوەندیدار زیاتر گرنگی بە وەرزشی بدەن و پاڵپشتی یاریزانەكان بكەن بە تایبەت ئافرەتان، و هەوڵ بدرێت زیاتر چالاكی وەرزشی جۆراوجۆر ڕێكبخرێت و وەرزشی نێو قوتابخانە و زانكۆ و پەیمانگەكان بایەخی پێبدرێت، جونكە وەرزش یەكێكە لە بابەتە گرنگەكان بۆ ناساندنی ولاتەكەمان زیاتر لە جیهان،بێگومان ئافرەتی كورد بە ئازایەتی و بەهێزی و بوێری ناسراوە و ڕۆشەنبیر و وەرزش دۆستن، بۆیە من هەمیشە شانازی بە ئافرەتانی كوردستانەوە دەكەم.
