موڕشید برادۆستی – زاری كرمانجی :
لە سنووری ئیدارەی سەربەخۆی سۆران، ڕێژەیەكی زۆری هەنگ بەخێودەكرێن و كاسبكارێكی زۆر بەو كارەوە سەرقاڵن و بەرهەمی ساڵانەیان چەندان تۆنە.
بۆ ئەمساڵ، چوونیان بۆ كوێستانەكان لە ژێر چاودێری قائیمقامیەتەكانەوە دەبێت و تۆڕی هەنگەوانانی كوردستانیش دژی كارێكی ژمارەیەك هەنگەوان دەوەستێتەوە، لە نوسراوێكی فەرمیداپێدانی شەكر بەهەنگ لە كوێستانەكان بەهەموو شێوەیەك قەدەغە دەكات و داواش دەكەن لایەنە پەیوەندی دارەكانی حكوومەت هاوكار و هەماهەنگیان بێت.
عارف شێروانی سەرۆكی تۆڕی هەنگەوانانی كوردستان، لە لێدوانێكی تایبەتدا بە زاری كرمانجی گووت:” خەڵكانێك لە كوێستانەكان وەك پیشەی هەمیشەییان شەكر بەهەنگەكانیان دەدەن، كە ئەمەش هەنگوینەكەی دەبێتە ساختە، لەهەمان كاتیشكاریگەری نەرێنی لەسەر هەنگی دراوسێكەشی دروست دەكات، چونكە ئەو هەنگەی شەكری پێدەدرێت تێر دەبێت، ئەو هەنگەی شەكریشی پێنادرێت بۆ پەیداكردنی خواردن بەردەوام دەگەڕێت بەهەمان شێوە ئەوشەكرە دەبات و هەنگوینی سروشتیەكەش دەبێتە شەكر”.
سەرۆكی تۆڕی هەنگەوانانی كوردستان، دەڵێت:” دژی پێدانی شەكر بەو هەنگانەی لە كوێستانەكانن، نوسراوی فەرمیمیان بۆ ئیدارەی سەربەخۆی سۆران و بەڕێوەبەرایەتی گشتی ئاسایش و بەڕێوەبەرایەتی گشتی كشتوكاڵ و لیژنەی كشتوكاڵی ئەنجوومەنی وەزیران و دەزگا پەیوەندی دارەكانی دەڤەرەكە كردووە و داوامان كردووە ڕێگری لەو دیاردەیە بكرێت و لە بازگەكانیش ڕێگە بە چوونی شەكر بۆ كوێستانەكان نەدرێت”.
عارف شێروانی، ئەوەشی خستەڕوو، بەهەموو شێوەیەك پێدانی شەكر بە هەنگ لە كوێستانەكان قەدەغە دەبێت، چونكە ئەو سامانە نەتەوەیە چەندین ساڵە هەوڵ و كۆششی بۆ دەدەین توانیومانە هەنگوینی كوردستان بە جیهان بناسێنین و هەوڵی ئەوەی بۆ بدەین خواستێكی زۆری لەسەر بێت، لە هەمان كات پار ساڵ مەسرور بارزانی سەرۆكی حكوومەتی هەرێمی كوردستان پرۆسەی هەناردەكردنی هەنگوینی كوردستانی بۆ كەنداو و وڵاتانی دەرەوە دەستپێكرد ئەمەش كارێكی گرنگ بوو سودی زۆری بۆ كاسبكاران هەیە، هەروەها هەنگوینی كوردستان بۆ چەندەمین جار پلەی یەكەمی لەسەر لە ئاستی جیهان بەدەستهێناوە”.
دووپاتی كردەوە، ئەو هەنگەوانانەی كەشەكر بە هەنگەكانیان دەدەن پێویست ناكات هەنگەكانیان ببەنە كوێستانەكان، لەبەردەم ماڵی خۆشیان شەكریان پێبدەن هیچ لە دۆخەكە ناگۆڕێت، بەڵام لە كوێستانەكان ئێمە ڕێگری لەو دیاردەیە دەكەین و بەهەوڵی حكوومەت و لایەنە پەیوەندی دارەكان ئەو دیاردەیە ناهێڵێن. هەروەها ئەو هەنگەوانانەی لە كوێستانەكان شەكر بە هەنگەكانیان دەدەن فێڵ دەكەن و سەرەڕای پێدانی شەكر هەنگوینەكەیان بە بێ شەكر دەفرۆشن و بە ناوی هەنگوینی كوێستانەكانیش لە پێشانگە و بازاڕ و شوێنە گشتیەكان نمایشی دەكەن”.
عارف شێروانی نایشارێتەوە، هۆكاری سەرەكی لەناوچوونی ئەو هەموو هەنگە لە كوردستان ئەو ژمارە هەنگەوانەن كە شەكر بە هەنگەكانیان دەدەن، دەشڵێت:” بە هەماهەنگی حكوومەت و لایەنە پەیوەندی دارەكان ئەو دیاردەیە لە كوردستان قەدەغە دەكەین كە داوجار زیانی زۆری هەیە”.
