میلشیاكان عێراق تاڵان دەكەن بۆ شاردنەوەی پەلاماری هەرێم دەدەن

ئیسماعیل ئیبراهیم

وەزارەتی نەوتی حكومەتی فاشیل و داگیركەری عێراق بەیاننامەیەكی بڵاو كردۆتەوە و لە دەستپێكی نووسراوەكە تا كۆتایی تۆمەتبار كردنی حكومەتی هەرێمی كوردستانە بە پێشێل كردنی دەستوور و كۆمەڵێك دەستەواژەی پێكەنیناوی بەكار هێناوە .
لەسەرەتای راگەێندراوەكە نووسیویانە” پێویستە حکومەتی هەرێمی کوردستان پابەند بێت بە دەستوور و بڕیارەکانی دادگای فیدراڵی و یاسا کارپێکراوەکان”، ئەم رستەیە سەد لە سەد من لەگەڵی دامە بە مەرجێك كە حكومەتی عێراق و هێزە چەكدارە بە كرێگیراو و لایەنە سیاسییە بەوەكاڵەتەكانیش كە بڕیاردەری راستەقینە و سەرەكی عێراقن بڕگەكانی دەستوور و یاساكان وەك خۆی جێبەجێ بكەن ئەو كات ئەگەر هەرێمی كوردستان پێوە پابەند نەبوو با سكاڵا بكەن، بەڵام عێراقێك 57 ماددەی دەستووری لە ئاست هەرێمی كوردستان پێشێل بكات و ئێستاش لەشكركێشی بۆ سەر گوندە كوردنیشنەكان بكات، قووتی خەڵك بە بیانووی جیا بە ئاراستەی سیاسی داببات و غەدر لە دانیشتووانی هەرێمی كوردستان بكات، بە هەمان بیرۆكەی بەعس مامەڵە لەگەڵ كوردستان بكات، مافی ئەوەی نییە بەمجۆرە زۆر رەوی بكات.
لە بەیاننامەكەدا هاتووە ” یاسای بودجەی گشتی حکومەتی هەرێم پابەند دەکات بە ڕادەستکردنی نەوتی بەرهەمهێنراو لە کێڵگەکانییەوە بە وەزارەتی نەوتی فیدراڵی” هەر كاتێ حكومەتی شۆفێنزیمی بەغدا رێگەیدا نەوتی كوردستان هەناردە بكرێتەوە، ئەو كات با ئیلتیزامات بخاتەسەر حكومەتی هەرێمی كوردستان، بە پێچەوانە پێموایە حكومەتی هەرێم بۆ زیاتر ئاوەدان كردنەوەی كوردستان و دەستكەوتنی زیاتری داهات مافی خۆیەتی هەر جۆرە رێكارێك بگرێتەبەر، نەوت لەسەر خاكی كوردستانە و مافی خەڵكی كوردستانە، داگیركەرێكی خوێن رێژ هیچ مافی بەسەر نەوتی كوردستانەوە نییە، رۆژێكیش دادێ باجی ئەم زوڵمەی لە كوردستانیان دەكەن دەدەنەوە.

ئەگەر لە عێراقی بەكرێگیراوی ئێران و هزری توندڕەوی دژی كورد، هەموو یاساكان وەك خۆی و بێ جیاوازی جێبەجێ كران و مافی هاووڵاتییەكی هەرێمی كوردستان وەك تاكەكانی شارەكانی خوارووی ئەم وڵاتە وێرانە بوون و حیسابی پلە 5 و شەشیان بۆ نەكرا ئەو كات هەرێمی كوردستان بەخۆی یاساكان جێبەجی دەكات، بەڵام تۆ بتەوێت بۆ لاوازكردن و دەستەمۆ كردنی هەرێمی كوردستان بە مەبەستی سیاسی یاسای داپلۆسێنەر بەسەر كوردستان بسەپێنی ئەگەر حكومەتی هەرێم بچیتە ژێر باری ئەوە خیانەتە لە خوێنی شەهیدان و ئەنفالكراوان.

لە بەشێكی دیكەی راگەیەندراوەكە نووسراوە” ڕادەستنەکردنی نەوت زیانێکی دارایی بەرچاو بە عێراق دەگەیەنێت و ناوبانگی نێودەوڵەتی عێراق و بەڵێنەکانی نەوتی دەخاتە مەترسییەوە”. جارێ حكومەتی عێراق لە ئاستی نێودەوڵەتییەوە شتێكی نییە بە ناوی ناوبانگ و شكۆوە، ئەگەر وەزارەتی بە سیاسی كراوی نەوتی عێراق توانی رێگە لە بە قاچاخ بردنی نەوتی عێراق لە شارەكانی خوارووی عێراق بگرێت كە رۆژانە ملیۆنان بەرمیل نەوت دەچێتە ئێران و وڵاتانی دیكە با لە ئاستی نەوتی هەرێمی كوردستانیش شیری تیژ بێت.
وەزارەتی نەوتی عێراقی داگیركەر ئەوەندە بە زەقی باسی زیانەكانی خەزێنەی گشتی دەكات وەك بلێی كەس ئاگادار نییە چ تاڵانییەك لەسەر خەزینەی گشتی عێراق هەیە، هەر لە مووچەی هێزەكانی حشدی ناشەعبی ئیرانییەوە بگرە تا بەفیرۆ دان و دزینی سەروەت و سامانی ئەم وڵاتە و بردنیان بۆ ئیران، كەلابییەك هەزار كارتی مووچەی بن دیوار لە حەشدی شەعبی هەبێت هەبێ كە مانگانە دەگاتە سەرووی ملیار و نیوێك دینار، دەبێ هەزاران كەلابی دیكە چەند پارەی ئەم وڵاتە بدزن، جارێ بڕۆن ئەمانە چارەسەر بكەن، ئەو جا لە ئاست كوردستان زمان درێژی بكەن.
ئەم نووسینەی من مانای ئەوە نییە قسەم لەسەر بابەتی نەوت و داهاتی هەرێمی كوردستان نەبێت، بەڵام لە پەنای ئەمەشەوە ئاوەدانییەكانی كوردستان دەبینم، سەڕەرای ئەو گەمارۆ نائەخلاقی و نامرۆڤانەی حكومەتی عەرەبی عێراقی داگیركەر خستوویەتییە سەر كوردستان.
هیوادارم حكومەتی هەرێمی كوردستان شەفافییەت لە هەموو بوارەكانەوە پەیرەو بكات، بە هیچ شێوەیەكیش نەوت و داهات رادەستی داگیركەرانی كوردستان نەكات.