“خەڵکی کوردستان لەو پەری نائومێدیەوە چەژنی قوربانی پیرۆز دەکاتەوە”
مستەفا دۆلەمەری- زاری کرمانجی:
مەلا وەیسی سەعید، ئەندامی خولی پێنجەمی پەرلەمانی کوردستان، باس لەو ناکۆکیانەی بەغدا دەکات بەرامبەر بە کوردستان و دەڵێت:” دوای 35 ساڵی رووخانی رژێمی بەعس هێشتا خەڵکی کوردستان هەست دەکات هەمان ئەو بیرکردنەوە لە ئاست كوردستان هەرماوە، ئەمەش بە دژایەتیکردنی خەڵکی کوردستان، لە رابردوودا خەڵک ئەنفاڵ و کیمیاباران کرا، ئێستاش بە شێوازێکی تر دیمەنی ئەنفاڵ و کیمیاباران دەبینینەوە، بە بڕینی بووجەو مووچەی خەڵک، کارەساتێکی زۆر گەوەرەیە بە تایبەتی لەو مانگەدا کە هەموو خەڵکی بە دڵێکی خۆشەوە جەژن دەکاتەوە، بەڵام خەڵکی کوردستان لەو پەڕی نائومێدییەوە چەژنی قوربانی پیرۆز دەکاتەوە”.
پەرلەمانتاری پێشووی پارتی، لە پەرلەمانی کوردستان، دەشڵێت:” نە دەکرا لە ژێر هیچ یاسا و بیانویەک، مووچەی فەرمانبەرانی هەرێمی کورستان بۆ هەشت مانگی داهاتوو ڕابگیرێت و ئەمەش بڕیارێکی سیاسییە، دەیانەوێت بە هەر جۆرێک بێت گەمارۆ بخانە سەر هەرێمی کوردستان، ئەو بڕیارەی ئێستا لە ئەنجوومەنی وەزیرانی حکومەتی عێراق دەرچووە، بە ئاشکرا سزادانی بە کۆمەڵی سەرجەم هاووڵاتییانی هەرێمە، خەڵکی کوردستانیش هیچ کات دەستبەردای مافە دەستوورییەکانی خۆی نابێت و دەبێت حکومەتی عێراق ڕێز لە مافەکانیان بگرێت.
وەیسی سەعید، ئاماژەی بە وەشدا:” هەموومان دەبێت ئەوەمان لە بەرچاو بێت لە رابردوودا حکومەتی هەرێمی کوردستان ، ئامادە بووە هەموو داواکارییەکانی حکوومەتی مەرکەزی جێبەجێ بکات، ئێستاش پێویستە حکومەتی هەرێم وەک چۆن لە رابردوودا ئامادە نەبوو گفتووگۆ لەسەر مافەکانی خەڵکی کوردستان بکات و لەمەو بەدواش لەسەر هەمان شێوە بەردەوام بێت، چونکە سەرۆکی حکومەتی هەرێمی کوردستان، بە هەموو شێوەیەک داکۆکی لە مافەکانی خەڵکی کردووە و ئەمانجی سەرەکیشی ئەوەبووە کە خزمەتی خەڵکی کوردستان بکات.
لە کۆتایی قسەکانیدا ، وەیسی سەعید، گووتی:” بە دڵنیاییەوە بەرنامەو رێکار هەیە کۆمەڵگەی نێودەوڵەتی لەو زوڵمە گەورەیە ئاگەدار بکەنەوە کە بەرامبەر خەڵکی هەرێمی کوردستان دەکات و ئەرکی هەموو هاووڵاتییەک و هەموو لایەنە سیاسییەکانە، بەبێ جیاوازی پشتیوانی هەنگاوەکانی حکومەتی هەرێم بکەن.
