موڕشید برادۆستی – زاری كرمانجی :
لە دیمانەیەكی زاری كرمانجیدا، د . زێدان برادۆستی پەرلەمانتاری پێشووی پارتی لە پەرلەمانی كوردستان، باس لەو ناكۆكیانەی بەغدا دەكات بەرامبەر بە كوردستان و ڕایدەگەیێنێت، ئەوەی عێراق بەرامبەر بە فەرمانبەران و خەڵكی كوردستان دەیكات تەنها بڕیارێكی سیاسییە و دەیانەوێ لە ڕێگەی دژایەتی كردنی كورد دەنگی شەقامی عێراقی بەدەستبێنن، دەشڵێت:” ئەگەر وەزیری دارایی عێراق راست دەكات، با پێداچوونەوەیەك بە لیستی مووچەخۆرانی بەغدا و حەشدی شەعبیدا بكات، بزانێ چ جۆرە گەندەڵیەك و بەفیڕۆدانی داهاتی گشتی هەیە، نەك بێت مووچەی فەرمانبەرانی هەرێمێك ببڕی.
د . زێدان برادۆستی، دووپاتی لەوەكردەوە، هەرێمی كوردستان كار بەیاسایی فیدڕاڵی دەكات لە بڕیاردان و مامەڵەكردنی بواری وزە و بازرگانی و نەوت و گاز، ئەمەش نیگەرانی بۆ شیعە و حكوومەتی عێراق بە گشتی دروست كردووە، بۆیە ئەم پێشكەوتنەی كوردستان لە بواری ڕێكەوتنە ئابوورییەكان نیگەرانی ئەوانی لێ كەوتۆتەوە و كێشە دروست دەكەن و ددان بە مافی كورد دانانێن، لە دوای دروست بوونی ئەو كێشەی نەناردنی مووچە بەشی زۆری چاودێرە عەرەبەكان كە باس لە هەرێمی كوردستان دەكەن دەڵێن، ئەو فیدڕاڵیەی كە ئەمریكا بۆ كوردی داناوە، ئەوەیان لا قبووڵ نییە كە دەستووری عێراقی و گەلی عێراق ئەو مافەی بە كورد داوە.
ئەو پەرلەمانتارەی پێشووی پارتی، ئەوەشی خستەڕوو، هەرێمی كوردستان كە نەتوانێ نەوتی خۆی بفرۆشێت و داهاتێكی زۆری نانەوتی نەبێت، بەغدا چی لە هەرێمی كوردستان دەوێ، ئەوەی هەیە تەنها داهاتێكی كەمی ناوخۆیە ئەمەش ڕێكەوتنی لەسەر كراوە و بەپێی ئەو داهاتەی كە هەیە مانگانە 50%ـی بۆ بەغدا ڕەوانە دەكرێت، جیا لەمە هیچ پابەندییەكی دیكەی ڕاستەوخۆ نییە كە هەرێمی كوردستان بەرامبەر بەغدا بیكات، دەشڵێت:” ئەگەر هەرێم نەوتی خۆی فرۆشتبا و داهاتی نەوت نادیار با ئەوكات دەتوانرا بڵێن، كێشەكە لەسەر نەوت و داهاتە بەڵام ئێستا بەهۆكار و بڕیاری سیاسی گرفت لەبەردەم ڕەوانەكردنی مووچە و شایستە داراییەكانی كوردستان دروست دەكەن.
ئاشكراشی دەكات:” لەپێش ساڵی 2023، هەرێمی كوردستان نەوتی خۆی دەفرۆشت، دەیتوانی مووچەی فەرمانبەران دابین بكات، بۆیە ئەوكاتیش نیگەرانییەكی زۆر بوو بۆ عێراق كە خاوەنی ئابووری سەربەخۆ و فرۆشتنی نەوت بووین، بۆیە لە ڕێگەی شۆفینیەكان سكاڵا لە دادگای باڵایی فەرەنسا و وڵاتانی دیكە لەسەر هەرێمی كوردستان تۆماركرا كە ڕێگری بكەن لە فرۆشتنی نەوتی كوردستان لە ڕێگەی توركیاوە، بۆیە ئەمەش بڕیار و داواكاریەكی سیاسی بوو، خۆئەگەر نەوتی كوردستان لە ڕێگەی ئێرانەوە هەناردەكرابا شۆفینیەكانی عێراق هیچ گرفتیان نەدەبوو”.
تا ئەو شێوازە حكوومڕانییەی لە عێراق هەیە ناتوانین هیچ كاتێك گرێنتی ئەوە بكەین كە بەبێ گرفت لەگەڵ بەغدا مامەڵە بكەین، چونكە مووچە كە مافێكی سەرەتایی خەڵك و فەرمانبەرانی كوردستانە لەدەست لایەنێكی مەزهەبیدابێت بەردەوام گرفت دروست دەكرێت، لە هەمان كات عێراق بەگشتی لەژێر هیلالی شیعەدایە جگە لە هەرێمی كوردستان كە ئەمەش بەدڵی ئەوان نییە و هۆكارە بۆ دروست بوونی گرفت و كێشەی بەردەوام . زێدان برادۆستی وای گووت”.
ئەو پەرلەمانتاری پێشووی پارتی لە پەرلەمانی كوردستان، جەخت لەوەدەكاتەوە، پێویستە سەركردایەتی كورد و حكوومەتی هەرێمی كوردستان بیر لە ڕێگە چارەیەكی دروست بكاتەوە كە چیتر بەغدا بە ئارەزووی خۆی گرفت لەبەردەم هەرێمی كوردستان دروست نەكات و یاری بەهەستی دانیشتوانی كوردستان نەكات، نزیك بوونەوە لە هەڵبژاردنەكانی پەرلەمانی عێراق، لاینە شیعییەكان بۆ ڕاكێشانی دەنگی شەقام دژایەتیەكی ڕاستەوخۆی و توندتری هەرێمی كوردستان دەكەن بە ئامانجی كۆكردنەوەی دەنگ لە ڕێگەی دژایەتی كورد، پێویستە ئەو گرفتە بە یاسا و ڕێكەوتن و بە ئاگاداری لایەنە دەرەكییەكانی وەك ئەمریكا و وڵاتانی دیكە چارەسەر بكرێت و چیتر دووبارە نەبێتەوە، لەهەمان كات یەكگرتنی لایەنە سیاسیەكان و كۆدەنگیەكی بەهێزی نێو ماڵی كورد وادەكات بەهێزتر لە عێراق دەربكەوین و حساب بۆكراوبین”.
د. زێدان برادۆستی ئەندامی خوولی پێشووی پەرلەمانی كوردستان، گووتیشی:” دەسەڵاتدارانی بەغدا نوقمی گەندەڵی بوون، بە چ روویەكەوە باسی داهاتی هەرێمی كوردستان دەكەن، بەرپرسانی بەغدا دەیانەوێت گەندەڵییەكانیان بە بیانووهێنانەوە بە هەرێمی كوردستان بشارنەوە، ئەگەر وەزیری دارایی عێراق راست دەكات، با پێداچوونەوەیەك بە لیستی مووچەخۆرانی بەغدا و حەشدی شەعبیدا بكات، بزانێ سەدان هەزاری بندیوار لەدەرەوەی عێراق بە ناوی مووچەخۆری عێراق تۆمار كراون، بۆیە تاكە بیانوویان مووچەی خەڵكی كوردستانە كە رۆژگارێك ئەو كوردستان شوێن پەناگەیان بووە”.
