کۆشکی سپی هۆشداریی دایە ئێران کە ئەگەر ئەو پێشنیازە قبوڵ نەکات کە لە لایەن نێردەی تایبەتی ئەمریکا بۆ ڕۆژهەڵاتی ناوەڕاست پێشکەش کراوە، دەبێ چاوەڕوانی “دەرئەنجامی جددی” بکات. بەگوێرەی بەیاننامە فەرمییەکە، ستیڤن ویتتاکەر پلانێکی تۆکمەی بۆ تاران ناردووە بۆ گەیشتن بە ڕێککەوتنی ئەتۆمی و ئێستا نۆرەی ئێرانە بڕیار بدات.
لە هەمان کاتدا ڕۆژنامەی نیویۆرک تایمز بە پشت بەستن بە سەرچاوە ئێرانی و ئەوروپیەکان بڵاوی كردەوە کە حکومەتی ئەمریکا بە سەرۆکایەتی دۆناڵد ترەمپ ئۆفەرێکی کاتی پێشکەش بە ئێران کردووە؛ پێشنیارێک کە ڕێگە بە تاران دەدات بەردەوام بێت لە پیتاندنی یۆرانیۆمی سنووردار بۆ ئەوەی ڕێگا خۆش بکات بۆ ڕێککەوتنێکی وردتر لەگەڵ زلهێزەکانی جیهان.
لە لایەکی دیکەوە چەندین سەرچاوەی ئاگادار لە بەرپرسانی پێشوو، دیپلۆماتکاران و شرۆڤەکاران پێیان وایە سەرکەوتنی هەر ڕێککەوتنێکی نوێ پەیوەستە بە چارەسەرکردنی ئەو نادڵنیاییانەی کە ئاژانسی نێودەوڵەتی وزەی ئەتۆمی سەبارەت بە بەرنامە ئەتۆمییەکەی ئێران وروژاندووە. بە تایبەتی ژمارەی وردی سەنتەرفیوژەکان، کە لە کوێ دروست دەکرێن و پارێزگارییان لێدەکرێت، و نەبوونی ئەگەری پشکنینی دەستێوەردانانە لە هەندێک شوێنی ڕانەگەیەندراودا، هێشتا جێگەی گومانە.
