دیمانە – زاری كرمانجی:
یاری هونەری جەنگی تایكواندۆ لە كوردستان پێشكەوتنێكی بەرچاوی بەدەست هێناوە لە دوو دەیەی ڕابردوودا، ئەم وەرزشە كۆریە لە ساڵانی ١٩٩٠ـەكانەوە دەستی كرد بە بڵاوبوونەوە لە ناوچەكە و بوو بە یەكێك لە وەرزشە ناسراوەكان لە هەرێمی كوردستان.
فیدراسیۆنی تایكواندۆی كوردستان چەندین ساڵە چالاكی و پێشبڕكێی جۆراوجۆر ڕێكدەخات، زۆرێك لە گەنجان و منداڵانی كورد ڕوویان لەم وەرزشە كردووە، لە شارەكانی هەولێر، سلێمانی و دهۆك چەندین هۆڵ و ناوەندی ڕاهێنانی تایبەت بە یاری تایكواندۆ كراونەتەوە.
وەرزشوانانی كورد لە چەندین پێشبڕكێی نێودەوڵەتی و ناوچەییدا بەشداریان كردووە و مەدالیای جۆراوجۆریان بەدەست هێناوە، هەروەها تایكواندۆ بەهۆی فەلسەفەی دیسپلین و ڕێزی تایبەتی، كاریگەری ئەرێنی لەسەر كەسایەتی وەرزشوانان داناوە و دروست دەكات.
لە سنووری ئیدارەی سۆران دەتوانین بڵێن ژمارەیەكی زۆر لە كوڕ و كچی لاوی ئەم دەڤەرە حەز بەم یارییە دەكەن و ڕۆژانە بەردەوامن لە ڕاهێنان و توانیویانە لە ئاستی كوردستان و عێڕاق و تەنانەت جیهانیش ئەنجامی نایاب بەدەست بهێنن.
كاپتن هۆشەنگ محەمەد خانۆ، هەڵگری بڕوانامەی ماستەر لە یاری تایكواندۆ لە وڵاتی كۆریا بەدەستیهێناوە، ڕاهێنەری ئەم یاریەیە لە یەكێ لە هۆڵەكانی شاری سۆران بە زاری كرمانجی ڕاگەیاند: یاری تایكواندۆ یەكێكە لە وەرزشە هونەرە جەنگییەكان، لە یارییە وەرزشییەكانی نێو ئۆلەمپیك دا جێگای خۆی كردۆتەوە، كە یارییەكانی هەر چوارساڵ جارێك لە جیهان بەرێوەدەچێت.
هۆشەنگ گوتی، یاری تایكواندۆ لە كوردستان بەگشتی وە لە ئیدارەی سەربەخۆی سۆران بەتایبەتی ڕووبەڕووی چەندین كێشە و ئاستەنگ بووتەوە چ لەڕووی ماددی یاخود لە ڕووی مەعنەوییەوە، بەشێكی زۆری یانە و یاریزانەكانی ئەم یارییە گرفتی نەبوونی هۆڵێكی ستاندارد و بەدەست كەمی پێداویستی وەرزشی ئەم یارییەوە دەناڵێنن، و ئەگەر بە گشتی سەیر بكەی لە سنووری ئیدارەی سۆران یاریزانەكانی ئەم یارییە شوێنی گونجاویان نیە و لە وەرزەكانی زستان و هاوین كێشەی زۆریان ڕووبەڕوو دەبێتەوە، بۆیە یاریزانەكان ناتوانن بە شێوەیەكی ڕێكخراو و زانستی مەشق و ڕاهێنانەكانیان ئەنجام بدەن، لە لایەكی دیكەوە لە ئێستادا تەكنەلۆجیا هاتۆتە نێو ئەو یارییە و لە وڵاتانی پێشكەوتووی جیهانی سستەمی تایبەت بە خۆیان پەیڕەو دەكەن بەڵام ئێمە هێشتا نەمانتوانییوە دەستمان بەم سیستەمە پێشكەوتووە بگات، هەروەها كەمی پشتگیری دارایی یاریزانەكانی تایكواندۆ كێشەیەكی دیكەیە چونكە یاریزانەكانمان بۆ بەشداری كردن لە پاڵەوانێتی نێوخۆ و دەرەوەی وڵات پێویستیان بە هاندان و پشتگیری ماددی هەیە.
ئەو ڕاهێنەرە گوتیشی، بەر لە دوومانگ یاریزانێكمان لە شاری سۆرانەوە گەشتی وڵاتی ئیماڕاتی كرد بۆ بەشداری كردن لە پاڵەوانیەتی عەڕەب، ڕووبەڕووی یاریزانی وڵاتی عومان بووەوە، لە یارییەكی زۆر بەهێزدا دوای سێ گەڕ لە یەكسان بوون بەڵام جێگای داخە بە هۆی نەبوونی ئەزموون و تێنەگەیشتن لە سیستەمی ئەلكتڕۆنی دووچاری دۆڕان هات.
كاپتن هۆشەنگ داوا دەكات، بەرپرسانی وەرزشی پێویستە لەم شارە بە ڕژدی كار بكەن بۆ چارەسەركردنی ئاستەنگە وەرزشییەكان بە تایبەت لە یارییەكانی هونەری جەنگی، چونكە لە شاری سۆران ژمارەیەكی زۆر لە لاوان یاریزانی ئەم یارییەن و دەتواندرێت بە تێچوێكی كەم ئەنجامی گەورە بەدەستبهێنن و بە دڵنیاییەوە لاوەكانی ئەم شارە لە كوردستان و عێڕاق و جیهان پێشەنگ و بەهێزن.
هەروەها ئەو ڕاهێنەرە دەڵێت، پشتگیری نوسینگەی “مەلا مستەفا بارزانی” لە ساڵی ڕابردوو، بووە هەوێنی سەركەوتنەكانمان لە پاڵەوانیەتی تایكواندۆی جیهانی لە وڵاتی كۆریای باشوور لە كۆی نزیكەی ٦٠ وڵات توانیمان بە مەدالیای ئاڵتونی و چەندین مەدالیای دیكە بگەڕێینەوە بۆ باوەشی نیشتیمان سەركەوتن بۆ كوردستان بنوسینەوە.
