دیدار-زاری كرمانجی
سەرۆكی سەنتەری ڕۆشنبیری دیانا، لە دیدارێكی زاری كرمانجی تیشكدەخاتەسەر كاروچالاكییەكانیان و ئاستەنگ و گرفتەكانیان و بەرنامە و پلانی داهاتوویان.
سیهاد قادر، سەرۆكی سەنتەری ڕۆشنبیری دیانا، بە زاری كرمانجی گووت: سەنتەری رۆشنبیری دیانا لەسەر دەستی ١٩ گەنجی خۆبەخشی شارۆچكەی دیانا دامەزراوە، لە ١٤ـی ٩ـی ٢٠١١ ڕەزامەندی كاركردنی لە وەزارەتی ناوخۆی حكوومەتی هەرێمی كوردستان پێدراوە، لە مێژووی سەنتەری ڕۆشنبیری دیانا سێ جار كۆنفڕانسی ناوخۆی سەنتەر ئەنجامدراوە، كۆنفڕانسی دامەزراندن كە یەكەم كۆنفڕانسی سەنتەر بووە، كۆنفڕانسی دووەم لە ساڵی ٢٠١٣ ئەنجامدراوە، هەروەها كۆنفڕانسی سێیەم لە ساڵی ٢٠٢٣، ئێمە وەك ستافی نوێ وەك دەستەی كارگێڕی سەنتەر هەڵبژێردراین، لە كاتی دەستبەكاربوونمان وەكو ستافی نوێی سەنتەر و دەستنیشانكردنی منیش وەك سەرۆكی سەنتەر ئەركێكی ئایینی و نیشتمانی و ئەخلاقی كەوتە سەرشانمان كەوا لە بوارە جیا جیاكان چالاكی ئەنجام بدەین، لە ماوەی دەستبەكاربوونمان تا ئێستا توانیومانە سەرەڕای هەموو ئاستەنگەكان زیاتر لە ١٦ چالاكی و خول لە بوارەكانی نیشتمانپەروەری، هۆشیاری، پێگەیاندن و خۆپیشاندانی مەدەنیانە ئەنجام بدەین، لەگەڵ چەند كار و چالاكی دیكە و بڵاوكردنەوەی هۆشیاری و خزمەتكردن بە هاونیشتمانیان”.
دەشڵێت: “بەدڵنیاییەوە هیچ كارێك بێ ئاستەنگ نییە، بە تایبەت كاری خۆبەخشی، بەڵام هەبوونی ژینگەیەكی پارێزراوی پڕ لە بەهای جوانی پێكەوەژیان و یەكتر قەبوڵكردن وای كرد كەوا بە متمانەوە دەست بەكارەكانمان بكەین، هەرچەندە لە سەرەتایی دەستبەكاربوونمان بەبێ هیچ ژێرخانێك دەستمان پێكرد بەهۆی ئامادەنەبوونی ستافی پێشوتری سەنتەر لە كۆنفڕانس، هەروەها نەبوونی هیچ پێداویستیەكی كاركردن، وای كردووە كەوا ئەوەی پلانی بۆ دائەندرێت نەتوانین وەك خۆی بەرجەستەی بكەین، زۆری ڕۆتینیاتی ئیداری بۆ وەرگرتنی مۆڵەتی ئەنجامدانی چالاكی و گرفتی گەورەی بەردەم كارەكانی سەنتەرمان بووە، بەڵام ئێستا بە هاوكاری بەڕێوەبەرایەتی كاروباری ناوخۆ و بەشی كۆمەڵەكان كارئاسانی دەكرێت، بەڵام زۆر جار كۆمەڵە كەسانێك هەن، ئەكرێت ناویان بنێین كەسانی دەرون نەخۆش كەوا ئاستەنگ بۆ سەركەوتنی كارە خۆبەخشیەكان دروست ئەكەن، گەنجان سارد ئەكەنەوە لە كاری خۆبەخشی، بێگومان ئەو كەسانە ڕێگرن لە بەردەم بە كولتووركردنی كاری خۆبەخشی، ئەمەش كێشەیەكی گەورەیە لە بەردەم كاری خۆبەخشی، بەڵام بە هەوڵدانی بەردەوام و كۆڵنەدان ئەتوانین بەسەر كێشە و گرفتەكان زاڵبین و بتوانین لە پاڵ هەبوونی گیر و گرفت و كەم و كورتی ژیان بە درەوشاوەتر و جوانتر ببین و خزمەت پێشكەش بكەین”.
ئاماژەی بەوەشدا: سەنتەر خاوەنی پلانی درێژ خایەنی خۆیەتی و كار لەسەر ئەو پلانە ئەكات كە پێكدێت لە (پڕۆژەی نیشتمان لە دیدی هەمووان، بڵاوكردنەوەی هۆشیاری خۆپارێزی لە كارەساتە سروشتیەكان) ئەنجامدانی سیمینار و دیبەیت و پانێلی هۆشیاری بەشێكن لە كارەكانمان، بەڵام گۆڕانكاری لە پلانی سەنتەر دەكرێت (مەترسییەكانی ماددەی هۆشبەر، كردنەوەی خولی ڕۆشنبیری هاوسەرگیری و پێكەوەژیان) ئەبنە بەشێك لە پلانی كاركردنمان، ئامادەكارییەكان بۆ ئەنجامدانیان دەست پێ ئەكەین و ڕێكاری پێویست دەگرینە بەر”.
سەرۆكی سەنتەری ڕۆشنبیری دیانا، ئەوەش دەخاتەڕوو: بەربەستە كولتووری و هەڵە تێگەیشتن لە كاری خۆبەخشی هۆكاری ئەوە بوو كەوا لە زۆرینەی چالاكییەكان بە تەنها دەربكەوم، بەڵام ئەتوانین بڵێین لە دوایین چالاكی سەنتەرمان بەهۆی ئەوەی پرسەم هەبوو نەمتوانی بەشداری بكەم، بە سوپاسەوە خۆبەخش و ئەندامانی سەنتەر توانیان بە باشتریان شێوە گەورەترین سیمیناری تایبەت بە قوتابییانی پۆلی ١٢ زۆر سەركەوتووانە بەڕێوەببەن، بەڵام نایشارمەوە كەم و كورتیش هەبووە لە دەستەی كارگێڕی، هەر لە كۆتایی ساڵی ڕابردوو دوو لە ئەندامانی دەستەی كارگێڕی دەستیان لە كار كێشایەوە، كە بەرپرسی بەشی چالاكییەكان و ڕاگەیاندن بوون، بەڵام بە دانانی پلان بۆ چارەسەركردنی ئەم كێشەیە ئێستا قۆناغێكی باشمان بڕیوە لە داهاتوویەكی نزیكدا زۆرترین ئەندام و خۆبەخشی سەنتەری ڕۆشنبیری دیانا ڕۆڵ دەبینن لە كاتی چالاكییەكان توانیومانە ژێرخانێكی باش دروست بكەین تاوەكو كۆتایی بەو ئاڵنگاریەی بەردەم سەنتەر بێنین”.
گوتیشی: سەنتەری ڕۆشنبیری دیانا وەك تەواوی سەنتەر و ڕێكخراو و كۆمەڵەكانی دیكە كە لە كۆمەڵگەی مەدەنی كار دەكەن، كێشەی دارایی هەیە ئەو كێشەیە كاریگەری درێژخایەنی هەیە لەسەر كاركردن و جێبەجێكردنی پلان، چونكە دابینكردنی توانای مرۆیی و لۆجستی پێویستی بە هەبوونی داراییەكی باش هەیە كە لە ڕێیەوە بتوانین چالاكی جۆراوجۆر ئەنجامبدەین، گومان لەوەدا نییە ئەگەر بمانەوێت پلانی درێژخایەن دابنێین وەكو خۆی پلانەكە جێبەجێ بكرێت، ئەوە پێویستمان بەوەیە كەوا سەرچاوەكی دیاری داهاتمان هەبێت، لە ئێستاشدا چەندین چالاكی جیاوازمان داناوە كەوا ئەنجامی بدەین، بەڵام بەهۆی كێشەی دارایی ناتوانین ئەنجامیان بدەین”.
سیهاد قادر، سەرۆكی سەنتەری ڕۆشنبیری دیانا، هێمای بۆ ئەوەش كرد: سەرەڕای ئەوەی چەندین جار بەڵێنمان پێدراوە كەوا شوێنێكمان پێ بدرێت بۆ دامەزراندنی بارەگای سەنتەر، بەڵام تا ئێستاش هیچ شونێكمان نییە، بۆ ئەنجامدانی كۆبوونەوەكانی سەنتەر هەرجارە و لە شوێنێك ئەنجاممان داوە، تا ئێستاش نەمان توانیوە میوانداری هیچ كەسێك بكەین بەهۆی ئەوەی كە بارەگامان نییە، هەرچەندە زۆر شوێن هەیە كەوا هاوكارمانن هەم بۆ ئەنجامدانی چالاكی هەم بۆ پێشوازی كردن، بەڵام ئێمە تا ئێستا هیچ شوێنێكمان بەكارنەهێناوە بۆ پێشوازی كردن بۆیەش میوانداری هیچ كەسێكمان نەكردووە، لە ئێستاشدا ئێمە داواكاری كردنەوەی بارەگای سەنتەرمان گۆڕیوە بۆ دامەزراندنی كتێبخانەیەكی گشتی لە شارۆچكەی دیانا، هیوادارین بتوانین بە هاوكاری لایەنی پەیوەندیدار كار لەسەر ئەوە بكەین و بیكەینە دیاری بۆ هاونیشتمانیانمان لە شارۆچكەی دیانا، بە پێویستیشی ئەزانم سوپاسی دەزگای زاری كرمانجی بكەم بۆ پێدانی ئەم دەرفەتە و پەرۆشیان بۆ بەرەو پێشبردنی بزاڤی ڕۆشنبیری و بڵاوكردنەوەی هۆشیاری لە دەڤەرەكە.
