عەبدولقادر ڕەسوڵ
هەر لە سەرەتای دروستبوونی مرۆڤەوە هێز و وزە فاكتەرێكی سەرەكی ژیانكردن بوون، دۆزینەوەی ئاگر ڕێرەوی ژیانی مرۆڤی لەسەر زەوی گۆڕی، بەهۆی ئاگرەوە مرۆڤ توانی خواردنی پڕ لە وزە و كالۆری دەستكەوێت و مێشكی پەرەبسەنێت، لە كاتێكدا مێشك پێنج یەكی ئەو وزەیە دەبات كە لەش دەستی دەكەوێ.
بە تێپەڕبوونی كات مرۆڤ ئەو هێز و وزەیەی دەستی كەوتووە بۆ پێشكەوتنی ژیان و باشتركردنی كاروباری ڕۆژانەی خۆی بەكاری هێناوە، هاوتەریب لەگەڵ پێشڤەچوونی زانست و تەكنەلۆژیا وزەش بووژانەوەی باشی بەخۆیەوە بینیوە, بۆ نموونە وزەی كارەبا كە تەمەنی نزیكەی 136 ساڵ دەبێت، زەمەنێكە تەنیا لە چوارچێوەی ڕووناككردنەوەی شەوە تاریكەكان دەرچووە و بووەتە شادەماری بەڕێوەچوونی ژیانی ڕۆژانەی مرۆڤ.
لە مێژووی گەلی كوردیشدا وەكو یەكێك لە دێرینترین گەلەكانی ڕۆژهەڵاتی ناوەڕاست، هێز و وزە بە درێژایی مێژوو بەكارهاتووە بۆ كاروباری ڕۆژانە، خەبات و تێكۆشان و ململانێ لەگەڵ سەختی و ئاڵنگارییەكانی ژیان.
وەكو سروشتی لەمێژینەی مرۆڤ و كاردانەوەی بۆ بارودۆخ و دەوروبەری، لەكاتی خۆشی و ناخۆشیدا، كۆمەڵێك ئاكار و رەفتاری خۆڕسك هەیە كە ئەنجامی دەدات.
شایی و دیلان و هەڵپەڕكێش وەكو كاردانەوەیەكی سروشتی لە مێژووی مرۆڤایەتی بە گشتی و گەلانی ڕۆژهەڵاتی ناوەڕاست بە تایبەت، تایبەتتر گەلی كورد لایەنێكی دیار و بینراوی ژیانی ڕۆژانەیە.
بە شیوازێك كە لە هەموو بۆنە و گردبوونەوەیەك دەبێ چەند خولەك و كاتژمێرێك تەرخان بكرێ بۆ هەڵپەركێ، قوتابی دەچێتە كۆلێژ و ئاهەنگی یەكتر ناسین سازدەكرێ، وتاری ڕاگر و كۆمەڵێك بابەتی لاوەكی تر لە پێشەكی دا دەوترێ، دواتر سێ، چوار، جاری وا هەیە پێنج شەش كاتژمێر هەڵپەڕكێ و بەزم و سەفایە! چەند خێزانێك دەچنە گەشت و سەیران بۆ بەسەربردنی كاتێكی خۆش، دەبینی لەولاوە چەند كەسێك دەستی یەكیان گرتووە و هەڵدەپەرن، جا لە هەمووی سەیرتر كاتێ كەناڵێك دەچێت چاوپێكەوتنیان لەگەڵ بكا، بەدەم هەڵپەڕین و شاییەوە و بە هەناسە بڕكێوە دەڵێن (سەفرەیەكی زۆر خۆشە، كەشێكی بەهاری خۆشە و دۆڵمەمان هێناوە، یاخوا بەخێربێن)
سەری ساڵەو هەر شوێنێك دەیبینی ستەیجێك دانراوە و چەند بەندبێژ و هونەرمەندێكیان هێناوە، لە چواردەورەكەیشی شایی و لۆغان و هەڵبەز و دابەزە!
كەمپەینی هەڵبژاردنە و پارتە سیاسییەكان لەجیاتی خستنەڕووی بەرنامەی كاریان و بە لەبەرچاوگرتنی هزری خەڵك، كام بەندبێژ و تیپی بەتوانایە دەیهێنن و ئەو خەڵكە بە گۆرانی و هۆنراوەكانیان هەڵدەپەڕن، دەبێ هێزێكی تۆكمەش كاكی بەندبێژی نەخوێندەوار بگەیەنێتە سەر ستەیج گەرنا، سێڵفی و ماچ و دەستلەملانی جەماوەر كەشەكەی لێ تێكدەدەن!
جگە لەوەش، لە هەر پارت و لایەنێكی سیاسی چەندین بەندبێژ بێ بوونی هیچ پێشینەیەكی زانستی و پیشەیی و ڕۆشنبیری، براونەتە بەرزترین پۆستەكانی حزبی و حكوومی.
هەڵپەڕكێ لەناو كورددا لە زۆر كات بووەتە نمایشێكی بێمانا و دوور لە چێژ و شادی، چەندین كەس لەسەر سەرچۆپی كۆژراون و وەكو یەكەم داهێنانی كورد بە جیهان ناسێنراوە، لەماوەی ڕابردوودا وەكو لایەنی فەرمی بەنیاز بوون ناوی كورد بخەنە كتێبی گینسەوە، كە مەزنترین هەڵپەڕكێ بكرێ لە دەوری قەڵای هەولێر، لێ ستافی سەرپەرشتی كتێبەكە وتبوویان بڕۆنەوە ڕۆڵە خۆ ئەوە ڕیكلامی كەناڵە لۆكاڵییەكانتان نییە!
هەر هۆز و عەشیرەت و ناوچەیەكیش جۆرە هەڵپەڕكێیەكی تایبەت بە خۆیان هەیە، ئەم بابەتە لەلایەن كوردەوە لە خۆشی دەربڕین تێپەڕیوە و بووەتە سایكۆلۆژیایەكی جێگیر لە هزری تاك بە تاكی كۆمەڵگەی كوردی، بەر لە ئاهەنگەكان كام خواردنی پڕوزە و هێزە دەخورێ تاوەكو توانایەكی باشتری هەڵپەڕكێ پێشكەشی چۆپیكێش بكا، لەبری بیركردنەوە و پیشكەوتن، شایی و هەڵپەڕین عیلم و فەلسەفە، پێشكەوتن و ژیان، بوون و مانەوەی كوردی لێ گرێدراوە!
تاوانی مەزنی ڕەشبەڵەك و تێكەڵبوونی كچ و كوڕ یش لەولاوە كە لەوانەیە چەندین ڕۆژ مرۆڤی باوەڕدار لە تووڕەیی پەروەرێنی مەزن دەربازی نەبێ.
