سەرۆکی بەرەی نیشتمانی عێراق دەلێت: پێویستە ناکۆکییەکانی هەولێر و بەغدا چارە بکرێن، هەروەها فەرمنابەرانی هەرێمی کوردستان وەک فەرمانبەرانی عێراق مافیان هەیە.
شەممە، 31ـی ئایاری 2025، ساڵح موتڵەگ سەرۆکی بەرەی نیشتمانی عێراق ڕایگەیاند، پێویستە ناکۆکییەکانی هەولێر و بەغدا لە بنەڕەتەوە چارە بکرێن.
ساڵح موتڵەگ کە پێشتر جێگری سەرۆک وەزیرانی عێراق بووە، گوتیشی: من وای دەبینم هیچ پاساوێک نییە بەوەی مووچەی فەرمانبەرانی هەرێمی کوردستان بەم شێوەیەی ئێستا بێت، ئەوان فەرمانبەری عێراقین، هەربۆیە مافیان هەیە وەک هەر عێراقییەکی دیکە.
هەروەها پێشنیوەڕۆی ئەمڕۆ شەممە، 31-05-2025، کۆبوونەوەی گرنگ و بەرفراوانی هێز و لایەنە سیاسییەکانی هەرێمی کوردستان بە سەرپەرشتیی دەستەی کارگێڕیی پارتی دیموکراتی کوردستان لە پیرمام بەڕێوە چوو.
لە کۆبوونەوەکەدا تاوتوێی دۆخی گشتیی ئێستای عێراق، هەرێمی کوردستان و ناوچەکە دەکرێت. هەروەها هەڵوێستی لایەنە سیاسییەکانی هەرێمی کوردستانیش لە بەرانبەر بڕیاری وەزارەتی دارایی عێراق بۆ خەرجنەکردنی ماف و شایستە داراییەکانی هەرێمی کوردستان ڕادەگەینرێت.
