ئه‌وه‌ی وه‌زاره‌تی دارایی عێراق ده‌یكات بیانووگرتن و هێنانه‌وه‌ی پاساوه و ده‌بێت مووچەی مووچه‌خۆرانی كوردستان بنێردرێت”
مونا قه‌هوه‌چی، جێگری سه‌رۆكی پارتی چاكسازیی توركمان، دەڵێت: “جارێکی دیكە بەغدا بە بیانووی نوێ ناردنی مووچەی فەرمانبەران و مووچەخۆرانی هەرێمی کوردستانی تووشی کێشە کردەوە، بێگومان هەموو ئەو رێگرییانە دژیەکەن لەگەڵ یاسا و دەقە دەستوورییەکان و بڕیاری دادگای فیدراڵی. ئاشکرایە بەغدا مووچەی کردووەتە کارتێکی سیاسی بۆ لاوازکردن و دژایەتیکردنی حکوومەتی هەرێمی کوردستان و خەڵکەکەی بەکاری دەهێنێت، لە ئێستاوە بڕینی شایستە داراییەکان و مووچە و قووتی خەڵکی هەرێمیان کردووەتە شێوازێک بۆ بانگەشەی پێشوەختەی هەڵبژاردن.“
ئه‌وه‌شی خسته روو: ”تازەترین بیانووی وەزیری دارایی عێراق دەڵێت هەرێمی کوردستان پارەی پێویستی لە بودجەدا نەماوە. ئەمە جگە لە سزادانی مووچەخۆری هەرێمی كوردستان هیچی دیكە نییە، چونکە لەو رێژەیەی کە شایستەبەشی ئەمساڵی هەرێمی کوردستانە، تەنیا مووچەی چوار مانگ نێردراوە كە بەم جۆرەش كەمتر لە ٣٠٪ پشكی ئەمساڵی كوردستان نێردراوە.“
گوتیشی: ”هێشتا حکوومەتی عێراق خشتەی بودجەی ساڵی ٢٠٢٥ی نەناردووەتە ئەنجوومەنی نوێنەران و پەسەند نەکراوە، کەواتە ئەو بیانووەی وەزیری دارایی عێراق هیچ پشتیوانییەکی یاسایی و دەستووریی نییە. بۆیە ئەوەی حکوومەتی فیدڕاڵ و وەزیری دارایی عێراق بەرامبەر بە مووچەخۆرانی هەرێمی کوردستان دەیکەن، جگە لە شەڕی دەروونی و هەوڵ بۆ برسیکردن و لاوازکردنی ئیرادەی تاکی کوردستانی هیچی دیكە نییە، هەرچەندە ناتوانن و ئیرادەی حکوومەتی هەرێم و تاکی کوردستانی زۆر لەوە بەهێزتر و گەورەترە، بەو هەوڵە بچووک و نەزۆکانە لاواز بکرێت.“
