لە سۆران كۆمەڵگەی دایك بەبێ بەرامبەر خزمەتی كەسانی پێویست دەكات

بەرپرسانی كۆمەڵگەی دایك بۆ زاری كرمانجی باسی گرنگی كۆمەڵگەكە دەكەن

مستەفا دۆلەمەری – زاری كرمانجی:

ماوەی دوو ساڵە، بە فەرمانی ڕاستەخۆی سەرۆك بارزانی كۆمەڵگەی دایك لە ئیدارەی سەربەخۆی سۆران، بەڕووی چەند چینێكی دیاری كراودا كراوەتەوە و ڕۆژانە بەبێ بەرامبەر خزمەتێكی بەرچاویان پێشكەش دەكرێت و بووەتە باوەشێكی میهرەبان بۆیان.
ئەركی سەرەكی كۆمەڵگەی دایك لە سۆران، خزمەتی بە ساڵاچوان، منداڵانی ئۆتیزم، نابینا و نابیستان، خانەی كلتووری و ئەمانە و چەند چینێكی دیكە، ئاسانكاری زۆری بۆ هاووڵاتییان دروست كردووە و بەردەوامیشە لە بەدەمەوە هاتنی ئەم توێژانەی كۆمەڵگە بە تایبەت بۆ كەسانی خاوەن پێداویستی و لێقەوماو .
د. غەریب ئیبراهیم، بەڕێوەبەری كۆمەڵگەی دایك لە سۆران، بۆ زاری كرمانجی زانیاری زیاتر لە سەر كۆمەڵگەكە دەخاتەڕوو و دەڵێت:” بە فەرمانی سەرۆك بارزانی و لەسەر ئەركی دەزگای خێرخوازی بارزانی ئەو كۆمەڵگەیە لە سۆران دامەزرا، بە هاوبەشی گرووپێكی ئەندازیاری زانكۆی سۆران دیزاینێكیی زۆر مۆدێرنی بۆ ئەنجامدرا، بۆ ئەوەی كۆمەڵگەیەكی وا بنیات بنرێت كە لە ئاست ئەو خزمەتە بێت كە پێشكەش دەكرێت، كۆمەڵگەی دایك شەش سەنتەر لە خۆدەگرێت كەپێكدێن لە سەنتەری ئۆتیزم، نابیست، نابینایان، بەشی بەساڵاچوان و خانەی كلتووری، بەشی بێسەرپەرشتان هەرچەندە ئەم بەشەیان تاكو ئێستا نەكوتۆتە كار.
دكتۆر غەریب نایشارێتەوە، سەنتەری ئۆتیزم داواكاریەكی زۆری هاووڵاتییانی لەسەرە، لەسەرەتا تەنها 13 منداڵی ئۆتیزمان وەرگرت، بەڵام بەهۆی ئەوەی كە داواكاریەكی زۆر لەسەر ئەم بەشە هەبوو، بڕیارماندا ڕێژەی وەرگرتنی منداڵانی ئۆتیزم زیاد بكەین، دەشڵێت:” لە ئێستادا 21 مامۆستای ئۆتیزم و نزیكەی 50 منداڵی ئۆتیزمان هەیە و بە بەردەوامی تەخەروج بەو منداڵانە دەكەین بۆ قوتابخانە و باخچەی ساواین دەچن”.
بەپێی ڕێنوێنی كۆمەڵگەی دایك، لە تەمەنی سێ بۆ شەش ساڵان مناڵانی ئۆتیزم وەردەگرن، پێشینەی وەرگرتنی ئەو مناڵانەش بۆ ئەو كەسانەیە كە كەس و كاری پێشمەرگەن یا خانەوادەیەك باری داراییان خراپ بێت، بەپێی زانیاریەكان لە شارەكانی دەرەوەی ئیدارەی سۆرانیش خێزان هەیە منداڵی ئۆتۆیزمەكەی خۆی هێناوەتە كۆمەڵگەی دایك”.
د. غەریب ئیبراهیم سلێمان، سەبارەت بە پەیمانگەی نابینایان و نابیستانیش، دەڵێت:” ئەمە دوو پەیمانگەی ئەكادیمین سەر بە وەزارەتی پەروەردەن و بە پێی ڕێنمایەكانی وەزارەتی پەروەردە و وەزارەتی كار خزمەتگوزاری خوێندن پێشكەش دەكەن بۆ ئەو منداڵانەی كە نابیست و نابینان واتە كەسێك بەهۆی نابیناو نابیستیەوە لە ماڵەوە نەیتوانیووە بچێتە قوتابخانە ئێمە لێرە وەریان دەگرین و خوێندنیان پێشكەش دەكەین، ساڵانەش هاوشێوەی قوتابخانەكانی دیكە، زەنگی خوێندن لێ دەدەین، بەشێكی دیكەشمان هەیە كە خانەی كلتووریە بۆ ئەو كەسانەی كە تەمەنیان زۆرە و كاتی زۆریشان لە بەردەستە، بۆیە ڕۆژانە دەتوانن لێرە كاتی خۆیان بە یاری و كتێب خوێندنەوە بەسەربەرن”.
لای خۆیەوە، زیبا نایف، توێژەری گشتی لە كۆمەڵگەی دایك، گووتی:” سەرەڕای ئەو هەموو خزمەتگوزاریانەی كە لە كۆمەڵگەی دایك بە بێبەرامبەر پێشكەش بە سوودمەندان دەكرێت، دەتوانم بڵێم، كە بۆتە یەكەم سەنتەر و ناوەندی بڵاوكردنەوەی هۆشیاری و ڕۆشنبیركردنی تاكو خێزانەكانیش، بۆ نموونە لە سەرەتادا خێزانەكان یاخود خەڵكی پێیان شەرم بوو بڵێن منداڵەكەمان ئۆتیزمی هەیە، چونكە بە تێروانینی ئەوان ئۆتیزم كەموكوڕیە، بەڵام لە ڕاستیدا ئۆتیزم كەموكورتی نییە بەڵكو جیاوازیە، بەڵام لە ئێستادا زۆربەی خێزانەكان لە دوای تێستكردنی منداڵەكانیان كە ئۆتیزمە زۆر بە پەرۆشن بۆ ئەوەی منداڵەكانیان لە زووترین كاتدا ڕاهێنان وەربگرن و بەرەو پێشەوە بچن، ئەركی سەرەكی ئێمە وەكو توێژەر راوێژكردنی دەرەونی و كۆمەڵایەتی گشت سوودمەنبوان و بە تایبەتی بە ساڵاچوانە، لە هەمان كات، چاودێری چڕی تەندروستیان و دانانی پلان و بەرنامەیە بۆ ژیانی ڕۆژانەیان”.
ئەیاس مەخسد، بەڕێوەبەری خانەی بەساڵاچووانی كۆمەڵگەی دایك، بە زاری كرمانجی راگەیاند:” خانەی بەساڵاچووان یەكێكە لە بەشە هەرە گرنگ و تایبەتەكەی كۆمەڵگەكەمان، تایبەتمەندی ئەو خانەیە پێكدێت لە دابینكردنی شوێنی حەوانەوە و ژیانكردن بۆ كەسانی پێویست كە داواكاری سوودمەندبوونی هەیە لە خانەی بەساڵاچووان، وەرگرتنی ئەوكەسانەش چەند مەرجێكی دەبێ تێدا تێدابێت، لەوانە كەسی پلەیەكی نەبێت و بۆ ئافرەت تەمەنی سەرووی 55 ساڵ بێت، بۆ پیاو تەمەنی سەرووی 60 ساڵ بێت، نەخۆشی گوازراوەی نەبێت و هیچ نەخۆشیەكی دەروونی و عەقلی نەبێت، واتە بەپێی ئەو مەرجانەی لە ئیستادا شەش كەیسمان هەیە دوو كەیس ئافرەت و چوار كەیس پیاو .
بەڕێوەبەری خانەی بەساڵاچووانی كۆمەڵگەی دایك، گووتیشی:” خزمەتكردنی هاووڵاتییان بەشێوەی 24 كاتژمێریە، تەواوی ئەو خزمەتگوزاریانەی لە كۆمەڵگەی دایك بە گشتی و خانەی بەساڵاچووان بەتایبەتی پێشكەش دەكرێن بە خۆرایی و لەسەر ئەركی دەزگای خێرخوازی بارزانییە، بەساڵاچووان گەوهەری نێو كۆمەڵگاكەمانن شەڕەفەند ئەبین بە خزمەتكردنیان، زۆر جاریش ئەوانەی كەس و كاریان هەیە، هەوڵمانداوە كێشەكانیان لەگەڵ ماڵەوەیان چارەسەر بكەین و بیانگەڕێنینەوە نێو خانەوادەكانیان”.