سوبحی عەبدوڵڵا : گەنجان بەر لە هەموو شتێك بیر لە باشتركردنی ئابووری خۆیان دەكەنەوە
ڕزگار عەزیز : گەنجان خۆیان لە نێو چالاكییە ڕۆشنبیرییەكان نابیننەوە
محەممەد حسێن : بێ كوالێتی كۆڕ و كۆبوونەوە ڕۆشنبیرییەكان، گەنجانی بێ تاقەت و دوورخستووەتەوە
مەهدی محەممەد – زاری كرمانجی :
بەشێك لە گەنجان هۆكاری بەشداری نەكردنی گەنجان لە چالاكییە ڕۆشنبیرییەكان، بۆ بێ كاری و خراپی بارودۆخی ئابووریی دەگەڕێننەوە و پێیان وایە ئەوەندەی گەنجان لە خەمی دۆزینەوەی كار و باشتركردنی بار و گوزەرانی ژیانی خۆیانن، ئەوەندە لە خەمی بەشداریكردن لە كار و چالاكییە ڕۆشنبیرییەكان نین.
گەنجێك دەڵێ “كاتێك گەنجێكی بێ كار، خەمی پەیداكردنی خەرجی ڕۆژانەی خۆی بێت و كرێكاری بكات، چۆن تاقەتی بەشداریكردنی دەبێت لە كۆڕ و چالاكییە ڕۆشنبیرییەكان،” یەكێكی دیكە دەڵێ “كار دەكەم و بە پێی پێویستیش بەشداری لە چالاكییە ڕۆشنبیرییەكان دەكەم،” گەنجێكی دیكەش هۆكاری بەشداری نەكردنی گەنجان بۆ خراپی كوالێتی كار و چالاكییەكان دەگەڕێنێتەوە كە نەیانتوانیوە گەنجان بەلای چالاكییەكان ڕابكێشێت.
محەممەد حسێن پێی وایە خراپی كوالێتی چالاكییە ڕۆشنبیرییەكانی لە ئیدارەی سۆران، گەنجانی تۆراندووە لە بەشداریكردنیان “كاتێك چالاكییەكی ڕۆشنبیریی لە ئاستێكی بەرزدا نەبوو و نەیتوانی قەناعەت بە گەنجێك بكات كە بەو چالاكییە دڵخۆش بووە و سوودی لێ بینیوە، چۆن ئەو گەنجە جارێكی دیكە بەشداری لە چالاكییەكی دیكەی هاوشێوە دەكات ؟ بێگومان نایكات،”
محەممەد دەشڵێت “بۆ ئەوەی هۆڵ و چالاكییەكان پڕ لە گەنج ببنەوە، دەبێت كارێكی نموونەیی گەورە و جوان بكرێت، تا گەنجان ئاشت ببنەوە و بگەڕێنەوە ناو چالاكییە ڕۆشنبیرییەكان، ئەگەر واش بەردەوام بێت، دڵنیام ساڵێكی تر گەنجێك نابیننەوە لە ناو چالاكییەكاندا،”
محەممەد تەكنۆلۆژیا و سۆشیاڵ میدیا بە هۆكارێكی دیكەی دوورخستنەوەی گەنجان دەزانێت و دەڵێ “بەشێكی زۆری گەنجان لەو باوەڕە دانە كە سۆشیاڵ میدیا قەرەبووی بەشداری نەكردنیان لە چالاكییە ڕۆشنبیرییەكان بۆ دەكاتەوە و پەروەردەییان دەكات و ئاستی ڕۆشنبیرییان بەرز دەكاتەوە، بەڵام كە سەیریش دەكەین زۆرترینی گەنجان لە نێو سۆشیاڵ میدیا ئەوەندەی خەریكی كات بەسەربردن و سەیركردنی ڤیدیۆ و یاریی و ئەو جۆرە شتانەن، نیو ئەوەندە خەریكی خۆ ڕۆشنبیركردن و خوێندنەوە و گوێگرتن لە چالاكییە ڕۆشنبیرییەكان نین، بۆیە ئەم جۆرە بیانووە جگە لە خۆ چەواشەكردن هیچی دیكە نییە.”
سوبحی عەبدوڵڵا ش باس لەوە دەكات كە لە ئێستادا گەنجان بەر لە هەر شتێك سەرنجیان لەسەر باشتركردنی ئابووری و ژیان و گوزەرانی خۆیانە و دەڵێ “كاتێك گەنجێكی بێ كار، خەمی پەیداكردنی خەرجی ڕۆژانەی خۆی بێت و خەریكی كاركردن و كرێكاری بێت، چۆن تاقەتی بەشداریكردنی دەبێت لە كۆڕ و چالاكییە ڕۆشنبیرییەكان، بۆیە لە ئێستادا ئەوەی زۆر گرنگە لای گەنجان پەیدا كردنی پارەیە، بۆ ئەوەی ئەگەر هیچ نەبێت هەندێك لە كەموكوڕییەكانی ژیانی پێ پڕ بكاتەوە،”
دەشڵێت “دڵنیام هیچ گەنجێك نییە حەزی لە ڕۆشنبیربوون و بەشداریكردنی لە چالاكییەكاندا نەبێت، بەڵام سەختی ژیان و بێ گوزەرانی ڕێگری لێكردوون، بۆیە هەر كاتێك ئەو بارودۆخە قورسە لە سەریان لا بكەوێت، وەك جاران هۆڵە ڕۆشنبیرییەكان پڕ لە گەنج دەبنەوە،”
سوبحی جەخت لەوەش دەكاتەوە كە پێویستە گەنجان كار لەسەر هۆشیاریی و ڕۆشنبیربوونی خۆیان بكەن و دەڵێ “لە كۆتایدا ئەوەی گەنجان ڕزگار دەكات لە ژیانی سەخت، بەرزی ئاستی تێگەیشتن و هۆشیاریی و ڕۆشنبیربوونیەتی، بۆیە زۆر پێویستە گەنجان ئەو لایەنانە فەرامۆش نەكەن و لە پاڵ كاركردن، ڕۆژانە كاتێك تەرخان بكەن بۆ خۆ دەوڵەمەندكردنیان بەم لایەنانە.”
ڕزگار عەزیز پێ وایە گەنجان خۆیان لە نێو چالاكییە ڕۆشنبیرییەكان نابیننەوە بەوەی كە تەعبیر لە ژیان و كێشە و گوزەرانی ئەوان بكات، بۆیە زۆر بایەخی پێ نادەن “ئەگەر بەشێكی كەمی ئەو چالاكییە ڕۆشنبیریانە تایبەت بكرێن بە ژیان و گوزەرانی گەنجان، بە دڵنیایەوە گەنجانیش بەشداری لە چالاكییەكاندا دەكەن،” دەشڵێت “لایەنی پەیوەندیدار پێویستە ساڵی ئەگەر جارێكیش بێت كۆنفرانسێكی گەورەی تایبەت بە لاوان ئەنجام بدات و تێدا گەنجان و لاوان بە ئازادانە باس لە ژیان و گوزەران و خەون و ئاواتەكانیان بكەن، كە دڵنیام ئەمە دەبێتە دەرفەتێكی باش بۆ بەشداریكردنی گەنجان لە چالاكییە ڕۆشنبیرییەكان، كاتێك هەستیان كرد گوێ لە دەنگ و بۆچوونەكانیان دەگیرێت،”
ڕزگار خێزانیش بە كەمتەرخەم دەزانێت لەوەی گەنجان دوور بكەونەوە لە مەجالی ڕۆشنبیری و دەڵێ “بەشێك لە خێزانەكان، هەر بەزوویی منداڵان ئاراستەی كار و كاسبی دەكەن و ناهێڵن گۆڤارێك یان پەرتووكێك بخوێنێتەوە، كاتێك بە زوویی پێیان دەڵێن ئەها فلانە كەسە هەموو ڕۆژەكانی ژیانی بە خوێندنەوە بەسەر برد فەرموو گەیشت بە چ ؟ .”
