” كێشەكانی كورد لەگەڵ ناوەند پێویستی بە دەنگێكی یەكگرتوو و بەهێز هەیە”
محەمەد هەسنانی-سۆران:
مامۆستایەكی بەشی یاسا و سیاسەت و پەیوەندییە نێودەوڵەتییەكانی زانكۆی سۆران، لە دیدارێكی زاری كرمانجی تیشكدەخاتەسەر كاریگەرییەكانی دواكەوتنی پێكهێنانی كابینەی نوێی حكوومەتی هەرێمی كوردستان و خوازیارە هەرچی زووە لایەنەكان بگەنە ڕێككەوتن.
سەنار شەریف، مامۆستا لە بەشی یاسا و سیاسەت و پەیوەندییە نێودەوڵەتییەكانی زانكۆی سۆران، بە زاری كرمانجی ڕاگەیاند، زیاتر لە شەش مانگە هەڵبژاردن لە هەرێمی كوردستان كراوە، پەرلەمانتاران سوێندی یاساییان خواردووە، سەرەڕای هەوڵە بەردەوامەكان، بەڵام تا ئێستا هیچ ئاسۆیێك نییە بۆ رێككەوتنێك بۆ كاراكردنی پەرلەمان و پێكهێنانی حكوومەت، ئەمەش جۆرێك لە نائومێدی لە لای هاووڵاتییان دروست كردووە، ئەگەرچی كابینەی نۆیەمی حكوومەتی هەرێمی كوردستان بەردەوامە لە كاركردن، بەڵام هەردەبێت حكوومەتی نوێ پیكبهێنرێت”.
گووتیشی: كۆمەڵیك هوكار هەن لە پشت درەنگ كەوتنی پێكهێنانی حكوومەت، هۆكاری هەرە سەرەكی دەگەڕێتەوە بۆ بەدێوەزمەكردنی حكوومەتی زۆرینە و خۆگرتن بە نەخۆشی سازان و پشك پشكێنە، ئەمەش هەمیشە حكوومەتی تێركردن و رازی كردنی لایەنە سیاسییە جیاوازەكانە، كە دواجار پێكهێنانی حكوومەت دەبێتە دیلی قایل كردن و وەڵام دانەوەی داواكاریەكان، ئەم نەخۆشییە لە عێراق زۆر بەزەقتر دەردەكەوێت، ئەگەرچی لە عێراق هوكاری ڕەوای لە پشتە كە ئەویش بەش بەش بوونی تایفییە، كە وای كردووە پۆستەكان لەسەر بنەمای تایفەگەری و نەتەوەیی دابەش بكرێن و هیچ بەهایەك بۆ ئۆپۆزسیۆنبوون نەهێڵدراوەتەوە، بەڵام پێموانیە لە كوردستان ئۆپۆزسیۆن بوون ئەوەندە نا كاریگەر بێت، تا بەشداری كردن لە پرۆسەی سیاسی یەكسان بكرێت بە بەشداری كردن لە كابینەی حكوومەت، یان بەشداری كردن لە حكوومەت بكرێتە مەرجێك بۆ پیكهێنان و بەردەوامبوونی”.
دەشڵێت: ئەگەرچی كوردستان حاڵەتێكی جیاوازە لە زۆر ڕووەوە، بەڵام بە گشتی دواخستنی پێكهێنانی حكوومەت دوای هەڵبژاردن لەهەر وڵاتێكدا كۆمەڵێك دەرهاوێشتەی یاسایی، سیاسی، ئابووری و كۆمەڵایەتی قوڵی دەبێت، لەسەر ئاستی یاسایی بۆشایێكی دامەزراوەیی دروست دەكات كە ڕێگری لە بڕیاردان دەكات و متمانەی هاووڵاتییان بە سیستەمی دیموكراسی لەق دەكات، بەتایبەتی رۆڵی پەرلەمان لە چاودێری كردن و یاسادانان رادەوەستێت. لەڕووی ئابوورییەوە نەبوونی سەقامگیری دەبێتە هۆی لاوازكردنی وەبەرهێنان و دواخستنی جێبەجێكردنی پڕۆژەكان، لەڕووی كۆمەڵایەتییەوە هاووڵاتی هەست بە بێزاری دەكات بەهۆی نەبوونی ناروونی لە ئێستا و داهاتوو، ئەمە جگە لەوەی كە سەردەنێت بۆ قوڵتركردنی ناكۆكییەكانی حزبە سیاسییەكان، بە كەڵەكەبوونی هەموو ئەمانە، دۆخێكی چەقبەستوو بەرۆكی گشت كایەكانی وڵات دەگرێتەوە كە ئەنجامی باشی نابێت، بەدەر لەمانە، هەرێمی كوردستان لە كێشمەكێش و ناكوكیدایە لەگەڵ ناوەند، بەنەبوونی پەرلەمانێكی كارا یەك دەنگی لەت دەبێت، لەوانەیە چەند دەرگایەك بخاتە سەر پشت بۆ كۆمەڵێك دەست تێوەردانی نەخوازراو”.
ئاماژەی بەوەشدا: لە گۆڕنانی خۆلێكی پەرلەمانی كە هێشتا بە تەواوی لە دایك نەبووە شتێكی باش نابێت، لەڕووی یاساییەوەش لەوانەیە ئاسان نەبێت. لە كوردستان دەستوورمان نییە تا كێشەیەكی لەم چەشنە باس بكات، لە یاسای سەرۆكایەتی هەرێم، یاسای هەڵبژاردن، پەیڕەوی ناوخۆی پەرلەمان هیچ دەقێكی یاسایی نییە كە باس لە شەرعی و ناشەرعی بوونی هێشتنەوەی دانیشتنەكان بە كراوەیی بكات، ئەگەرچی شتێكی باشیش نییە، گەر لە حاڵەتێك پەرلەمان نەیتوانی با لە ماوەی ٤٥ ڕۆژ ڕێژەی پێویست بۆ ئەنجامدانی كۆبوونەوەی یەكەم مسۆگەر بكات، ئەوا لەو حاڵەتەدا باسی هەڵوەشاندنەوەمان دەكرد، بەڵام ئەوەی كە هەیە پەرلەمان توانیویەتی كۆببێتەوە و ئەندامان سوێندی یاساییان خواردووە، بەڵام دواتر نەیانتوانیوە دەستەی سەرۆكایەتی هەڵَبژێرن لە دانیشتنی یەكەم، دانیشتنەكە بە كراوەیی بەجێهێڵدراوە، واتە پەرلەمان لەم تاقیكردنەوەیە دەرچووە، چووەتە قوناغێكی تر، لەم قوناغەدا چەقی بەستووە، من مەبەستم ئەوە نییە كە بەهانە بۆ ئەم بەردەوامییە بهێنمەوە، چونكە بەردەوامی دان بەو بارودۆخە نە هیچ قازانجی هەیە، نە لەگەڵ رووحی یاسادا دەگونجێت، جگە لەوەی كە ئێمە ناتوانین پێشبینی بۆ بڕیارە چاوەڕواننەكراوە سپرایزەكانی دادگەی فیدراڵی بكەین لەم ڕووەوە، هەرچەندە پێشتر بڕیاری لەم جۆرەی رەت كردووەتەوە، بەڵام ئەمە مانای ئەوە ناگەیەنێت كە هەموو جار لەسەر یەك رێچكە بڕوات، بێگومان هەڵوەشاندنەوەی پەرلەمان واتا گەڕانەوە بۆ خاڵی سفر، كە جگە لە فیڕۆدانی كات و ئەرك هیچی تری لێ شین نابێت”.
لە دوا قسەكانیدا ئەو مامۆستایەی زانكۆ دەڵێت: نە بەردەوام بوونی ئەم دۆخە لە قازانجی ئێمەدایە، نە هەڵوەشاندنەوە و گەڕانەوە بۆ خاڵی سفر، ئەمڕۆ زۆر كێشە بەرۆكی گرتووین و زۆر هەوراز و نشێومان لەپێشە، ئەم بارودۆخە وا دەخوازێت كەوا دەنگ و ڕەنگە جیاوازەكان بەیەك بگەن، كێشەكانی كورد لەگەڵ ناوەند پێویستی بە دەنگێكی یەكگرتوو و بەهێز هەیە، ئەم یەكدەنگییە دروست نابێت ئەگەر لەنێوخۆ یەكڕیز نەبین، هەبوونی پەرلەمان واتا شەرعیەت، ئەم شەرعیەتە حوكمڕانی و پێگەی هەرێم بەهێز دەكات، بە نەبوونیشی پێچەوانەكەی ڕاستە، بۆیە پێویستە بەزووترین كات پەرلەمان چاڵاك بكرێت و دەستەی سەرۆكایەتی هەڵبژێردرێت و حكوومەت پێكبهێنرێت، بیرمان نەچێت ناوچەكە بە گشتی لە قوناغێكی هەستیاردایە، گوڕانكاریەكان زۆر خێران، هیچ شتێك نییە ناوی ئەستەم و مەحاڵ بێت، پێویست دەكات لەكاتی پێشوەچوون هەر پێشهاتێك قۆناغی ئامادەسازیمان تێپەراندبێ، چونكە دەرفەتەكان چاوەرێمان ناكەن، بەڵكو بەخێرایی بەسەرمان و لاماندا تێدەپەڕن
