سەفین دزەیی، بەرپرسی فەرمانگەی پەیوەندییەکانی حکوومەتی هەرێمی کوردستان رایگەیاند: دیدارەکانی سەرۆک وەزیران لەگەڵ بەرپرسانی ئیدارەی ئەمەریکا بەردەوام دەبێت.
سەفین دزەیی كە ئەندامی شاندی گەشتەکەی سەرۆکی حکوومەتی هەرێمی کوردستانە بۆ ئەمەریکا، گووتی: لە دوو ڕۆژی داهاتوودا لەگەڵ بەرپرسانی ئیدارەی ئەمەریکا دیدار و گفتوگۆ دەکرێن، ئامانجیش لە گفتوگۆکان ڕوونکردنەوەیە لەسەر پێشهاتەکان لە حکوومەتی هەرێمی کوردستان ببیستن، هەروەها ئەو چاوەڕوانییەی ئێمە لە دۆستەکانمان هەیە چین، هاوکات بزانین هەماهەنگی داهاتوو بە چ شێوەیەک دەبێت، بۆ ئەوەی بەردەوام بێت لە پاراستنی ئاسایش و سەقامگیری و پەرەپێدانی ئابووری و فرەچەشن کردنی سەرچاوەکانی.
لەبارەی ڕێککەوتنی کەرتی وزە کە لەگەڵ دوو کۆمپانیا ئەمەریکی، سەفین دزەیی گووتی: ئەو دوو کۆمپانیایە ماوەی 15 ساڵە لە هەرێمی کوردستان کار دەکەن، ئەرکی داهاتوویان پەرەپێدان و بەرهەمهێنانی غازی سروشتی بە پلەی یەک و دواتر نەوتە، چونکە هەرێمی کوردستان و عێراقیش پێویستیان بە غازی سروشتییە، بە تایبەت بۆ بەرهەمەمهێنانی کارەبا و چەند بوارێکی دیکەی خزمەتگوزاری.
