مەیدانی جەنگ و خوێن با بكەین بە شوێنی یارییە وەرزشییەكان و گەشتیاری

د. ئازا كامەران – زاری كرمانجی:
دووشەممە 12ی ئایاری 2025، پارتی كرێكارانی كوردستان (پەكەكە) لە ڕاگەیەندراوێكدا، ئەنجامی 12 ەمین كۆنگرەی خۆی بڵاو كردەوە و ڕایگەیاند: لەژێر ڕۆشنایی بانگەوازەكەی عەبدوڵڵا ئۆجەلان، ڕێبەری زیندانیكراوی پەكەكە، بڕیاری هەڵوەشانەوەی هەیكەلی ڕێكخراوەیی دا، هەروەها بڕیاری كۆتایهێنان بە خەباتی چەكداری و هەموو ئەو چالاكییانەی دا كە بەناوی ڕێكخراوەكەوە دەكرێن.
لە دوای هەڵوەشانەوەی پەكەكە و جێهێشتن و چۆڵكردنی ئەو شوێنانە دەتوانین لە سەرچاوە سروشتییەكانی ناوچەی قەندیل لە هەرێمی كوردستان سوود وەربگرین بە ڕەخساندنی دەرفەتی نوێ بۆ یارییە وەرزشییەكان و بەرەو پێشچوونی سێكتەری گەشتیاری وەرزشی.
بێگومان نەمان و ڕاماڵینی چەك لە قەندیل دەرگا بە ڕووی ئەنجامدانی چەندین یاری وەرزشی لەم شوێنانە دەكاتەوە و گەشتیاری وەرزشی دەبوژێتەوە و خەڵكی ئەو دەڤەرە قازانجی مادی دەكەن، چونكە قەندیل بە یەكێك لە سەرنجڕاكێشترین ناوچە دڵگیرەكانی كوردستان دادەندرێت.
بە دڵنیاییەوە دوای جێهێشتنی و ڕۆیشتنی ئەم ڕێكخراوە، پەنتاییەكی زۆر و فراوان لە شاخەكان و ناوچە كوێستانییەكانی هەرێمی كوردستان چۆڵ دەبێت و جگە لە گەڕانەوەی گوند نشینان بۆ زێدی باب و باپیرانیان و ئەنجامدانی كاری كشتوكاڵی و ئاژەڵداری خۆیان، دەرفەتێكی نایاب و گرنگ لەبەردەم وەرزشوان و یاریزانەكان دەڕەخسێت بۆ پەرەپێدانی یارییە وەرزشییەكان و گەشتیاری وەرزشی لەم ناوچە دڵگیر و سەرنجڕاكێشانەی هەرێمی كوردستان، بەتایبەت ئەو ناوچانە بە هۆی سروشتی شاخاوی و بەفراوییان، زۆر لەبارن بۆ چەندین چالاكیی وەرزشی شاخەوانی و یارییەكانی زستانە.
بێگومان كەش و هەوای سارد و سەختی زستانی هەرێمی كوردستان و بوونی بەفر لە شاخەكانیدا ژینگەیەكی باش دەڕەخسێنێت بۆ یارییە وەرزشییەكانی خلیسكانێی سەربەفر “سكی و سنۆبۆرد” چونكە شاخ و بەرزاییەكانی ئەو ناوچانە گونجاون بۆ دروستكردنی گۆڕەپانێكی یاری سكی بە ستانداردی نێودەوڵەتی كە دەبێتە هۆكاری هاتنی چەندین یاریزانی جیهانی بۆ كوردستان، جگە لەمەش “پیادەڕۆیی لە ناو بەفر” یارییەكی دیكەیە و لە وەرزی زستان شاخەوان و یاریزانی زۆر دەتوانن ڕوو لە هەندێ شوێنی لەبار بكەن بۆ ئەنجامدانی ئەو یارییە، و دەتوانین بڵێین شاخەكانی هەرێم بە درێژایی ساڵ گونجاون بۆ شاخەوانی سەرەتایی تا شاخەوانی و پێشكەوتوو.
هەروەها ئەم ناوچە سنووری و شوێنە دڵفڕێنانەی كوردستان لەبار و ناوازەن بۆ یاری “پەڕەشووت و پاراگلایدەر” یاریزان و گەشتیاران دەرفەتی فڕینیان بۆ دەڕەخسێت لە چێژ بینین بەسەر دیمەنە سروشتییەكانی ئەو شوێنانە، جگە لەمەش دەتوانین یاری لێخوڕینی بایسیكڵ “ماونتن بایك” ئەنجام بدەین و ڕێڕەوی تایبەت بۆ بایسیكلسواری لە شاخەكان دروست بكەین لە چەند شوێنێكی سەلامەت.
لە كۆتاییدا بەكارهێنان و سوود وەرگرتن لەم ناوچە و شاخ و سەرچاوە سروشتییانەی هەرێمی كوردستان دەبێتە هۆی ڕەخساندنی هەلی كار بۆ دانیشتووانی ناوچەكە، ڕاكێشانی گەشتیاری ناوخۆیی و نێودەوڵەتی و بووژاندنەوەی گوندەكان و ئاوەدانكردنەوەیان، و ناوچە شاخاوییەكان دەبنە سەكۆیەكی گرنگ بۆ پەرەپێدانی وەرزش و گەشتیاری وەرزشی، بە پلاندانانی دروست و بە پشت بەستن بە كەسانی ئەكادیمی و شارەزا و سوودوەرگرتن لە ئەزموونی وڵاتانی پێشكەوتوو لە بواری وەرزشی شاخەوانی و زستانە هەرێم دەتوانێت ببێتە ناوەندێكی گرنگی وەرزشی و گەشتیاری لە ناوچەكەدا.