بە سەركەوتنی پرۆسەی ئاشتی ژیان بۆ سەدان گوند و ئاوایی ئیدارەی سۆران دەگەڕێتەوە

راپۆرت-زاری كرمانجی:
دوای خۆهەڵوەشاندنەوە و چەكدانان لە لایەن هێزەكانی پارتی كرێكارانی كوردستان (پەكەكە) چاوەڕێ دەكرێت بە سەدان گوندی ئیدارەی سۆران ئاوەدان ببنەوە و پڕۆژەی خزمەتگوزاریان پێ بگات.
لەدوای ڕاپەرێنی ساڵی 1991 واتە لە ماوەی 34 ساڵی ڕابردوودا شار و شارۆچكە و گوند و ناوچە سنوورییەكانی هەرێمی كوردستان، قوربانی دەستی پارتی كرێكارانی كوردستان (پەكەكە) بوونە، بەپێی بەدواداچوونەكانی زاری كرمانجی، تەنها لە ناوچە سنوورییەكانی ئیدارەی سەربەخۆی سۆران، بە هۆكاری بوونی پەكەكە و بۆردومان و تۆپبارانەكانی سوپای توركیا، تائێستا زیاتر لە 200 گوند ئاوەدان نەكراونەتەوە یان چۆڵكراون و خەڵكەكەی بۆ شار و شارۆچكەكان كۆچیان كردووە، جگە لە شەهید و بریندار بوونی هەزاران كەس، خەڵكی ئەو گوندانە بە سەركەوتنی پرۆسەی ئاشتی و بڕیاری چەكدانانی پەكەكە دڵخۆشن، بۆ ئەوەی ئارامی و ئاسایش بگەڕێتەوە بۆ گوند و ناوچەكانیان و پڕۆژەی خزمەتگوزارییان پێبگات”.
بەپێی زانیاری و ئامارەكان لە 34 ساڵی ڕابردوودا ئەو گوندانەی بەهۆی ڕەوشی سیاسی پەكەكە و سوپای توركیا چۆڵكراون، لە قەزای مێرگەسۆر 68 گوند، لە قەزای سیدەكان 118 گوند، لە قەزای چۆمان 15 گوند و لە قەزای ڕواندزیش 3 گوند چۆڵكراون، جگە لەوەی خەڵكی ئەو گوندانە لە گوند و ئاوایەكانی خۆیان نەماون، چەندین شوێنی گەشتیاری گرنگ دەكەونە ئەو ناوچانە، بۆیە بە نەمان و كشانەوەی سوپای توركیا، ئابووری و كەرتی گەشتیاری لە ئیدارەی سۆران زیاتر دەبووژێتەوە.
بەگوتەی بەرپرسانی ئەو ناوچانە، كە بۆ زاری كرمانجی قسەیان كردووە، داواكاری سەرەكی خەڵكی ئەو گوندانەی چۆڵكراون ئەوەیە پەكەكە بە تەواوەتی نەمێنێت، بۆ ئەوەی جارێكی دیكە بگەڕێنەوە سەر گوند و ئاوایەكانی خۆیان و دەست بە ژیانێكی نوێ بكەن و كاری ئاژەڵداری و جووتیاری بكەن، جگە لەوەی ئەو ناوچانەی چۆڵن بە دەیان شوێنی گەشتیاری و جوان و خۆشی لێیە دەبنە هۆكارێك كە ئەو ناوچانە زیاتر سەرنجی گەشتیاران بۆ ئیدارەی سۆران ڕابكێشین، هەروەها هەلی كار بۆ چەندین كەس دەڕەخسێت، بەتایبەتیش ئەو ناوچانەی سەر سنوورن”.
عەبدولباقی عیزەدین، دەرچووی بەشی ئابووری، بە زاری كرمانجی ڕاگەیاند: بوونی ئەمن و ئاسایش سەرچاوەی بووژانەوەی ئابوورییە، جا لە وڵاتێك یان شار و شارۆچكە و گوند و ناوچەیەك بێت، چونكە دانیشتووانی ئەو شوێنانە دڵنیان لە ئیش و كارەكانیان و ڕۆژانە بەبێ‌ ترس و دڵەڕاوكێ‌ كار و كاسبی و پڕۆژەی جۆراوجۆر ئەنجام دەدەن، بەمەش كاریگەری ڕاستەوخۆی دەبێت لەسەر بووژانەوەی ئابووری و گەشتیاری ناوچەكە و وڵات بەگشتی”.
ئەوەش دەخاتەڕوو: لە ناوچە سنوورییەكانی هەرێمی كوردستان بەتایبەتیش لە ئیدارەی سەربەخۆی سۆران و چەند شار و شارۆچكەیەكی دیكە، دەیان ساڵە بەهۆی ڕەوشی سەربازی و شەڕی نێوان توركیا و پەكەكە، ئەو ناوچانە بۆردومان و تۆپباران دەكرێن، لەم نێوانەدا سەدان گوند چۆڵكراون و خەڵكی سڤیل بەم هۆیەوە شەهید و برینداربوونە، ئەگەر پەكەكە چەك دابنێت و ئارامی و ئاسایش بۆ گوند و شار و شارۆچكە و ناوچە سنوورییەكانی بگەڕێتەوە، كاروانی خزمەتگوزاریان پێبگات و خەڵك گوندەكانیان ئاوەدان بكەنەوە، بەدڵنیاییەوە كاریگەری زۆری دەبێت لەسەر بووژانەوەی ئابووری لە زۆربەی سێكتەرەكاندا”.
ئاماژەی بەوەشدا: بەگەڕانەوەی هاووڵاتییان و ئاوەدانكردنەوەی ئەم گوندانە قەڕەباڵغی لەسەر شار و شارۆچكەكان كەم دەبێت، هەروەها بەرهەمی كشتوكاڵی و ئاژەڵداری بەشێوەیەك زیاد دەكات كە ئیتر پێویستیمان بەوە نەبێت لە وڵاتێكی دەرەوە بۆمان هاوردە بكرێت، لەڕووی تەندروستیشەوە كاریگەرە، چونكە كەش و هەوای ئەو گوندە سنووریانە پاك و تەندروست ترە بە بەراورد بە شار و شارۆچكەكان.