“سنوورەكەمان لەڕووی گەشتیارییەوە تایبەتمەندی زۆری هەیە”
دیدار-زاری كرمانجی
بەڕێوەبەری ناحیەی وەرتێ، لە دیدارێكی زاری كرمانجی تیشكدەخاتەسەر كار و پڕۆژە خزمەتگوزاریەكان و دەشڵێت: كۆمەڵێك پڕۆژەمان پێشكەشكردوون لە چاوەڕوانیداین بۆ ئەوەی ڕابگەیەندرێن و قۆناغ بە قۆناغ دەستبە جێبەجێكردنیان بكەین.
شۆڕش حەسەن، بەڕێوەبەری ناحیەی وەرتێ لە سنووری قەزای ڕواندز، بە زاری كرمانجی ڕاگەیاند: كاروانی كار و پڕۆژە خزمەتگوزارییەكانی حكوومەتی هەرێمی كوردستان، لە سەنتەری ناحیە و گوندەكانی سنوورەكەمان لە سێكتەرە جیاوازەكان بەردەوامیان هەیە، بۆ ئەمساڵیش كۆمەڵێك پڕۆژەمان پێشنیار كردوون، چاوەڕوانی ڕەزامەندی و دابینكردنی بودجەی پێویستین، بۆ ئەوەی ئەوانیش لە داهاتوودا بكەونە واری جێبەجێكردن و بكەونە خزمەت هاووڵاتییان”.
بەڕێوەبەری ناحیەی وەرتێ، گووتیشی: سەبارەت بە دروستكردنی پۆند لە پلان و بەرنامەدایە ئیدارەی سەربەخۆی سۆران ئامادەكاری دەكات و تیمێكی ڕاوێژكاریان نارد كە بریتی بوون لە چەند ئەندازیارێك شوێنەكەمان نیشاندان، بەهیواین كەوتبێتە قۆناغی دیزاین كردن بۆ شوێنەكە، چونكە زانیاری زیاتر لای تیمەكەیە، هەروەك دروستكردنی پۆندی كۆكردنەوەی ئاو زۆر بە پێویست و گرنگ دەزانین، چونكە لە چەندین ڕووەوە سوود و تایبەتمەندی دەبێت”.
شۆڕش حەسەن، بەڕێوەبەری ناحیەی وەرتێ، ئاماژەی بەوەشدا: لەگەڵ خاوەن كەپر و سەیرانگە و شوێنە گەشتیارییەكان لەڕێگەی سەرۆكایەتی شارەوانی وەرتێ و كۆمپانیای پاككەرەوە و كرێكارەكانی شارەوانی، دوای كۆبوونەوەیەكی بەرهەمدار، بڕیارمانداوە كرێكارەكانی شارەوانی كۆمپانیای پاككەرەوە، بۆ ئەوەی هەڵمەتێكی گشتگیر ئەنجام بدرێت، بۆ پاككردنەوەی سەیرانگە و ناوچە گەشتیارییەكانی سنوورەكەمان و هەروەها ڕووبار و كانیاوەكانیش، بەدڵنیاییەوە خەڵكەكەش هاوكارمان دەبێت لەم ڕووەوە، ئەوەش دەبێتە هۆكارێك بۆ زیاتر ڕاكێشانی گەشتیار بۆ سنوورەكەمان و بەڕێكردنی كەشێكی ئارام لە ناوچە گەشتیارییەكانی ناحیەی وەرتێ”.
ئەوەش دەخاتەڕوو: بەهۆی ئەوەی سنوورەكەمان گەشتیارییە و ساڵانە گەشتیارێكی زۆری ناوخۆی و شارەكانی عێراق و بیانی ڕووی تێدەكەن، بووەتە هۆكاری ئەوەی كە سێكتەری گەشتوگوزار بووژانەوەی باش بەخۆیەوە ببینێت، كە لە ئێستادا زیاتر لە 1000 كەپر و شوێنی گەشتیاری لە سنووری وەرتێ هەن، بەمەش هەلی كار بۆ ژمارەیەكی زۆری گەنجان و هاووڵاتییانی سنوورەكە ڕەخساوە، بۆ ئەمەش بە پێویست دەزانین بنكەیەكی گەشتوگوزاری لە ناحیەی وەرتێ بكرێتەوە، بۆ ئەوەش داواكاریمان پێشكەش كردووە، چونكە بە بوونی بنكەیەكی لەم شێوەیە دەتوانرێت زیاتر سەرپەرشتی ئەو شوێنە گەشتیاریانە بكرێت، چونكە ئێمە وەك حكوومەت تەنها چاودێرین بەسەر ئەو شوێنە گەشتیاریانە، ئەوان زیاتر پەیوەستن بە كەرتی تایبەتەوە”.
بەڕێوەبەری ناحیەی وەرتێ، دەشڵێت: بۆ چارەسەركردنی گرفتی كەمی ئاوی خواردنەوەی دانیشتووانی گوندی خانەقا، پڕۆژەیەكی ئاوی خواردنەوە لەبواری جێبەجێ كردندایە و كاركردن تیادا بەردەوامی هەیە و بە تەواوكردنی زیاتر لە 150 خێزان لێی سوودمەند دەبن، بەپێی ئەو بودجەیەی ساڵانە بۆمان تەرخان دەكرێت بەردەوام دەبین لەسەر ئەو جۆرە كار و پڕۆژانە و چارەسەركردنی كێشە و گرفتی كەمئاوی دانیشتووانی سنوورەكەمان”.
سەبارەت بەو گوندانەش كە بەهۆكاری سەربازی ئاوەدان نەكراونەتەوە، شۆڕش حەسەن، ئەوە دەخاتەڕوو: “سنوورەكەمان سەنتەری ناحیە و 18 گوند لەخۆدەگرێت، لەگەڵ ئەوەشدا شوێنێكی ستراجییە و هاوسنوورە لەگەڵ ئیدارەی ڕاپەڕین، بۆیە گرنگە بایەخی زیاتری خزمەتگوزاری بە سنوورەكان بدرێت، بە چاككردنی ڕێگا و بانەكان و خزمەتگوزاری جۆراوجۆر، هەروەك بەرنامە و پلانەكانمان بەردەوام بووە لەم ڕووەوە، هەروەك زۆربەی گوندەكانمان ئاوەدانن تەنها گوندی كوزینە دوای ئەوەی لەلایەن فڕۆكەكان بۆردومانكرا بەهۆیەوە ئاوەدان نەكراوەتەوە، هەروەها لە گوندی زارگەلی بەهۆی بۆردومان كردنیان خەڵكانێك بوونە شەهید و قوربانی و بریندار بوون.
