سەرۆكی حكومەت و هەرێم بە بانگهێشتنامەی فەرمی گەیشتنە ئەمریكا و ئێران
” پرسی كورد ناكرێت لە ڕێگەی شەڕ و خوێنڕشتنەوە چارەسەر بكرێت”
زاری كرمانجی :
ئێوارەی رۆژی شەممە مەسرور بارزانی، سەرۆكی حكوومەتی هەرێمی كوردستان لەسەر بانگهێشتی حكوومەتی ئەمەریكا گەیشتە واشنتن و كۆمەڵێك دیدار و كۆبوونەوەی گرنگی لەگەڵ بەرپرسانی ئەو وڵاتە ئەنجامدا، هەمان ڕۆژ سەرۆكی هەرێمی كوردستانیش گەیشتە كۆماری ئیسلامی ئێران.
بەگوێرەی بەرنامەی كاری سەردانەكەی، مەسرور بارزانی سەرۆكی حكوومەتی هەرێمی كوردستان كە بە یاوەری شاندێكی باڵا چووەتە ئەمەریكا، زنجیرەیەك دیدار و كۆبوونەوە لەگەڵ بەرپرسانی باڵای حكوومەتی ئەمریكا و كۆنگرێس ئەنجامداوە.
بەپێی زانیاریەكانی زاری كرمانجی، گفتوگۆكانی مەسرور بارزانی لەگەڵ بەرپرسانی ئەمەریكا چەند تەوەرێك لەخۆ دەگرێت و سەرەكیتینیان بریتی دەبن لە “پتەوكردن و پەرەپێدانی زیاتری پەیوەندیی و هاوبەشی ستراتیژی نێوان هەرێمی كوردستان و ئەمەریكا و تاوتوێكردنی دوایین گۆڕانكاری و پێشهاتەكانی دۆخی گشتیی عێراق و ناوچەكە”.
لەو سەردانەیدا بۆ ئەمەریكا، بڕیارە مەسرور بارزانی لەگەڵ وەبەرهێنەران و خاوەنكارانی ئەمەریكی گفتوگۆ لەبارەی پەرەپێدانی پەیوەندیی ئابووری و بازرگانی بكات. هەروەها سەرۆكی حكومەت، بەشداریی لە گفتوگۆیەكی تایبەتی كۆڕبەندی وزە لە واشنتن دەكات بە ناونیشانی “داهاتووی وزە لە هەرێمی كوردستان” و تیایدا روانین و دیدگای هەرێمی كوردستان بۆ پەرەپێدانی كەرتی وزە دەخاتە ڕوو و و تیشك دەخاتە سەر دەرفەتەكانی وەبەرهێنان لەم كەرتەدا.
لەلایەكی دیكەوە، نێچیرڤان بارزانی سەرۆكی هەرێمی كوردستان سەردانی كۆماری ئیسلامی ئێرانی كردووە، لە نێوكۆبوونەوەكەدا وتارێكی پێشكەشكرد و ڕایگەیاند:” پرسی كورد ناكرێت لە ڕێگەی شەڕ و خوێنڕشتنەوە چارەسەر بكرێت، دڵشاد شەهاب ڕاوێژكاری سەرۆكی هەرێمی كوردستان، لە كۆنگرەیەكی ڕۆژنامەوانیدا ئامانجی سەردانەكەی نێچیرڤان بارزانی بۆ كۆماری ئیسلامی ئێران، ئاشكراكرد و ڕایگەیاند:” سەردانەكەی بەڕێز نێچیرڤان بارزانی بۆ ئێران بە مەبەستی چەند پرسێكی پەیوەست بە هەرێمی كوردستانە، دیارترینیان پتەوكردنی پەیوەندی نێوان هەرێمی كوردستانە لەگەڵ ئێران.
ڕاوێژكاری سەرۆكی هەرێمی كوردستان، دووپاتی كردەوە” لە دیداری سەرۆكی هەرێمی كوردستان لەگەڵ سەرۆك كۆماری ئێران و سەرۆكی پەرلەمان و وەزیری دەرەوەی ئێران و بەرپرسە باڵەكانی ئەو وڵاتە، جەخت لەوەكراوە هەرێمی كوردستان لە پرسە نێوخۆی و نێودەوڵەتییەكان بەرپرسیارانە مامەڵەی كردووە و هاوسەنگی خۆی پاراستووە”.
سەرۆك بارزانی لە بارەی پەیوەندییەكانی عێراق لە گەڵ هەرێمی كوردستان، ڕایگەیاند:” ئەگەر شەراكەت لەعێراق پەیڕەونەكرێت و كار بە دەستوور نەكرێت تەسەوڕ ناكەم دۆخی عێراق سەقامگیر ببێت.
سەرۆك بارزانی، لە نێو وتارێكیدا دووپاتی لەوەكردەوە، پێویستە لەم قۆناغەدا پابەندبوون بە دەستوری عێراق ڕابگەیەنرێت و ئەگەر نەگەڕێنەوە بۆ دەستور دۆخی عێراق سەقامگیر نابێت، هەر لایەنێكیش بیەوێت كاری بە زۆرینە بكات لە عێراق سەرناگرێت.
سەرۆك بارزانی گووتیشی”ڕەفتار بەغدا لەبارەی موچەوە چیتر قابیلی قبوڵكردن نییە و من ئەمە بە ئیهانە بە خوێنی شەهیدان و مێژوی ئەم وڵاتە دەزانم”.
