هیوا سەید سەلیم
ئەگەر ژمارە و ئاستی بەشداری سەرۆك و پادشای وڵاتانی عەرەبی پێوەر بێت بۆ بەشداری لە ٣٤مین كۆبوونەوەی لوتكەی بەغدا كە ڕۆژی شەمە ١٧ ئایاری ٢٠٢٥ لە بەغدا بەسترا، ئەوا دەتوانین بڵێن لوتكەیەكی شكست خواردوو بووە و بەشی زۆری ئۆباڵی ئەو شكستەش جگە لە پەرتەوازەی سەرانی عەرەب بە شكست بۆ دبلۆماسیەتی عیراق هەژماردەكردێت كە زیاتر لە مانگێكە ئامادەباشی بۆ ئەو لوتكەیە دەكا.
كێ بوون ئەوانەی لە ئاستی بەرپرسی یەكەم لەم لوتكەیە ئامادەبوون:
لە كۆی٢٢ دەوڵەتی عەرەبی تەنیا ٤ دەوڵەت لە ئاستی بەرپرسی یەكەم لوتكەی بەغدا ئامادەبوون بە عێراقەوە بوون بە پێنج وەڵات ئەوانیش:
(میسر، سوماڵ، فەلەستین، قەتەر) میری قەتر لە نێو ئەو چوار سەرۆكە تا كاتی پێشكەشكردنی ووتارەكانیش لە كۆبوونەوەكە نەمایەوە بگرە دیدارەكەی جێهێشت، دیارە ئەویش وای لێكداوەتەوە ئامادەبووانی لوتكەی بەغدا لە ئاستی هاوشانی ئەو نین، جگە لەوەی هەڵەیەكی دبلۆماسی زەقی بەرامبەر كراوە كاتێك لە دیداری لەگەل سودانی لە شوێنی ئاڵای قەتەری ئاڵای بەحرین لە پشتی داندرا بوو.
تەنانەت هەریەك لەم وڵاتانە لەسەر ئاستی سەرۆك وەزیرانیش ئامادەی لوتكەكە نەبوون.
(سعودیە، كوێت، ئیمارات، یەمەن، سوریا)
هەریەك لە ئوردن و لوبنان لە ئاستی سەرۆك وەزیران كۆبوونەوە.
شایانی باسە كۆبوونەوەی لوتكەی پێشوتر كە لە شانیشینی بەحرێن ساڵی ٢٠٢٤ سازكرابوو ١٠ سەرۆك و پاشا لە كۆی ٢١ و باقی ئەوانی دیكە لە ئاستی سەرۆك وەزیران و وەزیری دەرەوە ئامادەی لوتكە كە بوو بوون.
هۆكارەكانی ئەو بایكۆتكردنەی سەرۆكەكان بۆ لوتكەی بەغدا:
ـ لوتكەكە هاوكات بوو لەگەڵ سەردانێكی دونالد ترەمپ بۆ رۆژهەڵاتی ناوەڕاست ئەمەیان كاریگەری لەسەر لوتكەكە دانا، هەست دەكرێت ترەمپ بیەوێت دۆسیەی ئەو ناوچەیە ڕادەستی بەرەی سعودیە و ئیمارات بكات، كە هەردوو وڵات لە ئاستی نزمتر لە سەرۆك ئامادەی لوتكەی بەغدا بوون.
ـ نەبوونی كۆدەنگی عەرەبی لەمەڕ ڕووداوەكان بە تایبەت لە پرسی غەزە.
ـ هەڵوێستی دەوڵەتی قوڵ لە عێراق دژ بە ئامادەبوونی ئەحمەد شەرع سەرۆكی كۆماری ڕاگوزەری سوریا.
ـ فشاری ناوخۆی جەزائیر بۆ ئامادەنەبوونی سەرۆكەكەیان لە لوتكەی بەغدا بەتایبەت هەڵمەتی هاشتاكی «بەشدار مەبە سەرۆك»
لە كۆتایدا دەڵێن عێراق پارەیەكی زۆری بۆ ئامادەكاریەكانی لوتكەی بەغدا تەڕخانكرد و دەنگ و دۆرێكی زۆری میدیایی بۆ لێدا بەڵام لوتكەی بەغدا ئەوە نەبوو كە لێی چاوەڕان دەكرا، ئەوەشیان بە شكست بۆ دبلۆماسیەتی عێراق دەشكێتەوە.
