ئەمساڵ گۆڕانكاری لە شێوازی بەڕێوەبردنی هۆڵەكان كراوە

مستەفا دۆلەمەری- زاری كرمانجی:
مامۆستا وڵات عوسمان، بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، لە دیدارێكدا لەگەڵ هەفتەنامەی زاری كرمانجی ئاشكرای كرد: ئەمڕۆ پێنج شەممە كە دەكاتە 15ی ئەم مانگ تاقیكردنەوەكانی نیشتمانی پۆلی نۆیەم دەكرێن، لە سنووری ئیدارەی سەربەخۆی سۆران بە شەش قەزا ٦٨٤٠ قوتابی لە 170 هۆڵ تاقیكردنەوەكان ئەنجام دەدەن. دەشڵێ: ئەمساڵ گۆڕانكاری لە شێوازی بەڕێوەبردن كراوە، یاریدەدەری قوتابخانەكان لە قوتابخانەیەكی دیكە دەبنە بەڕێوەبەری هۆڵەكان، بۆ ئەو مەبەستە هەموو ئامادەكاریەك كراوە و بە هیواین تاقیكردنەوەكان بێ كێشە بكرێن و قوتابییەكانیشمان ئەنجامێكی باش و دڵخۆشكەر بە دەست بهێنن.
بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، گوتی: بەڕێوەبەری هۆڵەكان و چاودێرەكان دەستنیشان كراون و هیچ گرفتێكمان لەو بارەیەوە نییە، دەتوانین بڵێین لە سنووری ئیدارەی سەربەخۆی سۆران سەرجەم پێداویستیی تاقیكردنەوەكان، كە خۆی لە دابینكردنی هۆڵ و دانانی سەرپەرشتیار و مامۆستا بۆ هۆڵەكان و پێداویستی قوتابییان دەبینێتەوە بەشێوەیەكی زۆر باش دابینكراون.
مامۆستا وڵات عوسمان، بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، گوتیشی: لە سنووری بەڕێوەبەرایەتی گشتی پەروەردەی سۆران، واتە بە هەر شەش قەزا، زیاتر لە 500 قوتابی دەرەكی پۆلی نۆ هەنە و ڕۆژی پێنج شەممە لەگەڵ قوتابییانی ئاسایی تاقیكردنەوەكانی نیشتمانی پۆلی نۆیەم – خولی یەكەم ئەنجام دەدەن و دابەشكراون بەسەر هۆڵەكانی تاقیكردنەوە.
بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، دەشڵێت: ڕۆژانە تاقیكردنەوەكان كاتژمێر ٨:٠٠ی بەیانی دەستپێدەكەن، لەگەڵ هەموو قوتابخانە حكومی و ناحكوومی و ئێواران و خوێندنی خێرا، قوتابییانی دەرەكی، بەپێی ئەو خشتەی كە لە وەزارەتی پەروەردە دانراوە، ئەگەر ڕۆژێك تاقیكردنەوە بەر پشووی فەرمی كەوت، ئەوا تاقیكردنەوەی ئەو ڕۆژە دەچێتە ڕۆژی دواتر و بەهەمان زنجیرە بەردەوام دەبێت.
بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، ئاماژەی بەوەشدا: تاقیكردنەوەكانی پۆلی نۆیەم قۆناغێكی گرنگە لە سیستەمی خوێندنی ناوەندی، كە لە كاتی تەواوبوونی قۆناغی ناوەراست ئەنجام دەدرێت و بۆ دیاریكردنی ئاست و ئامادەیی قوتابی بۆ قۆناغی داهاتوو، دەبێتە هۆی ئەوەی قوتابییان بەشێوەیەكی دادپەروەرانە دەربچن و بچنە قۆناغی ئامادەیی، بۆ ئەو مەبەستە قوتابییان ئاشناكراون بە پەڕەی سۆما و گشتاندن كراوە و تاقیكردنەوەی ئاشنابوونیان پێ كراوە لە سەرجەم ناوەندەكانی خوێندن.
مامۆستا وڵات عوسمان، بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، ئەوەشی خستەڕوو: ڕێنمایمان بۆ قوتابییانی پۆلی 9 ئەوەیە لە كاتی ئەنجامدانی تاقیكردنەوەی نیشتمانی بەشێوەیەكی ئاسایی ئەنجام بدەن و بەبێ ترس و دڵەڕاوكێ، چونكە تاقیكردنەوەی نیشتمانی، هەموو كاتێك ترسێكی لای قوتابییان هەیە، بەڵام هەمان مەنهەجی خوێندنی خۆیەتی و هەمان ستافی مامۆستایانی خۆیان سەرپەرشتیان دەكەن جگە لە بەرێوەبەری هۆڵەكان نەبێت، بۆیە پێویست ناكات دڵەڕاوكێیان هەبێت لە تاقیكردنەوەكان و بترسێن لە وەڵامەكانیان، داوادەكەین قوتابییان ئەو ماوەیە خۆیان بە دووربگرن لەسەرجەم ئامێرە ئەلیكترۆنییەكان و تۆڕەكۆمەڵایەتیەكان، بۆ ئەوەی بتوانن نمرەیەكی باش بە دەستبهێنن و ئەو ئامانجەی كە هەیانە بەشێوەیەكی ڕێكوپێك بەدەستی بهێنن.
لە كۆتای قسەكانیدا، مامۆستا وڵات عوسمان، بەرپرسی تاقیكردنەوەكان لە بەڕێوەبەرایەتی گشتی پەروەردەی سۆران، هێمای بۆ ئەوەكرد، هەموو ئامادەكاریەك كراوە، ئەوەش بە هەماهەنگی لەگەڵ پەروەردەی قەزاكان بۆ ئەوەی بتوانین هۆڵێكی گونجاو و سەرجەم پێداویستییەكانی هۆڵی تاقیكردنەوە دابین بكەین بۆ قوتابییان، تاوەكو قوتابییان بتوانن لە كەشێكی ئارام و بە دەروونێكی دروست و بێ دڵەراوكێ تاقیكردنەوەكانیان ئەنجام بدەن.