هاووڵاتییانی ناحیەی سرێشمە خوازیارن فەرمانگەكانی میری لە شارۆچكەكەیان بكرێنەوە

• “لە ئایندەیەكی نزیكدا بەڕێوەبەرایەتی ناحیە و بنكەی پۆلیس دەكرێنەوە”

ڕاپۆرت-زاری كرمانجی
دانیشتووانی ناحیەی سرێشمە خوازیارن لە داهاتوویەكی نزیكدا بەڕێوەبەرایەتی ناحیە و ئەو فەرمانگانەی كە پێویستن لە سەنتەری شارۆچكەكە بكرێنەوە، قایمقامی قەزای خەلیفانیش، دەڵێت: بەجددی كار لەسەر ئەمە كراوە و لە داهاتوویەكی نزیك بەڕێوەبەرایەتی ناحیە و بنكەی پۆلیس لە سەنتەری ناحیەكە دەكرێنەوە و دەكەونە حزمەت هاووڵاتییان.
سۆران شێرزاد، سەرۆكی شارەوانی سرێشمە، بە زاری كرمانجی گووت: تا ئێستا جگە لە سەرۆكایەتی شارەوانی، سەرباری بڕیاری بە ناحیەبوونی سرێشمە، فەرمانگە و بەڕێوەبەرایەتییەكی میری لەم شارەدێیە نەكراوەتەوە، بۆیە ناچارین شان وەبەر ئەو گرفتانەش بدەین، كە لە سێكتەرە جیاوازەكانی تریش لە سرێشمە دروست دەكرێن، بەڵام جگە لەمە گەورەترین گرفتی ئێمە وەكو شارەوانی سرێشمە، نەبوونی میلاكی پێویست و پسپۆڕی تایبەتە، لەوانە نەبوونی ئەندازیار و فەرمانبەری ڕووپێو و بەشی یاسایی، سەرباری ئەوەی كە بۆ هەر كارێك و دوای ئاگاداركردنەوەی بەڕێوەبەرایەتی گشتی شارەوانییەكانی سۆران، بە سوپاسەوە هاوكاری كراوین، بەڵام ئاشكرایە كە زۆر پێویستە هەر شارەوانییەك ئەو پسپۆڕانەی هەبێت، بە پێچەوانەوە لە ئەگەری نەبوونیان كەم كوڕی و گرفتی زۆر دروست دەبێت”.
دەشڵێت:” نەبوونی ماستەرپلان بەربەستی گەورەی هێناوەتە پێش و ناتوانرێت وەكو پێویست كارەكان ئەنجام بدرێت، بەڵام خۆشبەختانە كابینەی نۆیەمی حكوومەتی هەرێمی كوردستان لەسەر ڕاسپاردەی مەسرور بارزانی سەرۆكی حكوومەت، لەلایەن وەزیری شارەوانی بڕیاری دانانی ماستەر پلان بۆ ژمارەیەك شارەوانی و دروستكردنی نەخشەی كەرتی بۆ بەشێكی تریان و فراوانكردنی سنووری گوندەكان دەرچووە، لە ئێستادا لە سەرۆكایەتی شارەوانیمان بە هەماهەنگی لەگەڵ سەرجەم بەشە پەیوەستدارەكانی بەڕێوەبەرایەتی گشتی شارەوانییەكانی سۆران، سەرقاڵی دانانی نەخشەیەكی كەرتیین و خۆشبەختانە هەنگاوی باشمان ناوە و لە قۆناخی كۆتایداین، كە بەو هۆیەوە كێشەی زەوی و زار و بەرپێگرتنی زێدەڕۆیی بەڕێژەی لە 100% چارەسەر دەبێت”.
ئاماژەی بەوەشدا:”هەوڵەكانی ئیدارە و قەزای خەلیفان و سرێشمە بەردەوامن بۆ كردنەوەی فەرمانگە و بنكە و دام و دەزگای پێویست لە سەنتەری شارۆچكەی سرێشمە، بێگومان ئەمەش قۆناغ بە قۆناغ جێبەجێ‌ دەكرێت، هەروەك ئامانجی سەرەكی حكوومەتی هەرێمی كوردستان، خزمەتكردن بە هاووڵاتییان لە پێشینەی كارەكان بووە.
مەغدید عەریف ئەحمەد، قایمقامی قەزای خەلیفان، بە زاری كرمانجی ڕاگەیاند:”دوای ئەوەی بە بڕیاری مەسرور بارزانی، سەرۆكی حكوومەتی هەرێمی كوردستان، سرێشمە كرا بە ناحیە، هەنگاوەكان بەردەوامن بۆ زیاتر پێشكەشكردنی خزمەتگوزاری بە هاووڵاتییان و كردنەوەی ئەو فەرمانگە و بنكە و دام و دەزگا حكوومیانەی كە پێویست بۆ ئەو شارۆچكەیە”.
قایمقامی قەزای خەلیفان، گووتیشی:”بەهۆی گرفتی بینایە بەڕێوەبەری ناحیە لە قایمقامییەتی خەلیفان دەستبەكاربووە، بەڵام خەریكی ئامادەكارین و بینایەك دەستنیشان كراوە و كاری لەسەر دەكرێت و لە ماوەیەكی نزیكدا بەڕێوەبەرایەتی ناحیە لە سەنتەری ئەو شارۆچكەیە دەكرێتەوە و بەڕێوەبەری ناحیە لەوێ‌ دەستبەكار دەبێت و بكەی پۆلیسی سرێشمەش لەگەڵی دەكرێتەوە”.
دەربارەی كردنەوەی فەرمانگەكانی دیكە لەو شارۆچكەیە مەغدید عەریف ئەحمەد، ئاماژەی بەوەشدا:”لە ئێستادا سەرۆكایەتی شارەوانی و بنكەی ئاوی سرێشمە كە دوو فەرمانگەی گرنگن لە سەنتەری ناحیەی سرێشمە كراونەتەوە، لە داهاتووشدا قۆناغ بە قۆناغ ئەو بنكە و فەرمانگانەی كە پێویستن دەكرێنەوە و دەكەونە خزمەت دانیشتووانی سنوورەكە.