هونەرمەند ئەستێرە حەمەد: هونەر باشترین دەلیڤەیە بۆ ئاسایی بوونەوە

“پێشنیار دەكەم ئافرەتان لە بواری گەشتیاری كار بكەن”

ئەستێرە غازی حەمەد، لە دایكبووی ساڵی 1997ە، ئەكادیمیای كۆلێژی هونەرە جوانەكانی تەواو كردووە، وەك خۆی دەڵێت: قۆناغی خوێندنی سەرەتایی و ئامادەی لە چۆمان تەواوكرد، بۆ تەواوكردنی خوێندنی كۆلێژیش رووی لە شاری هەولێر كردووە، تا ئێستا لەوێ ماوەتەوە، لە چەند بوارێكی جیاواز كاری كردووە، ئێستا بەردەوامە لە كاركردن و لە پەنای كارەكانیشیەوە كاری هونەری دەكات.
زاری كرمانجی لەبەسەر كردنەوەی ئەم خاتوونە هونەرمەند و چاڵاكە، شێوازی كاری هونەری وێنەكێشی كردە دەروازیەك بۆ گفتووگۆكان، ئەستێرە لەمبارەوە گووتی ” ئەم شێوازە كارە هونەرییەی دەكەم پێی دەڵێن هونەری مۆدێرن، كە پێك دێت لە چەند جۆرە ستایل، بۆ نموونە پێرفۆرمانس، ڤیدیۆو ئارت، ئنستڵەیشن”.
وێنەكێشی هونەرێكە دەتواندرێت لە رێگەیەوە خستنەڕووی بابەتی هەستیار و هەڵگری پەیام بێت، زۆرن ژنە هونەرمەندی جیهانی بە یەك وێنە پەیامی گەورە و قوڵیان پێبووە، ئەم خاتوونە لەمبارەوە دەڵێت” بە دڵنیاییەوە، زۆر هونەرمەندی ئافرەتی بەتوانامان هەن، توانیویانە لە ڕێگەی تابلۆ و كارە هونەرییەكانیان بگەنە ئاستێك كە بتوانن گۆڕانكاری لە شێواز و ڕێچكەی هونەردا بكەن، كارەكانیان پەیامێكی قوڵیان هەبێت”.
هونەر ئەوەندەی بەهرە و توانای جەستە و شێوازی بیر كردنەوەیە هێندەش پەیوەندی بە بابەتی روحی و دەروونییەوە هەیە، زۆرجار مرۆڤ بۆ دوور كەوتنەوە لە خەم و كێشەكانی رۆژانە پەنا بۆ بوارەكانی هونەر دەبەن، بەو مانایەی هونەر لە خەمەكان دووریان دەخاتەوە، خاتوو ئەستێرە، لەم روانگەیەوە گووتی ” بە دڵنیایەوە نەك تەنها وێنە كێشان، بەڵكو هەموو بابەتەكانی دیكەی هونەر زۆربەی جار وەك چارەسەرێكی دەروونی وان، دەتوانێت چێژیان لێ ببینێت ، ناخ، هەست و دەربڕینەكانی لە ڕێگەی هونەرەوە ئاسوودە بكات و بەتاڵا ببێتەوە، لە هەموو دڵەڕاوكێیانەی بەهۆی ژیانی رۆژانە بەرۆكی گرتوون، لەبەر ئەوەی مرۆڤ بوونەوەرێكی كومەڵایەتییە، ئەمەش وادەكات رۆژانە رووبەڕووی ئاڵەنگارییە جیاكان ببێتەوە و كێشەیەك یەخەی بگرێت، هونەر باشترین دەلیڤەیە بۆ ئاسایی بوونەوە “.
ئەستێرە حەمەد، پێی وایە ئێستا ئاستی هونەری لە كوردستان تا ئاستێكی باش گەشەی كردووە و دەڵێت ” هونەری وێنەكێشان یا هونەری شێوەكاری لە كوردستاندا تا ڕادەیەكی باش بەرەو پێش چووە، زۆر هونەرمەندیشمان هەن، چوونەتە ئاستێكی جیهانی و توانیویانە شانبەشانی هونەرمەندە جیهانییەكان كار بكەن، ئەمەش نیشانەی هەست و خواستی كوردە بۆ كارەكانی هونەری، بەدڵنیاییشەوە بۆ داهاتوویەكی نزیك هونەرمەندە كوردەكان لە ئاستی نێوەدەوڵەتی دەدەرەوشێنەوە”.
بۆ باشتر كردنی هونەری وێنە كێشان ئەم خاتوونە بە دەسترەنگین روونیكردەوە” خودی كاركردنی هونەرمەندان لەسەر بابەتی شێوەكاری وادەكات هونەرمەندا پێش بكەون، لەهەمانكاتدا هەموو لایەنێكی هونەری و هونەرمەندێك پێویستی بە هاوكاری دەورووبەر، حكومەت، ڕێكخراوەكان و لایەنە پەیوەندیدارەكان هەیە، ئەمە وادەكات پشتگیری بۆ هونەرمەندان زیاتر بێت و هانیان بدات گرینگی بە كارە هونەرییەكانیان بدەن”.
مێینە و ژینگە لە ناو كارەكانی ئەم هونەرمەندە رەنگدانەوەیەكی بەرچاوی هەیە، ئەستێرە لەمبارەوە گووتی ” ژینگە و ژن دووبابەتی سەرەكی ئیشەكانم بوونە، بەتایبەت ژینگە، توانیومە چەندین پڕۆژەی جیاواز بكەم لەم بوارە، بۆ نموونە دووبارە بەكارهێنانەوەی كەرەستەكان و بۆ ئەوەی وەكو كەمپینێك بەكاریان بهێنمەوە بۆ هۆشیاركردنەوەی خەڵك”.
ئەستێرە، وەك ئافرەتێكی چاڵاك لە پەنای كاری هونەری، وەك ڕێبەری گەشتیاریش ڕۆڵێكی بەرچاوی هەیە ئەو لەمبارەیەوە روونكردنەوەی دا و گووتی” كاری ڕێبەری وەك تەواوكەرێك بۆ كاری هونەریم دەبینم، توانیومە بیكەمە ئیشێكی سەرەكی لە ژیانم، بەڵام وەك هەمیشە هونەرەكەم بەشێكە لە ژیانم، هەموو كات لەگەڵمە، سروشت و مێژووی كوردستان بەگشتی جوگرافیای ناوچەكەمان زۆر كاریگەری هەبووە لەسەرم، ئەمەش وایكرد كارێ بكەم زیاتر قوڵ ببمەوە لە شوناسی خۆمان”.
لە كۆتایی قسەكانیشدا هونەرمەند و ڕێبەری گەشتیاری ئەستێرە حەمەد گووتی ” گەشتیاری لە كوردستاندا بەرەوپێش چوونێكی یەكجار باشی بەخۆوە بینیوە، لە چەند ساڵی داهاتوو زیاتریش بەرەوپێش دەچێت، بەهۆی گۆڕانی كەش و هەوا و هەڵكەوتەی ناوچەكەو سروشتە تایبەتەكەی، لەبەر ئەوەی چەند شوێنێكی تایبەت و جیاواز لێرە هەڵكەوتوون بۆ نموونە بەرزترین شەلال لەسەر ئاستی عێراق، بەرزترین لوتكە چیا لەسەر ئاستی عێراق، ئەمانە وایكردووە كوردستان لە ڕووی گەشتیارییەوە بكرێتەوە بەڕووی جیهاندا و خەڵكێكی زۆری بیانی ڕوو لە ناوچەكە بكەن، پێشنیار دەكەم ئەو ئافرەتانەی حەز دەكەن لە بواری گەشتیاری كاربكەن خۆیان بەرەو پێش ببەن و نەوەستن”.