دیدار-محەمەد هەسنانی
مامۆستایەكی زانكۆی سۆران، لە دیدارێكی هەفتەنامەی زاری كرمانجی دا دەڵێت:” دروستكردنی بەربەست لەبەردەم هەناردەكردنی نەوتی هەرێم و بەربەست لە بەردەم شایستە داراییەكان و مووچەی مووچەخۆرانی هەرێمی كوردستان، نەك تەنها ڕێوشوێنێكی ئابوورییە، بەڵكو چەندین ئامرازی سیاسیی لە پشتە و بەردەوامی ئەم سیاسەتە ئابوورییەی كاربەدەستانی حكوومەتی فیدراڵی مەترسیی گەورەتركردنی پارچە پارچە بوونی سیاسی و نامۆكردنی هاوبەشێكی سەرەكی لە چوارچێوەی سیاسی عێراقدا هەیە.
لە بەردەوامی قسەكانیدا دكتۆر نیار محیەددین حەمەدئەمین، مامۆستا لە زانكۆی سۆران، ڕاگەیاند:” ئەو فشارە ئابوورییە بەردەوامانەی حكوومەتی عێراق بەرامبەر حكوومەتی هەرێمی كوردستان دەیكات، دەكرێت وەك بەشێك لە ستراتیژییەكی فراوانتر لێكبدرێتەوە كە ئامانج لێی ناوەندكردنی دەسەڵات و سنوورداركردنی دەسەڵاتەكانی حكوومەتی هەرێمی كوردستانە كە لە دەستووری عێراقی ساڵی ٢٠٠٥ گەرەنتی كراوە، بۆ نموونە دواكەوتنی بەردەوامی خەرجكردنی مووچە بۆ فەرمانبەران و شایستە داراییەكانی هەرێمی كوردستان، لەگەڵ دروستكردنی بەربەست لەبەردەم هەناردەكردنی نەوتی هەرێمی كوردستان، نەك تەنها ڕێوشوێنێكی ئابوورییە، بەڵكو چەندین ئامرازی سیاسیی لە پشتە”.
ئەو مامۆستایەی زانكۆی سۆران، گووتیشی:” ئەم ڕەفتارانەی كاربەدەستانی حكوومەتی عێراق بەشێوەیەكی بەرچاو دیارە كە دەیانەوێت سەقامگیری و توانای حوكمڕانی حكوومەتی هەرێم لە ئاستی ناوەخۆ لاواز بكەن و لە ئاستی دەرەوەش هەموو پەیوەندییە سیاسی و دبلۆماسییەكانی حكوومەتی هەرێمی كوردستان سنورداربكەن، چونكە وەك دیارە لە ئێستادا دامەزراوە و ئەكتەرە سیاسییەكانی هەرێمی كوردستان ڕۆڵێكی گرنگ دەگێرن لەو هاوكێشە سیاسی و داینامیكانەی كە لە ناوچەكەدا ڕوودەدەن، بەتایبەت لە بابەتەكانی ئاشتی، ئاسایش، سەقامگیری و پێكەوەژیان، بۆیە ئەم فشارانەی حكوومەتی فیدراڵی نیگەرانییەكی جددی لەبارەی جێبەجێكردنی دادپەروەرانەی دەستووری عێراق دروست دەكات، هەروەها ئەم ڕەوتە دژایەتییەكی ئاشكرایە لە ڕۆحی فیدراڵیزم و زیان بە بناغەكانی سیستەمی فیدراڵی دەگەیەنێت”.
دەشڵێت:” بەردەوامی ئەم سیاسەتە ئابوورییەی كاربەدەستانی حكوومەتی فیدراڵی مەترسیی گەورەتركردنی پارچە پارچە بوونی سیاسی و نامۆكردنی هاوبەشێكی سەرەكی لە چوارچێوەی سیاسی عێراقدا هەیە، چونكە حكوومەتی هەرێم ڕۆڵی سەقامگیركەری لە عێراقی دوای 2003 گێڕاوە و هەم لە ئاسایشی ناوخۆ و هەم لە دیپلۆماسی ناوچەیی بەشدار بووە، بۆیە پەراوێزخستن و بەردەوامی فشارە ئابوورییەكانی حكوومەتی فیدراڵی هەڕەشەیەكی جددییە بۆ سەر یەكگرتوویی و سەقامگیری دەوڵەتی عێراق”.
ئەو مامۆستایەی زانكۆ، ئەوەش دەخاتەڕوو:”پێویستە حكوومەتی فیدراڵی گفتوگۆی ڕاستەقینە لەگەڵ حكوومەتی هەرێم بكات، لەسەر بنەمای ڕێزگرتن و پابەندبوون بە بڕگە دەستووریەكان، بۆ ئەوەی متمانە بەهێز بكرێت و بتوانرێت پەرە بە سەقامگیری سیاسی و ئابووری و كۆمەڵایەتی درێژخایەن بدرێت و پارێزگاری لە پاراستنی پرەنسیپە سەرەكییەكانی فیدراڵیی لە دەستووری عێراقدا بكرێت، ئەمەش دەبێتە گەرەنتیەكی بەهێز بۆ ئاشتی و حوكمڕانی دیموكراسی و دابەشكردنی دادپەروەرانەی سەرچاوەكان لە نێوان هەموو پێكهاتەكانی عێراق.
