خالد شماڵا وتەبێژی وەزارەتی سەرچاوە ئاوییەکانی عێراق بە رۆژنامەی شەرقلئەوسەتی راگەیاندووە” لە مێژووی عێراقدا کەمبوونەوەی ئاو بەم شێوەیە روینەداوە، لەسەدا ٧٠ی ئاوی عێراق لە دەرەوەی سنوورەکانیەوە دێت و لە ئێستادا کەمتر لە سەدا ٤٠ی ئەو ئاوە بە عێراق دەگات”.
دەشڵێت” تورکیا بەردەوام بەنداو دروستدەکات، ئێرانیش سەرقاڵی بەنداو دروستکردنە لەسەر رێڕەوی روبارەکانی”.
وتەبێژی وەزارەتی سەرچاوە ئاوییەکانی عێراق راشیگەیاند” هەرچەندە لەگەڵ لایەنی تورکی گفتوگۆ و رێککەوتن لەوبارەیەوە کراوە، بەڵام دەرئەنجامێکی ئەوتۆی نەبووە”.
رۆژنامەکە نوسیویەتی، زستانی ساڵی ٢٠٢٢ بانکی نێودەوڵەتی لەبارەی کەشووهەوای عێراقەوە هۆشداریداوە و داوای کردووە بە خێرایی کیشەکانی بەردەم ئاوی عێراق چارەسەربکەن، بەڵام وەک رۆژنامەکە دەڵێت لایەنی بەرپرس گوێیان لێخەواند و راپۆرتەکەیان بەهەند وەرنەگرت.
رۆژنامەکە ئاماژەی بەوەشکردووە ٢٣ تاکو ٢٦ی ئەم مانگە لە بەغداد، یازدەهەمین کۆنگرەی ئاودێریی نێودەوڵەتی بەڕێوەدەچێت و بابەتی کەمبوونەوەی ئاوی عێراق دەخرێتە سەر مێزی کۆنگرەکە.
