“لەڕووی یاساییەوە ناكرێت مێرمنداڵ ئۆتۆمبێل لێ بخوڕێت”
دیدار-زاری كرمانجی
بەرپرسی ڕێكخراوی ڕۆشنبیری هاتووچۆی كوردستان، دەڵێت: چەندین چالاكی جۆراوجۆر و سەردەمیانەمان ئەنجام داوە، لەپێناو دروستكردنی تاكێكی ڕۆشنبیر و هۆشیار و سەلامەت، دوور لە ڕووداوەكانی هاتووچۆ، تا بتوانێت هێما و ڕێنمایەكانی هاتووچۆ بكات بە كولتوور و لە ژیانی ڕۆژانەیان ڕەنگ بداتەوە.
لەبەردەوامی قسەكانیدا تەها مەهدی بەرپرسی ڕێكخراوی ڕۆشنبیری هاتووچۆی كوردستان، بە زاری كرمانجی ڕاگەیاند: كاروچالاكییەكانمان بریتی بوونە لە كردنەوەی خولی تایبەت بۆ شۆفێرانی تاكسی و پاس لە هێلە سەرەكییەكانی (هەولێر- سۆران، هەولێر-حاجی ئۆمەران و سۆران و ڕانیە) بۆ یەكەم جار لەسەر ئاستی هەرێمی كوردستان بەرێوەچوو، هەروەها كردنەوەی چەندان وۆرك شۆپ و سیمینار و بۆ شارەزایانی بواری هاتووچۆ و مامۆستایانی زانكۆ تایبەت بە سیكتەری هاتووچۆ، بڵاوكردنەوەی هەزاران پرۆشەری تایبەت بە ڕێنمایەكانی هاتووچۆ لە بەشێكی زۆری شۆستە و شەقامەكانی هەرێمی كوردستان، بڵاوكردنەوەی چەندان نامیلكەی تایبەت بە ڕۆشنبیری و هۆشیاری هاتووچۆ لە ناوچە گەشتیارییەكان، هەروەها كردنەوەی گەورەترین پیشانگەی وێنەی ڕووداوەكانی هاتووچۆی هەر چوار پارێزگای هەرێمی كوردستان لە هەولێری پایتەخت، لەگەڵ كردنەوەی خولی فێركردنی شوفێری بۆ دەیان ئافرەت و خێزان و كچی شەهیدان و پێشمەرگە قارەمانەكان و ئەنجامدان و بەشداری كردنمان لە چەندین چالاكی دیكە”.
بەرپرسی ڕێكخراوی ڕۆشنبیری هاتووچۆ، دەشڵێت: زیاتر چالاكیەكانمان لە ناوەندەكانی خوێندن ئەنجام دەدەین، چونكە هۆشیاری هاتووچۆ لە سەرەتای منداڵی سەرهەڵدەدات كاتێك دەڕوات بۆ باخچە و قوتابخانەی بنەڕەتی، هەربۆیەش ئێمە وەك ڕێكخراو ئامانجی گەورەمان ئەوەیە ڕۆشنبیری و هۆشیاری ببێتە پڕۆگرامی خوێندن، واتە لە باخچەی ساوایانەوە تا سێی بنەڕەتی بخوێندرێت و جێگای بۆ بكرێتەوە لە پەرتووكی بەها كۆمەڵایەتییەكان، لە پێناو سەلامەتی گیانی منداڵەكانمان و قوتابی ئامۆژگاری و ڕێنوێنی بكەن، بۆ ئەوەی لە كاتی هاتووچۆ كردنیان بۆ باخچە و قوتابخانەكان بەشێوەیەكی سەلامەت و تەندروست بەپێی هێما و ڕێنمایەكانی هاتووچۆ، لە سەرشۆستە و شەقامەكان هاتووچۆ بكەن، بۆ ئەوەی دووربن لە هەموو ڕووداوێكی نەخوازراوی هاتووچۆدا، هەروەك ساڵانە لە كاتی كردنەوەی دەرگای خوێندنگەكان ڕووداوی دڵ تەزێن و جەرگ بڕ ڕوو دەدەن و چەندین قوتابی دەبنە قوربانی هەڵە و كەمترخەمی شوفێران”.
لە وەڵامی ئەو پرسیارەی زۆرجار دەبینرێت منداڵ یان مێرمنداڵ ئۆتۆمبێل لێدەخوڕێت ئایا بەپێی یاسا گونجاوە، بەرپرسی ڕێكخراوی ڕۆشنبیری هاتووچۆی كوردستان ڕایگەیاند، لە ڕووی یاساییەوە ناكرێ مێرمنداڵ و هەرزەكاری خوار تەمەنی 18 ساڵی شۆفێری بكات و ئۆتۆمبێل لێ بخوڕێت، ئەمە بەپێی یاسا مامەڵەی لەگەڵ دەكرێت و دەست بەسەر دەكرێت و دەدرێتە دادگە و ئۆتۆمبێلەكەش دەست بەسەر دەكرێت، چونكە لەم تەمەنە ناتوانێت ببێت بە خاوەنی مۆڵەتی شۆفێری پێویستە 18 ساڵی تەواو كردبێت”.
نیگەرانی خۆشی دەربڕی لەو منداڵ و هەرزەكارانەی لە شەقام و كۆڵانەكان ماتۆڕسكێل لێدەخوڕن و دەبنە هۆی بێزار كردنی خەڵكی زۆرجاریش ڕووداوی مەترسیداریان لێدەكەوێتەوە، بەشێكیشیان دەنگی گزۆزی ماتۆڕسكیلەكانیان بەرزكردووەتەوە و خەڵكی بەردەوام پەیوەندیمان پێوەدەكەن دژبەو دیاردەیە، پێویستە لایەنی پەیوەندیدار چاودێری زیاتر بخاتە سەر ئەو جۆرە ماتۆڕسكێلانە، هەروەها ئەو دوكان و فرۆشگایانەش كە ماتۆڕو كەلوپەلەكان دەفرۆشن لە ڕێنماییەكانی هاتووچۆ دەرنەچن، بە پێویستیشی دەزانین دەست خۆشی لە وەزارەتی ناوەخۆ بكەین، بڕیاری داوە بە دروستكردنی لیژنە لە بەڕێوەبەرایەتییەكانی هاتووچۆ بە تۆماركردنی ئەو ماتۆڕسكێلانەی كاری گەیاندن و گواستنەوەی خواردەمەنی دەكەن”.
لەدوا قسەكانیدا دەڵێت: خۆشبەختانە لە كابینەی نۆیەمی حكوومەتی هەرێم بە سەرۆكایەتی مەسرور بارزانی سەرۆكی حكوومەتی هەرێمی كوردستان، كاری باش كراوە بۆ ڕێكخستنەوە و باشتر كردنی سێكتەری هاتووچۆ، لە ڕێگەی دروستكردنی شەقامەكان و دانانی هێماكانی هاتووچۆ و چەندین خزمەتگوزاری دیكەی هاتووچۆ، كە لە ئێستاشدا بەردەوامیان هەیە، ئەمانەش هۆكاری باش دەبن بۆ نەهێشتن و كەمكردنەوەی ڕووداوەكانی هاتووچۆ.
