سەردار قازی ـ رواندز:
ماوەیەك لەمەوبەر بەبڕیاری سەرپەرشتیاری ئیدارەی سەربەخۆی سۆران، نۆژەنكردنەوەی یاریگەی (بانەزێوك)ی خرایە لیستی پڕۆژەكانی ئیدارەی سۆران و بڕیار لەسەر تەواوكردنی یاریگەی گەورەی تایبەت بەیانەی رواندز درا.
یاریگەی بانەزێوك، 16 ساڵ پێش ئێستا بڕیاری بوونیاتنانی درا، بەڵام پڕۆژەكەی بەنیوەچڵی جێهێڵدرا و یانەی رواندز سوودی لێی نەبینی.
تا ئێستا پڕۆژەكە نەبووەتە كردەیی و قائیمقامی رواندزیش هۆكارەكەی باس دەكات.
ئەحمەد قادر، قائیمقامی رواندز بەزاری كرمانجی گووت: “لە دوو رۆژی ئایندە هەنگاوەكانی نۆژەنكردنەوەی یاریگەی بانەزێوك دەست پێدەكەن و رەزامەندی كاركردنمان داوەتە كۆمپانیای جێبەجێكار.”
ئەحمەد قادر، گووتیشی: “هۆكاری دواكەوتنی پڕۆژەكە لەوادەی خۆی بۆ تێكدانی ئەو كەمپە دەگەڕێتەوە، كە پێشووتر لەم یاریگەیە بۆ خوشك و برا ئێزیدیەكان بونیاتنرابوو، سەرەتا دەبێ كەرەستەی كەمپەكە لەوێ نەهێڵین ئینجا هەنگاوەكانی دیكە دەست پێدەكەن.”
بەگوێرەی زانیارییەكانی گەیشتوونەتە زاری كرمانجی” بڕیارە لەماوەی 90 رۆژ سەرجەم كەم و كوڕییەكانی یاریگەكە چارەسەر بكرێن و رادەستی یانەی رواندز بكرێتەوە”.
بەگوێرەی مەرجەكانی پڕۆژەكە بێت، دەبێ چیمەنی سرووشتی بچێندرێت، هەروەها پەیژەكان و شوێنی دانیشتنی هەردوو تیپ نۆژەندەكرێنەوە.
جێگری سەرۆكی یانەی وەرزشی رواندز دەڵێت” رەنگە بەشێكی یارییەكانی ئەم وەرزەی خولی پلەیەك ببەینە ئەم یاریگەیە.”
ئارام تاهیر، جێگری سەرۆكی یانەی وەرزشی رواندز بۆ زاری كرمانجی گووتی ” بەچاككردنی كەم و كوڕییەكانی ئەم یاریگەیە لایەنێكی دارایی گرنگ بۆ یانەی رواندز دەستەبەر دەبێت، لەبەر ئەوەی هەڵكەوتەی جوگرافی یاریگەی بانەزێوك لەشوێنێكە كە دەتوانین بەهۆیەوە یانەكانی خواروو و ناوەڕاستی عێراق پەلكێش بكەین، مەشق و ئامادەسازییەكانیان لەوێ ئێمە ئەنجام بدەن”.
جێگری سەرۆكی یانەی رواندز روونیكردەوە”دوای تەواو بوونی یاریگەكە راوێژ بەستافی راهێنەرانمان دەكەین، هەوڵدەدەین بەشێكی یارییەكانمان لەوەرزی نوێی خولی پلەیەك ببەینە یاریگە تازەكەمان”.
یاریگەی رواندز ساڵی 2006 بە گوژمەی 16 ملیار دینار لە سەر رووبەری 11 دۆنم زەوی دروستكرا، بەڵام تا ئێستا هیچ یارییەكی لێ ئەنجام نەدراوە”.
