ئیسماعیل ئیبراهیم
هەڵبژاردنەكانی پەرلەمانی عێراق نزیك بووەتەوە، بەهەمانشێوەش گۆڕانكاری مەزنەكەی رۆژهەڵاتی ناوەڕاستیش لە عێراق، ئیران و توركیا نزیك بۆتەوە، سوریا لە نێو شەپۆڵ و كاریگەریییەكانی ئەم ویستەی جیهانییە بۆ هێنانە ئاراوەی ناوچەیەكی جیاوازتر لە رابردوو، هەر وڵات و نەتەوەیەكیش یەكگر نەبن و نەتوانن بە شێوەیەكی دادپەروەرانە لەسەر بنەمای هاووڵاتی بوون لەگەڵ یەكتر بسازێن، دەرزی نێو خۆیان گەورتر و ئاسانتر دەبن بۆ دەستێوەردانی دەرەكی، بۆیەش توركیا بەهەموو توانای خۆیەوە هەوڵی جددی دەدات بۆ رێككەوتن لەگەڵ كوردانی باكووری كوردستان، تا لە رێگەی داخوازییە رەواكانی نەتەوەی كورد هیچ لایەنی بیانی دەستوەردان لە ناوخۆی ئەو وەڵاتە نەكات، بەتایبەتی كە لە نێو خودی توركیا دۆخی سیاسیی و ئابووری زۆر لەرزۆك بووە.
بۆ كورد لە هەر چوار پارچەی كوردستان، گرینگە ببنەخاوەن یەك سەنگەری بەرگری سیاسی و دیپلۆماسی، دەشێ لە نێو ئەو یەكبوونە چەندین دونیا بینین و رۆئیای جیای ستراتیژی هەبێت، بەڵام دواجار یەك ئامانج كۆیان دەكاتەوە كە رزگاربوونە لە دەست ئەو دوژمنە داگیركارانەی كوردستانیان لەت لەت كردووە و هەر رۆژەو كارەساتێكی مرۆیی بەسەر دێنن.
تەواوی هەڵبژاردنەكان كە دێنە پێش گرینگن، ئەمەش بەستراوەتەوە بە كات و ئەگەری گۆڕانكارییەكان، بەڵام هەڵبژاردنی داهاتووی پەرلەمانی عێراق جیاواز لە ئەوانی رابردووە و پێویستی بە دانانی پلان و ستراتیژی نەتەوەیی هەیە، دوور لە تێڕوانینە سیاسییە كورت مەوداكان، لەبەر ئەوەی تەوژمی گۆڕانكارییەكان ئەوەندە بە وردی بەرنامەی بۆ دارێژراوە و كاری لەسەر دەكرێت، كە لایەنی كەم بۆ 100 ساڵی داهاتوو دەبێت.
چەند رۆژێكە بابەتی بەشداری كردنی لایەنە سیاسییە كوردییەكان بە یەك لیست لە هەڵبژاردنی داهاتوو بۆتە جێگەی گفتووگۆ، هەر چەندە بۆچوونی جیاوازیشی لەسەر بێت، بەڵام سەرگرتنی ئەم هەوڵە دەستكەوتێكی مەزنی بەدوادادێت و هەموو مرۆڤێكی ژیر دەخوازێت ئەو پلانە نیشتمانییە بێتەدی.
كورد لە باشووری كوردستان بە هەموو رەنگ و بۆچوونە جیاوازەكانەوە توانیوایە زۆر بە سەركەوتووانە ئەم كیانەسیاسییە بپارێزن، سەرەڕای بوونی پیلانە بەردەوامە هەمە چەشنەكانی داگیركەران و ناحەزانی كورد لە بەغدا و ناوچەكە، بەڵام ئێستا هەین و خاوەن بڕیارین، ئەگەر بەیەكەوە نەچینە ناو یەك سەنگەری بەرگری بۆ ئەوەی دەستكەوتی مەزنتر بەدەست بێنین و لە گۆڕانكارییەكان پشكێكی مەزنترمان دەست نەكەوێت، دەشێ ئەوەی هەشمانە بكەوێتە مەترسییەوە.
بۆیە بەشداری كردنی كوردان لە هەڵبژاردنەكانی داهاتوو بە یەك لیستی نەك پێویستییە بەڵكوو بووەتە ئەركێكی نەتەوەیی و نیشتمانی، بە تایبەتی لە ناوچەكانی دابڕێندراو لە خاكی باشووری كوردستان، یەك لیستی واتە یەك سەنگەری پتەو و بەهێز لە بەرامبەر داگیر كەران.
