“لە ماوەیەكی نزیك بینەری نووێترین بەرهەمم دەبن”
“ئێستا كاری هونەری لە دۆخێكی زۆر باشترە”
“ژیانی مرۆڤایەتی بێ هونەر بۆشایەكی مەزن دروست دەكات”
كاكە ئەرسەلان، دانیشتووی قەزای رواندز، گەنجێكی تازە پێگەیشتووی نێو جیهانی گۆرانی گووتن، گەنجێك كە چاوی بە خەرەند و جوانییە سیحراوییەكانی سروشتی رواندز كرا بێتەوە و گوێچكەكانی بە بیستنی میوزیكی تیپی پاشای گەورە راهاتبن، ناشێ نەچێتە بواری گۆرانی و میوزیك، هەرچەندە (كاكە) هەر لە منداڵییەوە حەزی لەم بوارە هەبووە، لە نێو شاخ و دۆڵەكانەوە بە دەنگی بەرز گۆرانی گووتووەو لاسایی هونەرمەندەكانی نوێ و كلاسیكی كردۆتەوە، بەڵام دەستپێكی كاری هونەری لە كۆمەڵەی هونەر و وێژەی كورد بووە لە رواندز، ئەو كات خوا لێخۆش بوو مامۆستا زرار مستەفا هاندەری دەبێت بۆ بەردەوامی دان بە بەهرەكانی، لەوێوە بەفەرمی قۆناغی ژیانی هونەری دەست پێ دەكات، بەهۆی توانا و زیرەكییەوە بۆ چاڵاكی قوتابخانەكان بانگهێشت دەكرێت و لە چەندین ئاهەنگ بەشدار دەبێت، ئیتر ناوی كاكە ئەرسەلان لە نێو دانیشتووانی رواندز بڵاو دەبێتەوە.
كاكە، بۆ ئەوەی بتوانێت بە شێوەیەكی ئەكادیمی پەرە بە كارەكانی بدات، ساڵی 2014 دەچێتە پەیمانگەی هونەرە جوانەكانی رواندز، دوای پێنج ساڵ خوێندن شارەزاییەكی باشی لە سۆڵێست و ئامێری پیانۆ پەیدا دەكات، لە زۆربەی ئاهەنگەكان سۆڵێست بووە، دواتر چۆتە كۆلێژی هونەرە جوانەكانی هەولێر، قۆناغەكانی خوێندن لەو كۆلێژەش تەواو دەكات.
وەك خۆی بۆ زاری كرمانجی گووتی ” ساڵی 2018 بەشداری پڕۆگرامی دەنگ بێژیم كرد، بە ئەنجامێكی باش لێی دەردەچووم”.
ئەم هونەرمەندە گەنجە، ئێستا لەسەر ئاستی كوردستان خاوەن هەواداری تایبەت بە خۆیەتی و چەندین گۆرانی هەیە، بەردەوامە لە كارەكانی و دەڵێت ” لە ماوەكی زۆر كورت بینەری نووێترین بەرهەمم دەبن، بە شێوەی ڤیدیۆ كلیپ، بە یارمەتی هاوكاران و هاورێیانم پلانی زۆر جوانمان هەیە، ئەمساڵ جیاواز لە پێشتر چەند كاری جوانتان پێشكەش دەكەین”.
كاكە ئەرسەلان، پێیوایە ئێستا زەمینەیەكی لەبار و باشتر بۆ هونەرمەندان هاتۆتە ئاراوە و باشتر دەتوانن كارەكانیان ئەنجام بدەن، لەمبارەیەوە روونی دەكاتەوە” ئێستا بە بەراورد بە چەند ساڵی رابردوو، كاری هونەری لە دۆخێكی زۆر باشترە، لەبەر ئەوەی هەمووان تێگەیشتوون، كۆمەڵگە و مرۆڤایەتی بێ هونەر لە نێوشیاندا گۆرانی و میوزیك بۆشایەكی مەزن دروست دەكات، چونكە هەر هونەرێك شێوازێكی جوانی ئارام كەرەوەی مێشك و دەروونی تێدایە، مرۆڤ دەباتە جیهانی خودناسی، لە كەشێكی تایبەتی پڕ لە خەیاڵی رەنگاو رەنگی خۆشەویستی”.
ئەم گەنجە هونەرمەندە، پێی وایە سەرەڕای ئەو ئاڵەنگارییانەی بۆ كورد بەگشتی و لە نێویشیاندا هونەری كوردی هاتۆتە پێش، بەڵام دەتواندرێت رەڕەوی هونەری بەرەو پێش ببردرێت، ئەو دەڵێت” هەر چەندە كورد بە درێژایی مێژوو رووبەڕووی كارەسات، راوەدوونان و كوشتن بۆتەوە، هەوڵ دراوە لە بواری ئەدەب و هونەریش لەناوی ببەن، بەڵام بەهۆی زیندوویی نەتەوەی كورد، بە ماوەیەكی زۆر كورت توانی لە گشت بوارەكانەوە هەستێتەوە سەرپێ و رۆڵی خۆی ببینێت، بۆیە چۆن لە بواری بنیادنانی وڵات لە هەموو بوارەكانەوە پێشكەوتنی خێرا و جۆری هەیە، لە بواری هونەریش بە هەمانشێوە، ئەگەر كارەكان و بڕیارەكان بە سیستماتیك بكرێن بەدڵنیاییەوە هونەرمەندی كورد دەتوانێت لەسەر ئاستی جیهانی ناوی نەتەوەی بەرز بكاتەوە”.
