سەرۆكی شارەوانی: لە ئایندەیەكی نزیكدا پڕۆژەكە دەستی پێدەكرێتەوە
مستەفا دۆلەمەری-مێرگەسۆر:
دوای 11 ساڵ، پڕۆژەی دووسایدی گۆڕەتوو لە سنووری قەزای مێرگەسۆر هێشتا تەواو نەكراوە و گرفتی زۆری بۆ هاووڵاتییان و شوفێرانی دەڤەرەكە دروستكردووە.
پڕۆژەی بە دووسایدكردنی شەقامی سەرەكی گۆڕەتوو، لە ساڵی 2013 بۆیەكەمینجار بەردی بناغەی دانرا و دوای ماوەیەكی كەمی كاركردن ڕاگیرا، هەرچەندە لە ساڵی 2016 جارێكی دیكە پڕۆژەكە دەستی پێكرا و بەهۆی قەیرانی دارایی ئەوكاتیش تەاونەكرا، ساڵی ڕابردوو لە چوارچێوەی پڕۆژە و كار و خزمەت گوزاریەكانی كابینەی نۆیەمی حكوومەتی هەرێمی كوردستان، دەست بە كارەكانی پڕۆژەكە كرایەوە و بڕیارە ئەمجارە تەواو بكرێت، لەم ڕاپۆرتەدا، شۆفێران باس لە گرینگی پڕۆژەی رێگای دووسایدی گۆڕەتوو دەكەن و سەرۆكی شارەوانی گۆڕەتووش، لە ڕێگەی زاری كرمانجی مووژدەی دەستپێكردنەوە و تەواو كردنی پڕۆژەكە بە شوفێران دەدات.
تۆفیق محەمەد، شۆفێر و دانیشتووی ناحیەی گۆرەتوو، لەبارەی گرنگی پڕۆژەكە، بە زاری كرمانجی گووت:” دروستكردنی شەقامی دووسایدی گۆڕەتوو گرینگیەكی زۆری دەبێت، چونكە لە ئێستادا جەنجاڵیەكی زۆر دروست دەبێت، ڕێگاكە كۆنە و چاڵی زۆری تێدایە و وەكوپێویست نییە، ئەمەش ئاستەنگێكی زۆر دروست كردووە لە كاتی هاتووچۆكردندا.
بە گووتەی ئەو شوفێرە، ئەگەر بێتوو ئەو ڕێگایە بكرێتە دوو ساید جەنجاڵی لەسەر شەقام كەمدەبێتەوە و ئاسانكاری هاتووچۆ بۆ شوفێران و گەشتیاران دروست دەبێت، دەشڵێت:” بە دووسایدكردنی ڕێگاكە یارمەتیدەرە بۆ گەشەكردنی لایەنی گەشتیاری و بازرگانی، لەهەمان كات سیمایەكی جوانتر بە ناوچەكە دەبەخشێت وەكو رووناككردنەوە و بوونی سەوزای و بەفراوانی شەقامەكە”.
محەمەد سەردار، شۆفێرێكی دیكەیە، لە مێرگەسۆر، لە بارەی ئەو پڕۆژەیە، بۆ زاری كرمانجی گووتی:”پڕۆژەی رێگەی دووسایدی ناحیەی گۆڕەتوو لەلایەن حكومەتی هەرێمی كوردستانەوە دەستی پێكراوە، ئەمەش خزمەتێكی باش بە ناوچەكە دەكات و یەكێك دەبێت لە گرنگترین و ستراتیژیترین پڕۆژە خزمەتگوزارییەكانی دەڤەرەكە، جیا لە خەڵكی گۆڕەتوو هەموو ئەو گەشتیار و هاووڵاتییانەی ڕوو لە دەڤەرەكە دەكەن ئاسانكاری هاتووچۆیان بۆ دروست دەبێت .
گووتیشی:” پڕۆژەكە زۆر لە ماوەی یاسایی خۆی دواكەوت، پێویستە پەلەبكرێت لە تەواو كردنی تا بخرێتە خزمەتی دانیشتوان و شوفێرانی دەڤەری بارزان و ناحیەی گۆڕەتوو بە تاییبەتی .
لەمبارەوە، سەفا عەلی پیرانی، سەرۆكی شارەوانی گۆڕەتوو، بە زاری كرمانجی راگەیاند:” پڕۆژەی دووسایدی گۆڕەتوو لە ساڵی 2013 بەردی بناغەی دانرا، بەڵام بەهۆی قەیرانی دارایی پڕۆژەكە وەستا كاری تێدا نەكرا و لەساڵی 2024 لە چوارچێوەی پڕۆژەكانی كابینەی نۆیەمی حكومەتی هەرێمی كوردستان، لەسەر ڕاسپاردەی مەلا مستەفا مەسعود بارزانی، دەست بە كارەكانی ئەو پڕۆژەیە كرایەوە و ڕێژەیەكی زۆر لە تۆری ئاوەڕۆ دانرا، بەڵام بەهۆی هاتنی وەرزی زستان كاركردن لە پڕۆژەكە ڕاگیرا.
سەرۆكی شارەوانی ناحیەی گۆرەتوو، دەڵێت:” لە ئێستادا ئامادەكاری دەكرێت بۆ دووبارە دەست پێكردنەوەی پڕۆژەكە و بۆ ئەم مەبەستەش، لە ڕۆژانی رابردوو، لێژنەی خەملاندنی قەرەبووكردنەوە لە بەڕێوەبەرایەتی گشتی شارەوەنییەكانی سۆران سەردانی شوێنی پرۆژەكەیان كرد و ڕاپۆرتی تایبەت بەقەرەبووكردنەوەی خاوەن دوكان و ئەو خانوانەی بەر پرۆژەی دووساید دەكەون بەرز دەكرێتەوە بە مەبەستی قەرەبۆ كردنەوەیان”.
سەفا پیرانی، ئەوەشی خستەڕوو، لەبەر ئەوەی شارۆچكەی گۆڕەتوو پێگەیەكی جوگرافی گرینگی هەیە لە قەزای مێرگەسۆر و بەردەوام لە گەشەسەندن و فراوانبووندایە و ناحیەی بارزان، شێروان و ناحیەی پیران بە ئیدارەی سەربەخۆی سۆران دەبەستێتەوە، هەروەها تەواو كردنی دووسایدی گۆڕەتوو ئاسانكاری زۆری هاتووچۆ بۆ دەروازەی نێودەوڵەتی زێت دروست دەكات، لە لایەكی دیكەشەوە، سەنتەری گۆڕەتوو ناوەندی بازاڕی سنووری قەزای مێرگەسۆرە.
گووتیشی:” بە تەواو بوونی ئەم پڕۆژەیە كاریگەری یەكجارگەورەی دەبێت لەسەر جوانكاری سیمای شار و گەشەی ئابووری و كار ئاسانی هاتووچۆی هاوڵاتییان بە شێوەیەكی گشتی، بە پێویست دەزانم سووپاسی خەمخۆری و دڵسۆزی مەلامستەفا بارزانی بكەین بۆ پێشكەش كردنی باشترین خزمەتگوزاریەكان بۆ دەڤەرەكەمان”.
پڕۆژەی دووسایدی ناحیەی گۆڕەتوو، بە گووژمەی هەشت ملیار دینار لەلایەن كابینەی نۆیەمی حكوومەتی هەرێمی كوردستان، بە درێژای پێنج كیلۆمەتر جێبەجێ دەكرێت و بڕگەكانی پڕۆژەكە خۆی تۆڕی ئاوی خواردنەوە و دانانی ئاوەڕۆ و دروستكردنی دیواری پاڵپشت و دانانی رووناكی دەبینێتەوە، مەودای پڕۆژەكە لە دەستپێكی دووسایدی مێرگەسۆر تا بازگەی پیەرەفاتە و پڕۆژەیەكی گرنگ و ستراتیژی سنووری مێرگەسۆرە”.
