ئامادەكردنی: توانا فەریق ئەحمەد
ڕووداوی لە سێدارەدانی چوار ئەفسەرەكەی كورد (مستەفا خۆشناو، محەممەد قودسی، عیززە‌ت عەبدولعەزیز، خێروڵڵا عەبدولكەریم)، لە بەرواری 19ـی 6ـی 1947، بە یەكێك لە كارە شۆڤێنی و بێ بەڵێنییەكانی ڕژێمی پاشایەتی عێراق دادەنرێت بەرامبەر بە گەلی كورد.
ئەم چوار ئەفسەرە كوردە كۆلێژی سەربازیان لە بەغدا تەواو كردووە و لە سەردەمی پاشایەتی عێڕاق لە نێو سوپای عێڕاقی پلەی سەربازیان پێدراوە، بەڵام دەبینین ئەم چوار ئەفسەرە دەچنە نێو شۆڕشی دووەمی بارزان ۱۹٤۳-۱۹٤٥ز و ڕۆژهەڵاتی كوردستان و پاڵپشتی كۆماری مەهاباد دەكەن و هەموو ئەمانە زادەی چەند هۆكارێك بوون لەوانە حكومەتی عێڕاقی فەرمانی گواستنەوەیان دەدات بۆ ناوچەكانی تری عێراق وەك بیانویەك بۆ ئەوەی دەسەڵاتیان لە نێو سوپای عێڕاقی كەم بكاتەوە ئەمە لەلایەك، لەلایەكی تر هەبوونی هەستی نیشتمانپەروەری لای ئەم ئەفسەرانە وای كرد لە ساڵی ١٩٤٥ز بڕیارەكە جێبەجێ نەكەن و پەیوەندی بكەن بە شۆڕشی بارزانەوە ١٩٤٣-١٩٤٥ز بە ڕابەرایەتی مستەفا بارزانی، لەدوای ئەم بەشدار بوونەیان لە شۆڕشی دووەمی بارزان و تێكشكاندنی شۆڕش لە ژێر بۆردوومانی هێزی ئاسمانی بەریتانیا و سووپای عێراق لە كۆتای ساڵی ١٩٤٥ز دا لەگەڵ بارزانییەكان دەچنە ڕۆژهەڵاتی كوردستان و وەكو ئەفسەری سووپای كوردستان لە كۆماری كوردستانیشدا خزمەتی خۆیان دەكەن.
دوای ڕووخاندنی كۆماری كوردستان لە 17ـی 12ـی 1946 ز و چوونی بارزانی و یاوەرانی بۆ یەكێتی سۆڤێت، ئەم چوار ئەفسەرە لەگەڵ شێخ ئەحمەد و خێزانە بارزانییەكان لە مانگی نیسانی 1947 خۆیان ڕادەستی حكومەتی عێراق دەكەنەوە، هەر چەندە حكومەتی عێراق پێشتر بانگەشەی لێبووردنی بۆ هەموو ئەو كەسانە كردبوو كە دەگەڕێنەوە بۆ عێڕاق، بەڵام دوای گەڕانەوە دەستگیركران و دادگایی كران و پێیان وترا ئەم لێبوردنە ئێوە ناگرێتەوە و بڕیارەكە بۆ ئەوان پێچەوانە بووەوە، ئەوە بوو بە فەرمانی ساڵح جەبری سەرۆكی حكومەتی ئەوكاتی عیراق لە دادگای سەربازیدا لە ١٩ی حوزەیرانی ساڵی ١٩٤٧دا حوكمی لە سێدارەنیان بەسەر جێبەجێكرا، دوای بڵاوبوونەوەی بڕیاری لە سێدارەدانیان، هاووڵاتیانی شاری سلێمانی خڕۆشان و ڕژانە سەر شەقامەكان و ئێوارەی هەمان رۆژ خۆپیشاندان لەبەردەركی سەرا دەستیپێكرد و ڕووی لە فراوان بوون كرد، بەڵام وەك هەمیشە حكومەت بێباك بوو لە ئاست داواكاری هاووڵاتیان و خۆپیشاندەران، گوێی لێ نەگرتن و بڕیارەكە وەك خۆی جێبەجێكرا.
دوای جێبەجێكردنی بڕیارەكە و لە سێدارەدانی هەر چوار ئەفسەرەكە، تەرمەكانیان گەڕێنرایەوە كوردستان و هەر یەكەیان بەرەو زێدی خۆی بەڕێكرا، لە بەرواری 19ـی 6ـی 1947 لە بەغدا پاش نووسینی وەسێتنامە هاوبەشەكەیان لە سێدارە دران.
