“تەنها لە سۆران 120 مۆلیدەی ئەهلی رۆژانە كارەبا بە دانیشتووانان دەدەن”
پشتیوان كەریم – زاری كرمانجی:
هاووڵاتییانی قەزای سۆران نیگەرانن لە هاتنەوەی پارەی زۆری كارەبای مۆلیدە ئەهلیەكان، پێیان وایە بە بەراورد بە ساڵانی رابردوو، نرخی مانگانەی ئەمپێری مۆلیدە زۆر زیاترە و مانگانە پارەیەكی زۆریان بۆ دەگەڕێتەوە، ئاماژەبەوەدەكەن، پێویستە حكوومەت و لایەنی پەیوەندیدار هەوڵ بدەن نرخی كارەبای مۆلیدە دابەزێنن.
زانا ئەحمەد، هاووڵاتییەكی دانیشتووی سەنتەری سۆرانە، بۆ زاری كرمانجی گووتی:” نرخی كارەبای مۆلیدە ئەهلیەكان مانگ بە مانگ زیاتر بەرز دەبێتەوەو گۆڕان لە نرخەكەی روو دەدات، دۆخ و گوزەرانی خەڵك خراپە و پێویستە لایەنی پەیوەندیدار هەوڵی چارەسەر كردنی بدەن، چونكە مانگانە 25 تا 35هەزار دینار تەنها پارە بۆ مولیدەیە بدات سەڕای ئەوەش كارەبای نیشتیمانیش دەبێت پارە بدەین لە هەمانكاتدا هێشتا كارەبا 24 كاتژمێری تەواو نییە.
كەمال مەحموود، هاووڵاتیەكی دیكەی قەزای سۆرانە، دەڵێت:” سەڕای پێدانی ئەو بڕە زۆرەی كە مانگانە بۆ بە خاوەنی مۆلیدە ئەهلیەكان دەدەین، لە هەمانكاتدا وەك پێویست ڤۆڵتی ئەو تۆی نییە، بۆیە پێویستە لەسەر خاوەن مۆلیدەكان لەگەڕەكەكاندا وەك پێویست و لە كاتی دیاری كراو كارەبا بەهاووڵاتییان بدەن .
كەمال نیگەرانیشە لە لیژنەی مۆلیدە ئەهلیەكان و ئاماژە بەوە دەكات:” پێویستە سەرپەرشتیاری لیژەی مۆلیدە ئەهلیەكان لە گەڕەكەكان هەموویان پابەند بكات لە كات و ساتی خۆی كارەبا بەهاووڵاتییان بدەن و مافی تەواوی كارەبای مۆلیدە بە هاووڵاتییان بدەن تا بتوانرێ وەك پێویست سوودی لێ ببینین.
لای خۆیەوە، مەولان قادر، سەرۆكی ئەنجوومەنی مۆلیدە ئەهلیەكانی سنووری قەزای ناوەندی سۆران بە زاری كرمانجی راگەیاند:” هۆكارەكانی بەرزبوونەوەی نرخی مانگانەی مۆلیدە ئەهەلییەكان دوو فاكتەری سەرەكی هەن، بەرزبوونەوەی نرخی سووتەمەنی كە ئەم بەرز بوونەوەیەش لە بۆرسەی جیهانییە نرخی گازوایل بەشێوەی %100 بەرز بۆتەوە، لە هەمان كات لە وەرزێك بۆ وەرزێكی دیكە پێدانی كارەبای مۆلیدە جیاوازە، بە نمونە لە هاویندا كاتژمێرەكانی پێدانی كارەبای مۆلیدە بەراورد بە مانگەكانی دیكە زیاتر هەیە، هەروەها مۆلیدەیەكیش بۆ مۆلیدەیەكی دیكە گۆڕانی بەسەر دادێت، ئەمەش جاری وا هەیە پێدانی كاتژمێرەكانی كارەبا جیاوازیان هەیە، بەهۆكاری شكانی مۆلیدە و خراپبوونی ئیش پێكردنی كەمترە ئەمەش گۆڕانكاری و جیاوازی لە نرخ دروست دەكات، بۆیە ئەم گۆڕانكاریانە روو دەدەن لە گەڕەكەكان.
سەرۆكی ئەنجوومەنی مۆلیدەكان لەسەنتەری قەزای ناوەندی سۆران، ئاشكراشیكرد:” نرخی ئەمپێری كارەبا لە دەستەڵاتی ئێمە دانییە، تەنها لە دەستەڵاتی پارێزگادایە، ئەو لە سیستەمێكدا تێكڕای كارەبای مانگانە وەردەگیرێت و دابەشی سەر نرخی دەكات، هەروەها كاتژمێرەكانی پێدانی كارەبا جار بە جار گۆڕانكاری بەسەر دادێت، هاوكات تێكڕای كاركردن چەند بەرزتر بێت نرخەكەی زیاتر دەبێت وە چەند كەمتر بێت نرخەكەی كەمتر بێت.
ئەوەشی خستەڕوو:” لەم مانگەش نرخی گازوایل هیچ گۆڕانكاریەكی ئەوتۆی بەسەردانەهاتووە بە بەراورد لەگەڵ مانگی رابردوو، پێدانی كاتژمێرەكانی كارەباش زیاتربێت كەمتر نەبووە بۆیە ئەگەری هەیە لەگەڵ مانگی رابردوو نرخەكەی بە هەمان نرخی مانگی رابردوو یا كەمێك كەمتر بێت.
گووتیشی:” هاووڵاتییان گلەیان هەیە و حەز دەكات پێدانی كارەبا زیاتر بێت، لەسنووری ئیدارەی سۆران ئەو خشتەیەی كارەبای سۆران جێبەجێ دەكرێت خشتەیەكی خراپە زیاتر لە 16ساڵە ئەم خشتەیە كار دەكات، پێویستە گۆڕانكاری بكرێت و ببێت بە نۆرە لە نێوان كارەبای نشتیمانی و مۆلیدە ئەهلیەكان، هەروەها لە سنووری قەزای ناوەندی سۆران نزیكەی 120 مۆلیدەی ئەهلی هەن رۆژانە كارەبا دەدەن بە دانیشتوانی قەزای ناوەندی سۆران”.
