چنور مەزهەر: %50 قوتابخانەكانی سنوورەكەمان پێویستییان بە نۆژەنكردنەوەیە

لە ماوەی چوار ساڵدا 38 بەڕێوەبەر و یاریدەدەرمان گۆڕیون

پشتیوان كەریم- رواندز:
لە دیدارێكی تایبەتی زاری كرمانجیدا، مامۆستا چنور مەزهەر بەڕێوەبەری پەروەردەی ڕواندز، باس لە كێشە و گرفتەكانی بەردەم پەروەردەی دەكات و ئاماژە بەوەدەدات، بەشێكی زۆری قوتابخانەكانی سنوورەكەمان گرفتییان هەیە و پێویستییان بە دروست كردنی قوتابخانەی نوێ و نۆژەن كردنەوە هەیە، ناشی شارێتەوە، بەشێكی زۆری پاسەوان و بەردەستی قوتابخانەكانی سنوورەكە خانەنشین بوونە، لە پرسی گۆڕانكاریش، ئاماژەبەوەدەدات:” لە ماوەی چوار ساڵدا 38 بەڕێوەبەر و یاریدەرمان گۆڕیوون”.
مامۆستا چنوور مەزهەر دەڵێت:” پەروەردەی ڕواندز حەوت هەزار و هەشتا قوتابی هەیە، كە بەسەر 79 قوتابخانە دابەشبوون، لە ئێستادا هیچ مامۆستایەكی گرێبەستمان نەماوە و لە ماوەی ڕابردوو سەرجەمیان بوونە هەمیشەیی .
بەڕێوەبەری پەروەردەی ڕٍواندز، ئاشكرای دەكات:” ئەمساڵ ئەو پلانەی كە وەزارەتی پەروەردەی حكوومەتی هەرێمی كوردستان داینابوو، توانراوە %80ی گرفتە پەروەردەییەكان چارەسەر بكرێن، وەك دابینكردنی پەرتووك و نەوت و دانانی وانەی پێویست بۆ وانەبێژان و خشتەو نەخشەی وانەكان، بە بەراورد بە ساڵەكانی پێشتر زووتر ڕێكخراوە و لەگەڵ دەستپێكی دەوام جێ بەجێكراون .
بە گووتەی بەڕێوەبەری پەروەردەی رواندز، گرفتی سەرەكی لە تەواوی پەروەردەكان كۆنی قوتابخانە و بیاناكانن، بە شێوەیەكی گشتی%50ی قوتابخانەكانی سنوورەكەمان پێویستیان بە نۆژەنكردنەوە هەیە، هەروەها بەشی زۆری قوتابخانەكانیش كەڵكیان نەماوە و بۆ سەنتەری رواندزیش پێویستیمان بە ژمارەیەك قوتابخانەی نوێ، چونكە ناو سەنتەر تەنها یەك قوتابخانەی ئامادەیی كچان بوونی هەیە، بۆیە زۆر پێویستە حكوومەتی هەرێمی كوردستان گرینگی بە دروستكردنی بینا و قوتابخانەی نوێ بدات كە ساڵانێكی زۆرە دورست نەكراون.
ئەوەش دەخاتەڕوو، پێویستە وەزارەتی پەروەردەی هەوڵی ڕژد بدات بۆ دانانی بەردەست و پاسەوان لە سنووری پەروەردەیمان، چونكە ژمارەیەكی زۆرییان خانەنشین بوونە، ناكرێت وەك و وانە بێژان بهێنرێن، نەبوونی بەردەست و پاسەوان گرفت بۆ قوتابخانەكان دروست دەكات و پەروەردەی ڕواندزیش زۆرێك لە بەردەست و پاسەوانمان بە شێوەی كاتی لە قوتابخانەی گوندەكانمان گواستوەتەوە ئەمەش ئەركێكی قورسە، سنووری پەروەردەی ڕواندز پێویستیمان بە دامەزراندنی 50 بەردەست هەیە.
سەبارەت بە پرسی وانە بێژانیش، مامۆستا چنور مەزهەر بەڕێوەبەری پەروەردەی رواندز، ئاماژەی بەوەدا:” دامەزراندنی مامۆستا لە دەسەڵاتی وەزارت و وەزیری پەروەردەیە، هاوكات بۆ دانانی مامۆستای وانەبێژیش ئێمە لای خۆمان سیستەمێكمانداناوە كە بەپێی ڕێنمای وەزارەتی پەروەردە كاری پێدەكەین، هیچ مامۆستایەكی وانەبێژیش لە 24 بەشی كەمترنییە، هەروەها ئەمساڵیش لە سنووری پەروەردەیمان 12 مامۆستای وانەبێژ دانراون، لە سنووری بەڕێوەبەرایەتیمان 243 مامۆستای بێژ هەیە.
ناشی شارێتەوە، سەرجەم هۆبەی بەرێوەبەر و یاریدەدەر و مامۆستایانی قوتابخانەكانی سنوورەكەمان، پێویستیان بە كەل و پەل و پێداویستی ژوورەكان هەیە، بۆیە داوا دەكەین ئەم كەل و پەلانە دابین بكرێت.
دووپات لەوەدەكاتەوە:” ئەمساڵیش وە پەروەردەی رواندز گۆڕانكاریمان ئەنجم داوە لە بەڕێوەبەری یاریدەدەری قوتابخانەكان و سەركەوتیشی هێناوە لەچوار ساڵی رابردووش 38 بەڕێوەبەرو یاریدەرمان گۆڕیوون ئەم گۆڕانكاریانەش بۆهۆی ئەوە ئەمساڵ رێژەی دەرچوونی قوتابیان لە قوتابخانەكان گۆڕانكاری بەسەرداهاتووە، مەرجیش نییە سەرجەم بەڕێوەبەری قوتابخانەكان بگۆڕدرێن بەرێوەبەر هەیە ماوەی سی ساڵە بەڕێوەبەری قوتابخانەیە لە هەمان كات سەركەوتوو بووە و هەم خەڵك و كەس وكاری قوتابیان و هەروا ئێمە و سەرپەرشتیارەكان لێی رازین.
لە بارەی پرسی هێنانە كایەی بەڕێوەبەرایەتی گشتی لە سۆران، ئەو بەڕێوەبەری پەروەردە دەڵێت:” كردنەوەی بەڕێوەبەرایەتی گشتی پەروەردە دەبێتە دەستكەوتێكی گرینگ و گەورە بۆ ئیدارەی سۆران، كارئاسانییەكی باشیش بۆ پەروەردەی قەزاكان و تەنانەت دانیشتووانی دەڤەرەكەش دروست دەكات، ئومێد دەكەین لە داهاتووەكی نزیك بەڕێوەبەرایەتی گشتی پەروەردە بكرێتەوە”.