حكومەتی هەرێمی كوردستان بە هۆی پابەند نەبوونی بانكێك سكالای لەسەر تۆمار دەكات
جێگری بەڕێوەبەری نووسینگەی سەرۆکی حکومەتی هەرێمی کوردستان، بڵاوی كردۆتەوە ” سكاڵا دژی بانكی بازرگانیی عێراق (TBI) لەلای بانكی ناوەندیی و وەزارەتی دارایی لە بەغدا تۆمار دەكات، بەهۆی جێبەجێنیكردنی ڕێككەوتنی نێوان هەردوولای ساڵی ڕابردوو”.
ساڵی ڕابردوو، حكوومەتی هەرێمی كوردستان، لەگەڵ بانكی بازرگانیی عێراق، ڕێككەوتنێكی واژۆ كرد، كە ئەو دەقەی تێدایە بانكەكە ئامێری نوێی خەرجیكەر (ATM) لە ناوچەكانی هەرێمی كوردستان دادەنێ، بەڵام تا ئێستە ئەو كارەی جێبەجێ نەكردووە.
ئەمڕۆ عەزیز ئەحمەد، لە هەژماری تایبەتیی خۆی لە تۆڕی (ئێكس) نووسیویەتی ” هەست بە نیگەرانییەكی زۆر دەكەین بە دواخستن و دانەنانی ئامێری نوێی پارەدەر لەلایەن بانكی (TBI)ـەوە لە هەرێمی كوردستان”.
زیاتر بڵاوی كردۆتەوە” سەرۆكی بانكەكە ساڵێك لەمەبەر بەڵێنیدا بە بەردەستخستنی 100 ئامێری نوێ لە چوارچێوەی پرۆژەی (هەژماری من)، كە پڕۆژەیەكی بەدیجیتاڵیكردنی مووچەیە لەلایەن حكومەتی هەرێمی كوردستانەوە جێبەجێ دەكرێ”.
عەزیز ئەحمەد زیاتر روونیكردۆتەوە” بانكەكە زیاتر لە 40 هەزار داوای لە فەرمانبەرانی حكومەتی هەرێمی كوردستانەوە پێگەیشتووە لەو رووەوە، بەڵام هێشتا ئەو كارەی نەكردووە، هەروەها چاپكردنی كارتی فەرمانبەرانی مەدەنیی تا ئێستە نەكردووە و دوای خستووە و فەرمانبەرانیش دانیان بەخۆیاندا گرتووە”.
جێگری بەڕێوەبەری نووسینگەی سەرۆکی حکومەتی هەرێمی کوردستان ئاماژەی بەوەش كردووە: هاوبەشانی نوێ، پێشبینیی خزمەتی باشتر لەو بانكە دەكەن، زۆرتر لەبەر ئەوەی بانكی حكوومیی پێشەنگە لە عێراق”.
