جێگری سەرۆكی شارەوانی سۆران: هەركەس زیان بە شەقام و ڕێگاكان بەگەێنێت لێپێچینەوەی لەگەل دەكرێت
ڕاپۆرت-زاری كرمانجی كرمانجی
وەك تێبینی دەكرێت بەشێك لەو بارهەڵگرانەی چیمەنتۆ و قوم و چەگڵ و خۆڵ و ئەو پێداویستیانەی بۆ دروستكردن و لەكاتی تێكدانی خانووبەرە دەگوازنەوە، لەكاتی تێپەڕبوونیان بە شەقامەكانی شاری سۆران و ناحیەی دیاناو ڕێگا گشتییەكان، بەهۆی شێوازی خراپ باركردنی ئەو كەرستانە لێیان دەڕژێت و زیان بە شەقامەكان دەگەێنن.
لەمباریەوە عەبدولڵا مەلا، كاری شۆفێری دەكات، بە زاری كرمانجی گووت: “بەداخەوە بەشێك لەو بارهەڵگرانەی كەل و پەل و پێداویستی دروستكردن و تێكدانی خانووبەرە دەگوازنەوە، بەتایبەتیش چیمەنتۆ و بلوك و قوم و چەگڵ و خۆڵ و ئەو جۆری كەرستانە، زۆرجار لەسەر بەرهەڵگرەكانی وەك قەلاب یان تەراكتۆر یان ئەو ئامێرانەی كۆنكرێتیان پێدەكرێت، لەدوایانەوە دەڕژێتە سەر شەقامەكان، بەمەش جگەلەوەی زیان بە شەقامەكان دەگات، لە هەمانكاتیشدا بەربەست بۆ هاتووچۆی ئۆتۆمبێل دروست دەكات، یان مەترسی ئەوەیان هەیە بەر ئۆتۆمبێلی بچووك بكەون و زیانیان بەربكەوێت”.
ئەو شۆفێرە دەشڵێت: “پێویستە لەسەر شارەوانی و لایەنە پەیوەندیدارەكان، زیاتر چاودێری ئەو جۆرە ئۆتۆمبێلانەی بارهەڵگر بكەن و لێپێچینەوەو پێبژاردن لەگەڵ شۆفێرەكان بكرێت، لەپێناو نەهێشتنی ئەو جۆرە دیاردانە، چونكە دواجار زیان بە بەرژەوەندی گشتی دەگەێنن”.
ئەحمەد سەدیق، هاووڵاتییەكی دیكەی سنووری قەزای ناوەندی سۆران، بە زاری كرمانجی ڕاگەیاند: “خزمەتكردن بە شارەكەمان و پاراستنی ڕێگاو بان و شەقامەكان و پاكڕاگرتنی ژینگەكەی ئەركی هەموومانەو دەبێت هەریەكەو لای خۆمان هەست بە بەرپرسیارییەتی بكەین، نەك خوانە خواستە ببینە هۆكارێك بۆ زیان گەیاندن بە بەرژەوەندی گشتی و تێكدانی ڕێگاو شەقامەكانی شارو شارۆچكەو گوندەكانمان، كە بەداخەوە بەشێك لە بارهەڵگرەكان تائێستا ئەو لایەنە لەبەرچاو ناگرن”.
ئاماژەی بەوەشدا: “پێویستە ئەو جۆرە شۆفێرانەی بارهەڵگریان پێییەو كەرستەی خانوو بەرە دەگوزانەوە، بارەكانیان بە چادر ببپێچن، بۆ ئەوەی ئەو جۆرە كەرستانە نەكەونە خوارەوەو پەرتووبڵاوی سەر ڕێگاو شەقامەكان نەبن، بەداخەوە زۆرجار بینیومە خەڵكی گەڕەك و كۆڵانەكان سەرقاڵی لابردنی ئەو خۆڵ و بەردو چەگڵ و پاشماوەكان بوونە لەسەر ڕێگاكانی بەردەم ماڵەكانیان، هیوادارین لەمەودا ڕێگری تەواو لەو جۆرە دیاردەیە بكرێت”.
سەبارەت بەو دیاردەیە شەوقی عەزیز جێگری سەرۆكی شارەوانی قەزای ناوەندی سۆران، بە زاری كرمانجی ڕاگەیاند: “لە هەمبەر پاراستنی شەقام و ڕێگاوبانەكان پێویستە گشت لایەكمان خۆیان بە بەرپرس بزانین، چونكە موڵكی گشتییەو ڕۆژانە هەمووشۆی زۆریان لەسەرە، بەپێچەوانەوە بە تێكدان وێرانكردنیان بەربەست لە بەردەم هاتووچۆ دروست دەبێت”.
جێگری سەرۆكی شارەوانی قەزای ناوەندی سۆران، ئاماژەی بەوەشدا: “ڕێنمایی بە بەرهەڵگرەكان و ئەو جۆرە ئۆتۆمێلانە دراوە كە كاری گواستنەوەی كەل و پەلی خانووبەرە یان هەر شتێكی دیكە دەگەوازنەوە، كە نەبنە هۆكاری زیان گەیاندن بە شامەكان، بۆیە ئەو شۆفێرانەی باری زیاتر هەڵدەگرن، یان لەسەر ڕێگاو شەقامەكان خۆڵ و بەردوو چیمەنتۆ و هەرشتێكی دیكەیان لێ دەڕژێت، دەبێت كۆی بكەنەوەو شەقامەكە پاكبكەنەوە، بە پێچەوانە ڕووبەڕووی لێپێچینەوەی یاسایی دەبنەوە”.
شەوقی عەزیز جێگری سەرۆكی شارەوانی قەزای ناوەندی سۆران، داواكاریشە لە هاووڵاتییان لەكاتی بینینی ئەو جۆرە دیاردانە وێنە لە بارهەڵگرەكە بگرن، یان پەیوەندی بە سەرۆكایەتی شارەوانی و لێژنەی زێدەڕۆیی شارەوانی بكەن، بۆ ئەوەی بەزووترین كات بەدواداچوونی بۆ بكرێت و سەرپێچی كارەكە لێپێچینەوەی لەگەڵ بكرێت.
