سەرۆكی سەنتەری ڕۆشنبیری سۆران: ناكرێت تەنها گرنگی بە ڕێگەوبان بدرێت و لایەنی ڕۆشنبیری و هونەری بایەخی پێنەدرێت

موڕشید برادۆستی – زاری كرمانجی:

لە دیدارێكی هەفتەنامەی زاری كرمانجی، ڕێژیار محەمەد سەرۆكی سەنتەری ڕۆشنبیری سۆران، تیشكدەخاتە سەر كار و چالاكی و ئەو ئاستەنگ و گرفتانەی بەردەم كارەكانیان، لە دەستپێكی قسەكانیدا دەڵێت:” 28 ساڵە سەنتەرەكەمان دامەزراوە و خزمەتی ئەو شارە دەكەین، تا ئێستا ژورێكمان نییە لێی دابنیشین و پێشوازی لە میوانانمان بكەین، باسی لەوەشكرد، سەنتەری ڕۆشنبیری سۆران موڵكی هەمووانە و ناوەندێكی ڕۆشنبیریی ناوچەكەیە پێویستە گرنگی پێبدرێت و چیتر پشتگوێ نەخرێت.
ڕێژیار محەمەد سەرۆكی سەنتەری ڕۆشنبیری سۆران، بۆ زاری كرمانجی گووتی:” سەنتەری رۆشنبیری سۆران وەك یەكەم سەنتەر لە سەر ئاستی سۆران و سێەم سەنتەر لە سەر ئاستی پارێزگای هەولێر، لە22ی نیسانی ساڵی 1997 لەسەردەستی كۆمەڵێك لە ڕۆشنبیرانی ئەو دەڤەرە دامەزراوە و بەردەوامە لە خزمەتكردن، لە 19-5-2023 كۆنفراسی 13ـەمینی سەنتەر ئەنجامدراوە و وەك ستافی نوێ هەڵبژێردراوین، سەنتەرەكەمان پێكدێت لە سەرۆك و چوار كارگێڕ كە یەكێكیان ئافرەتە، پەیوەندیەكان، دارایی، ڕاگەیاندن، چالاكیەكان، هەروەها نزیكەی 150 ئەندام و 30 خۆبەخشی تایبەت بە چالاكیمان هەیە .
بە گووتەی سەرۆكی سەنتەری ڕۆشنبیری سۆران، ئامانجی سەرەكی سەنتەرەكە، گرنگیدان بووە بە بواری ڕۆشنبیری و فەرهەنگی و پاراستنی كلتووری ناوچەكە، دەڵێت:” ساڵانی رابردوو پشكی شێرمان لە ئەنجامدانی چالاكی بەركەوتووە، بە تایبەت لە بوارەكانی نەتەوەیی و چالاكی پەروەردەیی و بڵاوكردنەوەی هوشیاری ڕۆشنبیری بەشێوەیەكی گشتی.
دووپاتی لەوەكردەوە، لە دوای ساڵی 2014 سەنتەرەكان بەشێوەیەكی گشتی مینحەی مانگانەیان بڕاوە، لە ئێستادا هیچ سەرچاوەیەكی داهاتی مانگانەمان نییە، لەلایەن ئیدارەی سەربەخۆ و قائیمقامیەتی سۆران و لایەنە پەیوەندی دارەكان لە كاتی چالاكی بەشێك لە تێچووی ئەو پارەیمان بۆ خەرج دەكەن كە چالاكی پێ ئەنجام دەدەین.
ڕێژیار محەمەد، نایشارێتەوە كە سەنتەری ڕۆشنبیری سۆران كەمووكوڕی زۆری هەیە و نەیان توانیوە پێداویستی هیچ بەشێك دابین بكەن، دەڵێت:” سەنتەری ڕۆشنبیری سۆران مێژووێكی دوور و درێژ و فراوانی هەیە و لە ڕابردوودا خزمەتێكی زۆری بەو ناوچەیە كردووە، سەنتەری ڕۆشنبیری سۆران موڵك و ئاوێنەی ڕۆشنبیری ئەو شارەیە، كەم نییە سەنتەرێك 28 ساڵ خەریكی كاركردن و خزمەتكردن بێت بەبێ دابڕان و 13 كۆنفڕاسی ئەنجامداوە، نابێ چیتر پشتگوێ بخرێت، پێویستە پێداویستیەكان بۆ ئەو سەنتەرە دابین بكرێت.
ئاشكراشی كرد:” گرفتی هەرە سەرەكی سەنتەری ڕۆشنبیری سۆران، نەبوونی هاوكاریەكی دارایی مانگانەیە، چونكە ناتوانین كاری جیاواز و چالاكی گەورە ئەنجام بدەین، ئەوەی كردوومانە لە تمووحی ئێمەدا نییە، سۆران پێویستی بە چالاكی گەورە و خزمەتی زیاترە، هەروەها نەبوونی بارەگا و شوێنێكی تایبەت بە سەنتەرەكەمان كێشەیەكی دیكەی گەورەیە لە بەردەم چالاكییەكانمان، تا ئێستا سەنتەری ڕۆشنبیری سۆران ژوورێكی نییە كۆبوونەوەی ستافی خۆمان لێ ئەنجام بدەین یا لە كاتی میوان و هاتنی كەسایەتییەكان بۆ ئەو شارە پێشوازیان لێ بكەین .
سەرۆكی سەنتەرەكە، ئەمە بە هۆكار دەزانێ كە نەیان توانیوە وەك پێویست ڕۆشنبیرانی ئەو دەڤەرە لە خۆیان كۆبكەنەوە و سەنتەرەكە بەرەو پێشەوە ببەن، باسی لەوەشكرد:” تا ئێستا كۆبوونەوەكانمان لە ڕێگەی ئۆنلاین و ئەنتەرنێتەوە ئەنجام دەدەین، پێویستە لایەنی پەیوەندیدار چارەسەری ئەو گرفتەمان بۆ بكات، كارێكی جوان نییە سەنتەری ڕۆشنبیری سۆران تا ئێستا بێ بارەگا و شوێن بێت.
ڕێژیار محەمەد سەرۆكی سەنتەری ڕۆشنبیری سۆران، ئاماژەشی بەوەدا:”چەند جارێك میوان و كەسایەتی بیانی هاتوونەتە سۆران و ئارەزووی ئەوەیان هەبووە لەگەڵ ستافەكەمان دابنیشن، بە سوپاسەوە زاری كرمانجی و كۆمەڵگەی دایك شوێنیان بۆ كردووینەوە و پێشوازیمان لە مێوانان كردووە.
لە سنووری ئیدارەی سۆران، ئافرەتی زۆر كارا هەیە و بەشداری چالاكی رۆشنبیرییەكان دەكەن، بەشێك لە چالاكیەكانماندا ڕێژەی كچان زیاترە لە كوڕان، بەڵام بەگشتی بەهۆی هەندێ هۆكارەوە ساردبوونەوەیەك لە بەشداری كردنی چالاكییەكان هەیە، ئێستا گەنجان زیاتر بەشداری لەو چالاكیانە دەكەن كە پەیوەستن بە دەرفتەی كارەوە، ئێمە لە ڕابردوودا چەند خوولێكی جیامان كردەوە یەكێكیان لە ژێر ناونیشانی ” ئامادەكردنی تاك بۆ بازاڕی كار ” گەنجێكی زۆر ئامادە و بەشدار بوون، بەگشتی ئەو چالاكیانە گەنجان بەشداری لەو جۆرە چالاكیانە دەكەن بەو پێیەی ڕێژەیەكی زۆری گەنجمان هەیە و دانەمەزراون. سەرۆكی سەنتەری ڕۆشنبییری سۆران وای گووت”.
لە كۆتایی قسەكانیدا، ڕێژیار محەمەد، سەرۆكی سەنتەری رۆشنبیری سۆران، گووتیشی:” لە بواری خزمەتگوزاری كاری باش لە سۆران ئەنجامدراوە، بەڵام لەگەڵ هەموو هەنگاوەكان سۆران پێویستی بە گرنگیدانە بە بواری ڕۆشنبیری و هونەری تا شار مانا تەواوەكەی خۆی بگەینێت و بە دادپەروەری گرنگی بە هەموو بوارەكان بدرێت، ناكرێت تەنها گرنگی بە ڕێگەوبان بدرێت و لایەنی ڕۆشنبیری و هونەری پشتگوێ بخرێت، ئارەزووێكی زۆری فیلم و سینەمامان لەو شارە هەیە تا ئێستا شوێن نییە لێی دابنیشن و سەیری فیلم بكەن، هۆڵی شانۆمان نییە لە كاتێكدا شانۆكار و ئارەزوومەندی ئەو بوارە زۆرە، هەروەها نەبوونی هاوكاری دارایی و پاڵپشتی هۆكاری سەرەكییە كە نەمان توانیوە ساڵانە پێشانگایەكی كتێب هاوشێوەی هەولێر بكەینەوە، سۆران خاوەن كلتوور و نەریتی جیاوازە ئەگەر پاڵپشتی دارایمان هەبوا پلانی ئەوەمان هەبوو فیستیڤاڵی كلتوورە جیاوازەكان ئەنجام بدەین بەو پێیەپی سۆران ناوچەیەكی فرە فەرهنگ و كلتوورە زۆربەی ڕەنگ و دەنگی ناوچە جیاوازەكانی كوردستانی لێیە، نمایش كلتوور و نەریتی پێكهاتەكان كارێكی جوان دەبوو، ئەمان و چەند كارێكی دیكەی گەورە، بۆیە پێویستە گرنگی بە سەنتەری ڕۆشنبییر سۆران بدرێت”.