بەڕێوەری ئاوی سۆران: قۆناغی دووەمی پڕۆژەی ئاوی دۆڵی ئاكۆیان جێبەجێ دەكرێت
ڕاپۆرت-زاری كرمانجی
دۆڵی ئاكۆیان لە سنووری قەزای ڕواندز، چەندین گوند لەخۆدەگرێت، لەهەمانكاتیشدا ناوچەیەكی گەشتیاری و كشتوكاڵی و ئاژەڵدارییە، دانیشتووانی ناوچەكە خوازیارن گرفتی كەمئاویان چارەسەر بكرێت و پڕۆژەی ئاوی خواردنەوەیان بۆ جێبەجێ بكرێت.
لای خۆیەوە بەڕێوەبەری ئاوی سۆران، دەڵێت: “دووای ئەنجامدانی قوناغی یەكەمی پڕۆژەی ئاو بۆ دۆڵاكۆی ڕواندز، قۆناغی دووەمی پڕۆژەكە لە تەندەردایەو بە جێبەجێكردنی گرفتی كەمئاوی دانیشتووانی گوندەكانی سنوورەكە چارەسەر دەبێت”.
وەك هاووڵاتییانی گوندەكانی دۆڵی ئاكۆیان، لە سنووری قەزای ڕواندز، بۆ زاری كرمانجی ئاماژەی بۆ دەكەن: “جگەلەوەی گوندەكانی سنوورەكە ئاوەدانكراونەتەوە لەهەمانكاتیشدا بەپێی ئەوەی ناوچەیەكی گەشتیارییە بەشێك زۆر لە هاووڵاتییانی ڕواندز بگرە خەڵكی سۆران و شارو شارۆچكەكانی دیكەش خانووی گەشتیارییان لە شوێنەكە دروست كردووە، لەكاتی پشوو گەشتوسەیران ڕویان لێدەكەن و بەشەویش دەمێنەوە، جگەلەوەی بەتایبەت لە وەرزی بەهارو ئاهەنگ و پشوو بۆنەكاندا ڕۆژانە هەزاران گەشتیار ڕوو لەناو سروشتی جوانی دەڤەرەكە دەكەن و كاتێكی خۆشی تیادا بەسەر دەبەن، بەمەش ئاوی خواردنەوە سەرچاویەكی پێویستی ئەو خەڵكەیە كە دانیشتووی گوندەكانن یان بۆ گەشت و سەیران ڕوو دەكەنە شوێنەكە”.
داواكارن لە بەڕێوەبەرایەتی ئاوی سۆران و لایەنە پەیوەندیدارەكانی سنوورەكە هەوڵەكان خێراتر بكرێن، بۆ تەواو كردنی پڕۆژەی ئاوی خواردنەوەی ئەو گوندەكانە، كە پێشووتریش كار لەسەر جێبەجێكردنی قۆناغی یەكەمی پڕۆژەكە كراوە”.
دەشڵێن: ” بە دابینكردنی ئاوی پێویست بۆ گوندەكانی دۆڵی ئاكۆیان لە ڕێگەی گەیاندنی تۆڕی ئاو، ئەو خەرجیەش دەگەڕێتەوە بۆ خەزێنەی حكوومەت كە لەڕێگەی تانكەرەوە ساڵانە ئاوی خواردنەوە بۆ بەشێك لە دانیشتووانی سنوورەكە دابین دەكرێت، جگەلەوەش هۆكارێكی باش دەبێت بۆ ئەوەی ئاژەڵداران و خاوەن ڕەزو باخەكان سوود لە ئاوەكە وەربگرن”.
لای خۆیەوە ئەندازیار یوسف ئەحمەد، بەڕێوەبەری ئاوی سۆران، بە زاری كرمانجی ڕاگەیاند: “لە پێناو چارەسەر كردنی گرفتی كەمئاوی هاووڵاتییانی سنوورەكەمان، كارو پڕۆژەكانمان بەردەوامیان هەیە بە ڕاكێشان و نۆژەنكردنەوەی تۆڕی ئاوی خواردنەوە بۆ سەنتەری شارو شارۆچكەو گوندەكانی دەورووبەر، هەروەها نۆژەنكردنەوەی سەرچاوە ئاوییەكان و خاوێنكردنەوەی بیری ئیتیوازی و دابین كردنەی كەل و پەل و ئامێری پێویست، لەگەڵ ئەوەشدا پلانێكی دیكەمان بۆ ڕووبەڕووبوونەوەی گرفتی كەمئاوی دابەشكردنی ئاوە لەڕێگەی تانكەر كە دراوەتە كۆمپانیاییەك، ئەو هاووڵاتییانەی گرفتیان هەیە پێویستە سەردانی بەڕێوەبەریەتی ئاوی سۆران بكەن، كۆبۆنێكیان پێدەین و لەم ڕێگەیەوە ئاوی پێویستیان بۆ دابین دەكرێت، بەشێوەیەكی گشتی كار لەسەر دابینكردنی ئاوی خواردنەوە بۆ هاووڵاتییان دەكەین”.
دەربارەی چارەسەر كردنی گرفتی كەمئاوی دانیشتووانی گووندەكانی دۆڵی ئاكۆیان لە سنووری قەزای ڕواندز، بەڕێوەبەری ئاوی سۆران، گووتی: “دوای ئەوەی لە ڕابردوو قۆناغی یەكەمی پڕۆژەی ئاوی دۆڵی ئاكۆیان ئەنجامدرا، قۆناغی دووەمی پڕۆژەكە لە تەندەردایە لە بەڕێوەبەرایەتی گشتی ئاو و ئاوەڕۆی هەولێر، كامە بەڵێندەر پڕۆژەكەی وەرگرتەوە، دەست دەكات بەجێبەجێكردنی هەروەك پڕۆژیەكی فرەوانەو بە ئەنجامدانی كێشەو گرفتی كەمئاوی هاووڵاتییان چارەسەر دەبێت، هەروەها ئەوانەش كە ئاویان لە ڕێگەی تانكەر بۆ دابین دەكرێت، لە ڕێگەی تۆڕی ئاو ئاوەكەیان پێدەگات.
