” تاوانێكی گەورەیە مرۆڤ بڕیار لە شتێك بدات كە زانیاریی لەسەر نەبێت”

زاری كرمانجی-سۆران:

سەرۆكی یەكێتی زانایانی ئایینی ئیسلامی كوردستان، دەڵێت: بەداخەوە خەڵكانێك بێ زانیاری و لەپێناو مەرامی كەسی و تایبەتی كەوتنە تانە و قسە و قسەڵۆكی جۆراوجۆر و داتاشینی كۆمەڵێك خوێندنەوەی بێ بنەما، گوایە مەڕاسیمی (رۆژی نزای نیشتمانی) بانگەشەیە بۆ راگەیاندنی ئایینی ئیبراهیمی لە كوردستان.
د. عەبدوڵڵا مەلا وەیسی، سەرۆكی یەكێتیی زانایانی ئایینی ئیسلامی كوردستان، ڕایگەیاند: “ڕۆژانی 22 تا 25ی ئەم مانگە لە شاری هەولێر، ڕێوڕسمێك بە بەشداریی سەرجەم پێكهاتە ئایینییەكان و كەسایەتی و میوانێكی زۆری ناوخۆ و دەرەوە بە ناونیشانی (رۆژی نزای نیشتمانی) بەرێوەچوو. دوای تەواوبوونی مەراسیمەكە، بەداخەوە خەڵكانێك بێ زانیاری و لەپێناو مەرامی كەسی و تایبەتی كەوتنە تانە و قسە و قسەڵۆكی جۆراوجۆر و داتاشینی كۆمەڵێك خوێندنەوەی بێ بنەما، گوایە ئەو مەڕاسیمە سەرەتا و بانگەشەیە بۆ راگەیاندنی ئایینی ئیبراهیمی لە كوردستان”.
ئەوەشی خستەڕوو: ” ئەو بانگەشەیە هیچ بنەمایەكی دروستی نییە و پێچەوانەی هەموو داب و دەستوورێكە، چونكە كەس ناتوانێت ئایینێكی نوێ دابهێنێت، بەڵكو دوایین ئایین ئایینی ئیسلامە، وەك خوای گەورە لە چەند ئایەتێكی قورئانی پیرۆز باسی لێوەكردووە”.
دەشڵێت: ” هەر ئەو ئیسلامەیە، چەندین بنەمای تێدایە بۆ بایەخدان بە پێكەوەژیانی ئایینی و نەتەوەیی و قەبووڵكردنی جیاوازییەكان، خودی مەڕاسیمەكە لەپێناو بەرز نرخاندنی پێكەوەژیان بوو نەك داهێنانی ئایینێكی تر”.
ئاماژە بەوەشدەدات: ” ئەو ڕۆژە كە ناونرا ڕۆژی نزای نیشتمانی، لەبەر ئەوە نییە بانگەشە بێت بۆ ئەو جۆرە ئایینەی كەسانێك لە بێئاگایی ناوی دێنن یان خەڵكی پێ چەواشە دەكەن، بەڵكو نزا لەناو هەموو ئایینە ئاسمانییەكان هەیە و وەك دروشمێكی ئایینی پێكهاتە ئایینیەكان شتێكی رێگەپێدراو ئاساییە، وە لەو مەراسیمە هیچ تەقسێكی دیاریكراو یان بانگەشەو داواو ئاماژەیەك نەبووە بۆ دیاریكردنی ئایینێكی نوێ بەناوی ئایینی ئیبراهیمی، بەڵكو ئەمە سەكۆییەكی گرنگی كۆكەرەوەی سەرجەم پێكهاتەكان بوو لە كوردستان بۆ ئەوەی تەئكید لە پێكەوەژیانی ئایینی و ئەو سیما جوانەی پێكەوەیی لە كوردستان بكرێتەوە”.
سەرۆكی یەكێتیی زانایانی ئایینی ئیسلامی كوردستان ئەوەشی خستەڕوو: ” هەر لە مەڕاسیمەكەدا سەرۆك مەسعود بارزانی وێڕای تەئكیدكردن لە قووڵكردنەوەی پێكەوەژیانی ئایینی، لە وتارەكەیدا ئاماژەی بە ئایەتێكی قورئان كرد كە ئەمە خۆی لە خۆیدا بیرخستنەوەی ئامادەبووان بوو كە فەرهەنگی گەلی كورد و زۆرینەی پەیڕەوانی ئایینی ئیسلام ئەو راستییە دووپات دەكەنەوە كە پێكەوەژیان بەپێی ئەم ئایەتەی خوێندرایەوە، رێزگرتنە لە ئیرادە و ویستی خوای پەروەردگار نەك داهێنانی ئایینێكی نوێ.
لە كۆتاییشدا دووپاتی كردۆتەوە: تاوانێكی گەورەیە كە مرۆڤ بڕیار لە شتێك بدات كە زانیاریی لەسەر نەبێت.