مستەفا دۆلەمەری- زاری كرمانجی:
د.پاكستان حەمەدئەمین، ئەندامی پەرلەمانی كوردستان، لەبارەی ڕۆژی نزای نیشتمانی، بۆ زاری كرمانجی دەڵێت: ئەمە ڕۆژێكە بۆ ڕێزگرتن و یادكردنەوەی پێكەوەژیانی ئاشتییانەی نێوان پێكهاتە و ئایینە جیاوازەكانی هەرێمی كوردستان، لەو ڕۆژەدا جگە لە نزا، گوتاریش پێشكەش كران.
دووپاتی كردەوە: ئامانجی نزای ڕۆژی نیشتمانی لە هەرێمی كوردستان، یەكڕیزی و ڕێزگرتنی باوەردارانی ئایینە جیاوازاكان و ئازادی ئایینییە، هەروەها پێكەوەژیان و كۆكردنەوەی سەركردە و كەسایەتیی ئایینی و دەنگە ڕووحانییەكانە.
ئەو ئەندامەی پەرلەمانی كوردستان، زیاتر گوتی: ڕۆژی نزای نیشتمانی، بۆنەیەكی ساڵانەیە لە واشنتن دی سی دەكرێت، بەشێوەیەكی ئاسایی لە یەكەم پێنج شەممەی مانگی شوبات، بەڵام لە وڵاتان بەپێی كاتی دیاریكراوی خۆیان ساز دەكرێت، ئەم بۆنەیە سەركردە سیاسییەكان، دیپلۆماتكاران و كەسایەتییە ئایینییەكان لە سەرتاسەری جیهان كۆ دەكاتەوە، نزای نیشتمانی، هۆكارێكی باش و پاڵنەرە بۆ یەكدەنگی و كۆكردنەوەی هەموو پێكهاتەكان لە هەرێمی كوردستان لە ژێر یەك چەتر و هەمووان یەك ئامانج و یەك بەرژەوەندی نیشتمانیان هەبێت.
ئەو پەرلەمانتارە، ئەوەشی خستەڕوو: كەسانێك كە بەدرێژای مێژوو جاش و خۆفرۆش بوون و خەباتگێریان نەبووە، دژی بەرژەوەندی گشتی لە كوردستان كاریان كردووە، نازانن لە بەهای نزای نیشتمانی كە تێیدا دەیان گەورە و سەركردە و دیپلۆماتكار لەگەل سەرۆك بارزانی نزایان بۆ یەكڕیزی كرد.
د.پاكستان حەمەدئەمین، لە بەردەوامی قسەكانیدا، گوتی: ڕۆژی چوارشەممەی رابردوو بە ئامادەبوونی سەرۆك بارزانی، سەرۆكی هەرێمی كوردستان و سەرۆكی حكوومەتی هەرێمی كوردستان و ژمارەیەكی بەرچاو لە بەرپرسانی باڵا و سەركردەكانی عێراق و هەرێمی كوردستان و جیهان و پەرلەمانتارانی وڵاتان و نوێنەر و نێردەی وڵاتان لە ئەمریكا و ئەوروپا و ڕۆژهەڵاتی ناوەڕاست و كەسایەتییە ئایینیەكان لە نەتەوە جیاوازەكان ڕۆژی نزای نیشتمانی لە كوردستان لە ژێر دروشمی (بەرەو یەكبوون لە باوەڕدا) ڕۆژی نزای نیشتمانی لە هەولێری پایتەختی هەرێمی كوردستان بەڕێوەچوو و یەكەمجارە كۆبوونەوەیەكی وا لە كوردستان ڕێك دەخرێت و مەبەست لەو كۆبوونەوەیە ئەوەیە كە جیهان ئاشنابێت بەو كولتوورە فراوانەی كە لە كوردستان هەیە و لە دێر زەمانەوە ئەو كولتوورە لە كوردستان هەبووە، ئەویش كولتووری پێكەوەژیان و یەكتری قەبووڵكردن و ئازادی بیرورا و ئایین و مەزهەبە، شانازی بەو كولتوورە دەكەین و بەردەوام دەبین لەسەر ئەو رێگایە و هیوادارم ئەو پێكەوەژیانە لە كوردستان قووڵتر و فراوانتر بێت، هیوادارم ئاشتی بەرقەرار بێت لە هەموو ناوچەكە و جیهان برایەتی بەرقەرار بێت.
لە كۆتای قسەكانیدا، ئەو پەرلەمانتارە، هێمای بۆ ئەوەكرد، كۆبوونەوەی نزای نیشتمانی، پێگەی هەرێمی كوردستان وەك هەموو كات بەرزدەكاتەوە، هەمووان ڕاستییەكان بە چاوی خۆیان دەبینن كە هەرێمی كوردستان لانكەی كۆبوونەوە و پێكەوەژیانی هەموو ئاین و پێكهاتەكانە.
