ئیسماعیل ئیبراهیم
گۆڕانكارییەكانی ڕۆژهەڵاتی ناوەڕاست خێران، بەجۆرێك وەك تەكنۆلۆژیای لێهاتووە، هەر كەس و لایەنێكی سیاسی نەتوانێت خۆی لەگەڵ ئەم پێشهاتانە بگونجێنێت، بەرژەوەندییەكانی خۆی نەپارێزێت یا وەدەستیان نەخات، زیانمەندی سەرەكی دەبێت و بۆ ماوەیەكی دوور و درێژ دوا دەكەوێت، لەم ڕوانگەیەشەوە سەركردایەتی سیاسی كورد بەتایبەتی جەنابی سەرۆك بارزانی بە خوێندنەوەیەكی قووڵ و هەمە ڕەهەندی ڕووداوەكان، بە سوود وەرگرتن لە ئەزموونی رابردوو، یەكڕیزی نێوماڵی كوردی كردۆتە بنەمای سەرەكی، بۆ گەیشتن بە ئامانجە ستراتیژییە نەتەوەییەكان لە هەر چوار پارچەی كوردستان. بۆ ئەمەش چەندین ساڵە هەوڵی یەكڕیزی لایەنە سیاسییەكانی كوردستان دەدات، لە هەموو بەشەكانی نیشتمان، ساڵانێكی زۆرە تێكۆشانی رژد دەكرێت بۆ یەكخستنی هەڵوێستی لایەنەكان، تا لەسەر پرسە باڵاكانی نەتەوەیی یەك هەڵوێست بن، بۆ ئەمەش كۆبوونەوەكانی دهۆك لە ساڵانی رابردووە، هەوڵدان بۆ بەدیهێنان و سەرگرتنی پرۆسەی ئاشتی لە باكوور، یەكخستنی گوتاری سیاسی لە ڕۆژئاوای كوردستان، چارەسەركردنی كێشەی نەتەوەی كورد بە شێوەی دیپلۆماسی لە ڕۆژهەڵات، پێكهاتن لەگەڵ عێراق لەسەر بنەما دەستوورییەكان، لە كارە هەرە سەرەكییەكانی بەڕێز مەسعود بارزانی بووە.
ئەوەی چەند ساڵە هەوڵی بۆ دەدرێت و دەخرێتە بەرباس و دەیان كۆبوونەوەی لەبارەوە كراوە و زۆرجار بەهۆی ویستی تاكڕەوییانە و بەرژەوەندی حزبی ئەنجامی نەدەبوو، ئێستا بەهۆی ڕووداوەكانەوە بۆتە پێویستییەكی جددی.
ئەم گۆڕانكارییانەی لە ڕۆژهەڵاتی ناوەڕاست بەهۆی بەرژەوەندی وڵاتانی زڵهێزی جیهانییەوە دێنە ئاراوە بێ كاریگەر نابێ لەسەر داهاتووی كوردستانیان، بۆیە لە ئێستا سەركردایەتی سیاسی كورد لە باشوور كەوتۆتە خۆ و خەریكی بنیادنانی ژێرخانێكی پتەوە بۆ ڕوودانی هەر ئەگەرێك، بانگھێشتكردنی سەرۆكی حكومەت بۆ كۆبوونەوەكانی لوتكە گرینگەكانی وڵاتان لەسەر ئاستی جیهان، ئەو ڕۆڵەی سەرۆكی هەرێم لە ناوچەكە دەبینێت، ئەو ڕاوێژانەی بە جەنابی سەرۆك دەكرێت، هەموو ئەو هەنگاوە سیاسییانەی كە لە دونیابینینێكی دوورمەوداوە سەرچاوە دەگرێت، ئاماژەن بۆ ئامادەسازی هەمە چەشنە بۆ گەیشتن بە ئامانجە نەتەوەییەكان.
لەبەرامبەر ئەم ڕووداوانەش دوژمنان و ناحەزانی كورد بە تایبەتی داگیركەران دەستەوەستان نین و هەموو هەوڵێك دەدەن كورد نەگاتە مەبەستەكانی، بە تایبەتی هەوڵی بەردەوام و رژد دەدن بۆ وێرانكردنی پایەكانی ستراتیژی ئەم بابەتە، كە یەكڕیزی نێو ماڵی كورد و یەكدەنگی لایەنە سیاسییەكانە لە كوردستانی دایك.
ئیتر دەمێنێتەوە كێشمەكێشمەكانی نێوان حەق و ناحەق، ماف خوراو و داگیركەر، ئەوەی تا ئێستاش بەدی دەكرێت جەنابی سەرۆك بە كارێزمایی و ئەزموونی دوور و درێژی سەركەوتوو بووە و دەتوانێت ئەم جارە كورد بگەینێتە قۆناغێكی گرینگی سەركەوتن.
