گەنجێك هەڵقوڵاوی میوزیك و هونەر

گۆران ساڵح: میوزیك هونەرێكی هێزبەخشە كاریگەری بەسەر مرۆڤەوە هەیە

گۆران ساڵح عەبدوڵڵا، ئەو گەنجەی بەهۆی دەنگە پرجۆشەكەیەوە پانتایەكی زۆری لە هەوادارانی میوزیك و گۆرانی داگیر كردووە، ساڵی 1985 لە شاری سۆران هاتۆتە دونیاوە، بەڵام خۆی خەڵكی قەزای ڕواندزە، ئەو توانیویەتی بڕوانامەی دیبلۆم لە شانۆ بەدەست بێنێت و دواتریش بەردەوامی بە خوێندن بدات و ببێتە خاوەن بەكالۆریۆس لە میوزیك، لە پەنای هونەریشەوە گۆران ساڵح وەك ِراگەیاندنكارێك دەركەوتووە و خۆی دەڵێت” ٢٧ ساڵ ئەزموونی كاركردنی لەم بوارە هەیە”.
ئەو ساڵی 2006 دەستی بە هونەری گۆرانی گووتن كردووە و گۆرانی (گوڵی تەمەن)ی وەك بناغە و دەست پێكی كارەكانی هێنایە بەرهەم و هەر زوو لە لایەن گەنجان و شەقامەوە پێشوازی لێكرا، دواین بەرهەمیشی پێش ماوەیەك بڵاوكردەوە بەناوی (وەفا)، ئەو بەردەوامە.
لە مێژوودا هونەری گۆرانی وێڕای ئامانجی هونەرییەوە زۆرجاریش بانگەوازی مرۆڤایەتی پێ بووە، گۆرانی بێژەكانی كوردیش كەم تا زۆر هەوڵیانداوە شوێنپەنجەیان لەم رووەوە دیار بێت، گۆران ساڵح لەمبارەوە دەڵێت ” گۆرانی گووتن، بە هەمان ئەندازەی هونەرییەوە پەیامی مرۆڤایەتیشی پێیە، لەبەر ئەوەی كارە هونەرییەكان بە گشتی بۆ مرۆڤایەتییە، چ چێژ بەخشین بێت و ڕزگار كردنی مرۆڤ بێت لە خەم و كێشە و دوور كەوتنەوە لە ژاوەژاوی ژیان، یا خستنەڕووی ئازاری مرۆڤ لە هەر سوچێكی ئەم جیهانە بێت، دەتوانم بڵێم بەشێك لە هونەرمەندە كوردەكان توانیویانە ئەو پەیامە بگەیەنن و بێگومان كاری باشیان كردووە”.
زیاتر روونیكردەوە”هەر چەندە كورد هەمیشە سانسۆری لەسەر بووە، داگیركراوە، بۆیە بەو شێوەیە نەمانتوانیوە، وەك پێویست سنوورەكان بۆ بەجیهانی بوون ببەزێنین، بابەتەكە پەیوەندی بە هونەرەوە نییە، لەبەر ئەوەی هونەرێكی بەرزمان هەیە، بەڵام دڵنیام ئەو سنوورانەش دەبەزێنین و هونەرمەندانی كورد لەسەر ئاستی جیهان دەناسرێن، چەند هەنگاوێكی كەم ماوە”.
گۆران ساڵح، لە بارەی میوزیكەوە دەڵێت:” میوزیك هونەرێكی زیندووی هێز بەخشە هەموو كات كاریگەری بەسەر ناخ و رووحی مرۆڤەوە بەجێ دێڵێت و دەتوانێت لە خەم و كێشەكانی ڕۆژانە دوور یا بەتاڵ بكاتەوە، هەر چەندە پێویستە زیاتر ئاگامان لە هونەری گۆرانی گووتن بێت و باشتر فیلتەر بكرێت”.
ئەو هونەرمەندە لاوە جگە لە میوزیك و راگەیاندن، دەستی وێنە كێشانیشی هەیە و وەك خۆی گووتی ” هەموو بوارەكانی هونەرم خۆش دەوێن، بەڵام جگە لە میوزیك جاربەجار وێنە دەكێشم و زۆریش چێژی لێ دەبینم”.
ئەو لە بارەی پلانی داهاتووی بۆ زاری كرمانجی ئاشكرای دەكات و روونیكردەوە” پلانی داهاتووم لای خودایە، ئەگەر بوو ئەوكات شتی زۆر ڕوو دەدەن”.