جەبار باب یەزدین، سەرۆكی ڕێكخراوی كانگ فۆتوای كوردستان:
سۆران بە گشتی لاوەكانی ئاشناو لێهاتوون لە یارییەكانی هونەری جەنگی، هەر بۆیە دوای داواكاری زۆری گەنجەكانی ئەم شارە لە ساڵی 1998 یەكەم هۆڵی یاری هونەری جە نگی كانگ فو توا لە سۆران لەسەر دەستی من و كاپتن جەلال دامەزرا، بێگومان لەم كات لە كوردستان و عێڕاقیش وێنەی نەبوو، هەرچەند ئەو سەردەم هۆڵی یاری تایكواندۆ هەبوو ڕاهێنەران “محەمەد دیدی و عیسای مەمەدە ڕەش” بەڕێوەیان دەبرد و لەگەڵ ئەوەشدا پێشبڕكێكارێكی بەهێزی ئێمەبوون لە گۆڕەپانی وەرزشی و نمایشەكان، بەڵام هاوشان لەگەڵ ئێمە ڕۆڵی كاریگەریان هەبوو هەردوو لا بە شێوەیەكی زۆر جوان وەرزشمان لەم شارە دەكرد، دوای 27 ساڵ تا ئەمڕۆش هێشتا بە چاوی خۆشەویستی لەیەكتر دەڕوانین و نێوانمان ڕۆژ لە دوای ڕۆژ گەشتر و جوانتر دەبێت و یاریزانەكانیشمان هەروا پەروەردە كردووە كە ڕێزی یاریزانەكانی بەرامبەریان بگرن، چونكە ئێمە وەرزش دەكەین و وەرزش پەیامی خۆشەویستی و ڕێزگرتنە لە یەكتری.
هەروەك دەزانین ڕێزگرتن لە كۆمەڵگە، مرۆڤ ، ئاژەڵ و ژینگە یاسای بنچینەیی ڕەوشتی یاریزانانی یاری هونەری جەنگییە، ئێمە شانازی بە یاریزانەكانمان دەكەین نمونەی ڕەوشت بەرزی و كاری باشن، تەواوی ئەو وەرزشوانانەی لە ئیستادا لە شاری سۆران خاوەنی هۆڵی وەرزشی خۆیانن، سەردەمانێك لەم دوو هۆڵەی ئاماژەم پێی كرد یاریزان بوون، بە خۆشحاڵییەوە ئەمڕۆ دەبینین خاوەن هۆڵی وەرزشی خۆیانن و بەردەوامن لە پەروەردە كردنی وەرزشوانان، لە گەڵ ئەو هەموو خاڵە ئەرێنی و جوانانەدا كارەكانی ئێمە بێ بەش نین لە كەم كوڕی و ئاستەنگی زۆر، گلەیی ئێمە دوای ئەو هەموو ساڵە لە خزمەت و ماندووبوونی بە مەبەستی پێشكەوتنی یاریزانان و هەرێمەكەمان، لە دوای ئەنجامدانی هەشت پاڵەوانیەتی نێودەوڵەتی لە یارییەكانی هونەری جەنگی لە لایەن ڕێكخراوەكەمان، بێگومان هەروەك ئاشكرایە ئەم كارانە ئاسان نین و زەحمەتی و شەونخونی زۆری ویستووە گەلەك لە گەڵی هیلاك بووین لە گەڵ چەند هاوڕێیەك، جگە لەمەش تێچووێكی دارایی زۆری ویستووە لە ئامادەكاری و كارە تەكنیكییەكان و هۆتێل و خواردن و میوانداری كردنی ڕێكخراو و هەڵبژاردەی وڵاتان و تیپە بیانییەكان و نێوخۆییەكان و ناوبژیوانان، كە كۆی گشتی سەدان بەشداربوو دەكات، مەبەستی ئێمە ناساندنی هەرێمی كوردستانە بە وڵاتان و بەرزكردنەوەی ئاڵای پیرۆزی كوردستانە، كەچی لە لایەكی دیكەوە دەبینیت كەسانێك بە بێ هیچ پاشخانێكی وەرزشی و بە بێ هیچ ماندووبوونێك هاتوونەتە نێو ئەو گۆڕەپانە و لێرە و لەوێ دەبیندرێن، كە ئەمەش لە ڕاستیدا جێگای داخە و لە مەودای دوور كاریگەری نەرێنی زۆر لە سەر وەرزش دروست دەكەن.
خاڵێكی دیكە دەمەوێ باسی بكەم ئەو بڕە پارەیەی بۆ بەشداری یاریزانەكانیش لە پاڵەوانیەتییەكانی یاری هونەری جەنگی وەردەگرین هەرچەند بڕێكی كەمە بەڵام ئێمە ساڵانە لە هاوكاری خێرخوازی بۆ ماڵە كەم دەرامەتەكانی ئەم شارە خەرجی دەكەین و بە شێوەیەك لە شێوەكان دەمانەوێت یارمەتییان بدەین لەم دۆخە ناخۆشەی ئێستایان ڕزگاریان بكەین، كەچی لە بەرامبەردا لە هەندێ شوێن پارەیەكی زۆر بە ناوی وەرزش بە هەدەر دەچێت و كەس نازانێك چۆن ئەو پارانە سەرف دەكرێن بەڕاستی ئەوە جێگەی داخە و پێویستە هەڵوەستەی لەسەر بكرێت چونكە ناكرێت پارەی ئەم هەرێمە بەم شێوەیە بە شێوەیەكی نەزانانە بەهدەر بدرێت لە لایەن هەندێ كەسی نا شایستە لە پۆستەكانیان چونكە ئەوەی هەیە بە خوێنی شەهیدەكانمان بەدەست هاتووە بۆیە پێویستە ڕێز لە ڕابردوومان بگرین.
لێرەدا دەمەوێت بپرسم باشە بە بێ ئەوەی ئێمە هیچ یارمەتییەكی مادی درابین توانیومانە چەندین پاڵەوانی جیهانی و نێودەوڵەتی و نێوخۆییەكان بهێنین بۆ شارەكەمان، هۆكار چیە ڕێز لەم ماندووبوونەمان ناگرن لایەنێك نیە ئاوڕمان لێ بداتەوە.
و لە هەشتەمین پاڵەوانیەتی كە لەم شارە جوانە بەڕێوەمان برد بە شاهێدی سەرجەم هەڵبژاردە بەشدار و ئامادەبووەكان، لە كوردستان و عێڕاق گەورەترین پاڵەوانیەتی بوو لەسەر ئاستی ناوچەكە،
و شاری سۆران بووە بە ناوەندی ئەم یارییە لە وڵاتان باسی دەكەن و ڕەنگدانەوەی ئەرێنی دروست كردووە لە جیهان، كەچی لە ئێستادا پێشبڕكێی ناشرینی هەندێ كەسی بەرژەوەند خواز وای لێكردووین بەردەوام نەبین و لە كارەكانمان سارد ببینەوە و ڕەنج و ماندوو بوونی چەند ساڵانەمان خەریكە بە با دەچێت.
بۆیە پێشنیار دەكەم دامەزراوەیەك هەبێت بە سزادانی ئەو كەسانەی لە سێكتەرە وەرزشییەكان كارەكان بە شێوەیەكی یاسایی ئەنجام نادەن و هەروەها لەمپەر و ئاستەنگ لەبەردەم كەسانی چالاك و لێهاتوو دروست دەكەن، هەر لەبەر ئەمەشە تا ئێستا بڕیارمان نەداوە لە سۆران بۆ ئەم ساڵ چالاكی وەرزشی و پاڵەوانیەتی ئەنجام بدەین و تا ئێستا خۆمان دوورەپەرێز گرتووە.
هەرچەند لە شارەكانی هەولێر، دهۆك، زاخۆ داوایان لێمان كردووە پاڵەوانیەتییەكی نێودەوڵەتی لە یارییەكانی هونەری جەنگی سازبكەین، ئێمەش سەبارەت بەم بابەتە لە ڕۆژانی داهاتوو بڕیاری كۆتایی دەدەین.
لە كۆتاییدا دەمەوێت ئەوە بڵێم دەرفەتی ئەوە ماوە بەڕێوەبەرایەتی وەرزش و لاوان لە شاری سۆران گرێنتی كارەكانمان بكات، و دەكرێت ئێمەش پێداچوونەوە بە بڕیارەكانمان بكەین و دەتوانین لە داهاتوێكی نزیك نۆیەمین پاڵەوانیەتی نێودەوڵەتی لە شاری خۆمان ڕێكبخەین بەڵام بە پێچەوانەشەوە بێ دەنگی بەرپرسان لەهەمبەر كارەكانمان دەمانوەستێنێت و ناتوانین بەردەوام بین لە خزمەتی وەرزشوانانی ئەم شارە.
ئەوەی بۆ ئێمە گەشبینی و دڵخۆشییە توانیومانە چەندین پاڵەوان دروست بكەین و بەردەوام بانگهێشتنامەیان لە وڵاتان پێ دەگات و بەشداری لە یارییە بەهێزەكان دەكەن لە نوێترین بانگهێشتنامەی یاریزان ” هەكار گەردی” بوو لە وڵاتی تایلەند ڕووبەڕووی یاریزانێكی ئەڵمانی بووەوە و بە لێدانێكی یەكلاكەرەوە توانی سەركەوتوو بێت و ببێتە خاوەنی پشتێنەی نێودەوڵەتی لە Rawai boxing stadium)) ، بێگومان پێویستە شانازی بە یاریزانە پاڵەوانەكانمان بكەین.
