هەر بەڵێندەرێك پابەندی رێنماییەكان نەبێت پڕۆژەكەی لێ وەردەگیرێتەوە

شەهلا رەشید- سۆران:
خەسرەو ئیسماعیل، بەڕێوەبەری گشتی شارەوانییەكانی ئیدارەی سۆران، لە دیدارێكدا لەگەڵ هەفتەنامەی زاری كرمانجی دەڵێ:” سنوورەكەمان خۆی لە 23 شارەوانی دەبینێتەوە، هەندێك شوێن پێویستی بە شارەوانی هەیە، بەڵام ئێستا لە بەرنامەدا نییە هیچ شارەوانییەكی دیكە بكرێتەوە. دەشڵێ:” هەر كەسێك تا 9ی مانگی داهاتوو داواكاری بۆ تاپۆكردنی خانووەكەی پێشكەش نەكات، دوای ئەو ماوەیە ناتوانێت خانووەكەی تاپۆ بكات.
بەڕێوەبەری گشتی شارەوانییەكانی ئیدارەی سۆران، رایگەیاند:” ئەوەی تایبەت بێت بە بەڕێوەبەرایەتی گشتی شارەوانی ئیدارەی سۆران، فەرمانی دەستبەكاربوونی دەركراوە، ئێستا شوێنێكمان دیاری كردووە، لەگەڵ دابین كردنی میلاكاتی پێویست بۆ بەڕێوەبەرایەتی گشتیمان، دەست بە كارەكانی خۆمان دەكەین، لەگەڵ ئەوەش بۆ میلاكات كێشەمان هەیە، بەڵام دەتوانین سوود لە شارەوانییەكانی سۆران و دەوروبەری وەربگرین بۆ گواستنەوی بەشێك لەو فەرمانبەرانەی كە پێویستمان پێ هەیە، هەروەها نووسراویشمان ئاراستەی سەرۆكایەتی ئەنجومەنی وەزیران كردووە بۆ رەزامەندی لەسەر پێدانی ژمارەیەك گرێبەست بۆ ئەوەی بتوانین میلاكاتی بەڕێوەبەرایەتی گشتیمان پێ پڕ بكەینەوە، بەڵام هەندێك كاری ئیداری ماون سەرەتا یەكەی ژمێریاری، كە چاوەڕێی وەزارەتی دارایی دەكەین بڕیار بدات لەسەر كردنەوەی ژمێریاری بۆ ئەوەی بتوانین كاروباری هەر 23 شارەوانیەكان لە بەڕێوەبەرایەتیەكەمان ئەنجام بدەین، چونكە سنوورەكەمان خۆی لە 23 شارەوانی دەبینێتەوە هەمووشیان سەر بە بەڕێوەبەرایەتی گشتی شارەوانییەكانی ئیدارەی سۆرانن، لە ئێستادا لە بەرنامەدا نییە هیچ شارەوانییەكی دیكە بكرێتەوە”.
خەسرەو ئیسماعیل، گوتیشی:” هەموو ئەو پڕۆژانەی رەزامەندیان لەسەر داوە، بودجەی تایبەت لە رێی ئیدارەی سۆران بۆیان دابینكراوە، لەگەڵ ئەوەش هەوڵی ئەوەمانداوە تاقیگەیەك لێرە بكرێتەوە بۆ پشكنینی موادی پڕۆژەكان، بۆ ئەوەی زووتر رادەستی بەڵێندەرەكان بكرێت، بڵام جگە لەمەش كێشەی بەڵێندەرانیشمان هەیە، پلانێكی تۆكمە داندراوە بۆ سوود وەرگرتن لەو بەڵێندەرانەی كار و پڕۆژەكانیان بەشێوەی رێك و پێكتر و لە ماوەی دیاریكراوی خۆیاندا تەواو دەكەن، هەر بەڵێندەركیش كارەكانی وەك پێویست و ئەو چاودێریەی لەسەرە ئەنجام نەدرێت ئاگادار دەكرێتەوە ئەگەر پابەندی رێنماییەكان نەبوو ئەوا پڕۆژەكەی لێ وەردەگیرێتەوە، ئەو پڕۆژانەی لە دەرەوەی سنووری ماستەر پلانن لەلایەن ئیدارەی سەربەخۆ سەرپەرشتییان دەكرێت، پڕۆژەی دیكەش لە پلاندایە كە جێبەجێ بكرێت.
خەسرەو ئیسماعیل، بەڕێوەبەری گشتی شارەوانییەكانی ئیدارەی سۆران، زیاتر دەڵێ:” ئەو داواكارییەی كە بۆ هاووڵاتییان هاتووە سەبارەت بە تاپۆ، وەك پێویست داواكارییەكە جێبەجێ ناكەن، كە لە 9/9 كۆتای پێ دێت و دوای ئەو ماوەیە داواكارییەكان وەرناگیرێن، ئەمەش كێشەیەكی زۆر بۆ هاووڵاتییان دروست دەكات، چونكە هەر وەك لە یاساكەدا هاتووە دوای ئەوەی كە ماوەی سێ ساڵ بەسەر مۆڵكەكان تێپەڕی و چارەسەری بۆ نەدۆزرایەوە ئەوا بینایەی هاووڵاتییەكە دەخرێتە سەر ناوی شارەوانی، بۆیە داوا لە هاووڵاتییان دەكەم تا ئەو ماوەیەی كە دیاری كراوە داواكاری پێشكەش بە یەكەی كارگێڕی بكەن، بۆ ئەوەی بتوانن كاری پێویستیان بۆ ئەنجام بدرێت، ئەوەی لە یاساكەدا هاتووە بەو جۆرە نرخەكە خەمڵێنراوە، دوو جۆر نرخ هەیە، یەكێكیان %5 ئەوانەی تا ئێستا ئیفلاسیان بۆ نەكراوە، دووەمیان %25 ئەو موڵكانەن كە ئیفلاسی بۆ كراوە و موڵكی شارەوانییە و سەرپێچی تێداكراوە، ئەوەی لیژنەكە دەخەمڵێنێت ئەوەیە لەوێ بتوانین هاوكاری خەڵك بكەین، ئەو بودجەی دیاریكراوە بۆ پڕۆژەكان بەردەوام دەبێت، ئەگەر پڕۆژەكەش ئەنجام نەدرا ساڵی داهاتوو لەسەر هەمان بودجە ئەنجام دەدرێتەوە”.