” بەڕێوەبەری گشتی كاروباری مینی هەولێر كاری پاكسازی لەو كێڵگە مینانە بەردەوام دەبێت “
ڕاپۆرت-محەمەد هەسنانی
گرووپە شاخەوانییەكان و هاووڵاتییانی دانیشتووی گوندەكانی مەجیداوەو هاودیان، لە ڕێگەی زاری كرمانجی داواكارن لە لایەنە پەیوەندیدارەكان، ئەو چەند كێڵگەی مینەی كە لە چیایی گۆرەڕەزو برداوست ماون، بە یەكجاری لە مین و تەقەمەنی پاكبكرێنەوە.
دەشڵێن جگەلەوەی ئەو كێڵگە مینانە مەترسین بۆسەر گیانی هاووڵاتییان و ئاژەڵداران لە هەمانكاتیشدا، زۆرجار كەسانێكی ناشارەزا بەمەبەستی گەشتی شاخەوانی یان كارێكی دیكە بە شوێنەكە تێپەڕدەبن و گیانیان دەكەوێتەوە مەترسییەوە، بەڕێوەبەری گشتی كاروباری مینی هەولێریش دەڵێت: “كاری پاكسازی مین لەلایەن تیمەكانمان لەو شوێنانە بەردەوامی دەبێت”.
خالس عەلی، بەرپرسی گروپی شاخەوانی هاودیان لە سنووری ناحیەی دیانا، بە زاری كرمانجی گووت: “بەهۆی ئەوەی ناوچەكەمان لە سەردەمی ڕژێمی بەعس شوێنی شەڕو جەنگ بووە، بەتایبەتیش جەنگی هەشت ساڵەی نێوان عێڕاق-ئێران، زۆربەی ناوچە شاخاوییەكان مینڕێژ كراون، دیارە سەرەڕای كاری پاكسازی تیمەكانی پاككردەوەی مین، كەچی بەهۆی سەختی ئەو شوێنانە تائێستا نەتوانراوە بە تەواوەتی پاكبكرێنەوە، ئەوەش مەترسی بەردەوامی هەیە بۆسەر گیانی هاووڵاتییان، داواكارین لە بەڕێوەبەرایەتی گشتی كاروباری مینی هەولێر، هەوڵەكانیان جددی تر بكەن و حكوومەتیش هاوكاری زیاتریان بكات، بۆ ئەوەی ئەم ناوچانە بەتەواوەتی لە مین و تەقەمەنی پاكبكرێنەوە”.
بەرپرسی گروپی شاخەوانی هاوودیان، ئاماژەی بەوەشدا: ” بەپێی ئەوەی ئێمە گروپی شاخەوانین و هەفتانە چەند جارێك گەشتی شاخەوانی ئەنجادەدەین، هەروەها گروپەكانی دیكەی شاخەوانی و ناوچەكەو شارەكانی دیكەی كوردستانیش دێنە سنوورەكەمان، دەبێت زۆر بە وریاییەوە ئاگاداربین و لەو شوێنانە نزیك نەبینەوە كە پێشتر سەربازگەو ڕەبایەی حكوومەتی بەعسی لەناو چووبوونە، یان ئەو شوێنانەی جێگەی گومانن، لەگەڵ ئەوەشدا زۆرجار بەهۆی كەش و هەواو بەفر و باران بارین، مین و تەقەمەنی لە شوێنی خۆیان نامێنن و گلۆر دەبنەوە خوارەوە ئەوەش مەترسییەكی ترەو نابێت لێی نزیك ببینەوە”.
خالس عەلی، دەشڵێت: ” ئەگەر باس لە چیایی برادۆست و گۆڕەز بكەین، چەند كێڵگەیەكی مینی لێماوەو تائێستا بەهۆی سەختی شوێنەكە نەتوانراوە بە تەواوەتی لە مین پاكبكرێنەوە، ئەمەش مەترسی زۆری هەیە بۆ دانیشتووانی ئەم سنوورانە، چونكە خەڵكێكی زۆر لەو گوندانە كاری ئاژەڵداری بەخێوكردنی مەڕو بزن دەكەن، هەروەها گروپە شاخەوانییەكان و كەسانێك بە مەبەستی هێنانی گژو گیای بەهاری دەچنە ئەم ناوچە شاخاویانە، هیوادارین ئەمساڵ بە تەواوەتی كاری پاكسازی مینیان بۆ بكرێت.
لای خۆیەوە عەلی عەبدوڵڕەحمان، بەڕێوەبەری گشتی كاروباری مینی هەولێر، بە زاری كرمانجی ڕاگەیاند: ” لەسەردەمی رژێمی بەعس بەهۆی باردوخی سەربازی و بوونی جەنگ لە دەڤەرەكە چەندین ناوچەی لە سنووری ئیدارەی سەربەخۆی سۆران، مینڕێژ كراون، ئەوەش جێگەی مەترسییە بۆ سەر هاووڵاتییان كە تائێستا بەهۆیەوە چەندان كەس بوونەتە شەهیدو قوربانی، دوای ڕاپەڕینی بەهاری 1991 لەڕێگەی ڕێخراوە نێودەوڵەتی و ناوخۆیی و حكوومەتی هەرێمی كوردستان دەستكراوە بە پاكسازی مین لە كوردستاندا، ئێمەش بەپێی ئەو ئیمكانیاتەی لەبەردەستمان بووە پرۆسەی پاكسازی مین بەردەوامی هەیە”.
گووتیشی: ” لەگەڵ ئەوەشدا پرۆسەی مینلابەری لەنێو سنووری پڕۆژەی ماستەرپلانی گەشتیاری سۆران، شەش كێڵگەی مین كە لەلای ئێمە تۆماركراون دەكەونە ناو سنووری ماستەر پلانی پڕۆژەی گەشتیاری سۆران، لەوانە كێڵگەیەكی مین لە سنووری گوندی بێخاڵ سەر بە قەزای ڕواندز، هەروەها پێنج كێڵگەی مین لەسەر چیای گۆڕەز لەچیایی برادۆست لە سنووری گوندەكانی مەجیداوە، كە رووبەری ئەو كێڵگە مینانە زیاتر لە حەوت سەد و دوازدە هەزارو پێنج سەدو چل و هەشت مەتر دووجایە، بۆ پاكسازی كردنیان لە مانگی 11ی ساڵی 2024 تیمەكانمان دەستیان بەكاركردن كردووە، بەڵام بەهۆی وەری زستان و باران و بەفر بارین كارەكە سست بووە، بەڵام لە داهاتوودا كاری پاكسازی كردنیان بەردەوامی دەبێت.
