زاری كرمانجی-سۆران
بەڕێوەبەری كۆچ و كۆچبەرانی سۆران، لە دیدارێكی زاری كرمانجی ڕایگەیاند: “ئەمساڵ تەنها دوو خێزانی پەنابەر لە ئێران بە سنوورەكەمان گەڕاونەتەوەو زیاتر لە هەزار خێزانیش لەو وڵاتە ماون و خواستی گەڕانەوە دەكەن، هەروەها نزیكەی 140 خێزانی ئاوارەی شارو شارۆچكەكانی عێڕاق و ناوچە كوردستانییەكان لە سنووری ئیدارەی سۆران ماون و نەگەڕاونەتەوە.
لەبەردەوامی قسەكانیدا عەباس ئەمیر، بەڕێوەبەری كۆچ و كۆچبەرانی ئیدارەی سۆران، بە زاری كرمانجی ڕاگەیاند: ” خۆشبەختانە هەمیشە دەڤەری سۆران ماڵێك بووە بۆ ئاوارەو لێقەوماوان، وەك دیاریشە دوای شەڕی داعش و خراپی ڕەوشی شارو شارۆچكەو ناوچەكانی عێراق، هەزاران خێزانی ئاوارە ڕوویان لە سنووری ئیدارەی سۆران كرد، دوای ئازادكردنەوەی ناوچەكانیان بەشێكی زۆر لەو ئاوارانە گەڕانەوە، سەرەڕایی ئەوەش لە ئێستادا نزیكەی 140 خێزانی ئاوارەی شارو شارۆچكەكانی عێڕاق و ناوچە كوردستانییەكان لە سنوورەكەمان ماون و تائێستا نەگەڕاونەتەوەو لێرە هاوشێوەی خەڵكی ناوچەكە سەرقاڵی كارو كاسبین و سەرو ماڵیان پارێزراوە بەمەش خواستی گەڕانەوە ناكەن بۆ شارو شارۆچكەو ناوچەكانیان”.
لەبەشێكی دیكەی قسەكانیدا بەڕێوەبەری كۆچ و كۆچبەرانی سۆران، نیگەرانی خۆی دەربڕی لەوەی كە چەند ساڵێكە حكوومەتی عیڕاق و تەنانەت ڕێكخراوە بیانییەكانیش دەستی هاوكاری بۆ ئەو ئاوارانە درێژ ناكەن كە لە سنوورەكەمان ماون و دەرفەتی گەڕانەوەیان نەبووە، یان خۆیان ئارەزووی گەڕانەوە ناكەن، بەڵكوو دەزگای خێرخوازی بارزانی و رێكخراوە ناوخۆییەكان بوونەتە جێگرەوە بۆ بەهاناوەچوونی ئاوارەو لێقەوماوان، بەپێی ئەو ئیمكانیاتەی لەبەردەستیان بووە، هاوكار پێشكەش بە ئاوارەو كەسانی خاوەن پێداویستی دەكەن، بۆ ئەم مەبەستە چەندین جار داواكاریمان ئاراستەی كۆچ و كۆچبەرانی عێڕاق كردووە، كە هاوكاری پێشكەش بە ئاوارەكانیان بكەن كە لە سنوورەكەمان ماون و نەگەڕاونەتەوە، كەچی ئەوان نەك هاوكاریان ناكەن بەڵكوو داوای داخستنی كەمپەكانیشیان كردووە، بە بیانووی ئەوەی كە ئاوارەكانیان بگەڕێنەوە بۆ شارو شارۆچكەو ناوچەكانیان”.
عەباس ئەمیر، بەڕێوەبەری كۆچ و كۆچبەرانی سۆران، ئاشكراشی كرد: ” سنووری ئیدارەی سەربەخۆی سۆران بەپێی ئەوەی ناوچەیەكی هاوسنوورە لەگەڵ وڵاتانی دەوروبەر، هەروەها خەڵكەكەی میوان دۆست و لە پێشوازی لێقەوماواندان، لەگەڵ دروستبوونی هەر بارودۆخێكی خراپ لە وڵاتەكەیان بە دەیان و سەدان خێزانی ئاوارە روو لە شارو شارۆچكەكانی سنوورەكەمان دەكەن، حكوومەتی هەرێمی كوردستان و ڕێكخراوە خێرخوازییە ناو خۆییەكانیش دەستی هاوكاری بۆ ئەو لێقەوماوانە درێژ دەكەن و ئەمن و ئاسایشیان پارێزراو دەبێت، ئەوەش وایكردەوە كە لە ئاست ناوخۆیی و دەرەوە باس لە هەڵوێستی مرۆڤانەو پێكەوە ژیان لە هەرێمی كوردستان بكرێت”.
بەڕێوەبەری كۆچ و كۆچبەرانی ئیدارەی سۆران، ئەوەشی خستەڕوو: ” لە سەردەمی رژێمە یەك لەدوایەكەكانی عێڕاق، بەهۆی كورد بوون و شۆڕش و بەرخودان بە هەزاران خێزانی كوردی باشووری كوردستان ئاوارەی وڵاتی ئێران بوون، دوای ڕاپەڕینی بەهاری 1991 ژمارەیەكی زۆری ئەو خێزانانە گەڕانەوە بۆ شارو شارۆچكەو گوند و زێدی باب و باپیرانیان لە هەرێمی كوردستان، چونكە ئەوكات لەلایەن ڕێكخراوەجیهانییەكانی تایبەت بە كۆچ و كۆچبەران ئاسانكاری و هاوكاری ئەو ئاوارانە دەكرا كە دەگەڕانەوە بۆ هەرێمی كوردستان، هەروەها حكوومەتی هەرێمی كوردستان بە پێدانی پارچە زەووی و كەل و پەلی خانووبەرە هاوكاری دەكردن، زۆربەشیان لەكاتی گەڕانەوە هەلی كاریان بۆ دەڕەخسا، ئەمەش خواستی زیاتری لەسەر گەڕانەوەی پەنابەرانمان بۆ باوەشی كوردستان دروست كردبوو”.
لە دوا قسەكانیدا عەباس ئەمیر، بەڕێوەبەری كۆچ و كۆچبەرانی ئیدارەی سۆران، ئاشكرای دەكات: ” بەپێی ئامارە نافەرمییەكانمان زیاتر لە هەزار خێزانی پەنابەری باشووری كوردستان لە وڵاتی ئێران ماون و نەگەڕاونەتەوە، لەكاتێكدا بەهۆی سەختی و خراپی بارو گوزەرانی ئەم وڵاتە، زۆربەیان خواستی گەڕانەوە دەكەن بۆ زێدی باب و باپیرانیان، بەڵام بەهۆی ئەوەی لە ئێستادا یوئین و ڕێكخراوەكانی جیهانی تایبەت بە كۆچ و كۆچبەران هاوكار نین، هەروەها ئەركی وەزارەتی كۆچ و كۆچبەرانی حكوومەتی عێراقیشە هاوكاری ئەو پەنابەرانە بكات و ئاسانكاریان بۆ بكات بۆ گەڕانەوەیان و شوینی نیشتەجێ بوون و هەلی كاریان بۆ دابین بكات، كەچی بەداخەوە هاوكارنین، بەو قیرانەش حكوومەتی هەرێمی كوردستان بەتەنها ناتوانێت ئەو كارە بكات، بەمەش ئەمساڵ تەنها دوو حێزانی پەنابەرانمان بە سنوورەكەمان گەڕاونەتەوە.
