مورشید برادۆستی
ئەمڕۆ سەركردایەتی باڵای بزووتنەوەی گۆڕان كۆدەبێتەوە و گەنگەشە لەسەر كۆمەڵێك بابەتی ناوخۆیی خۆیان دەكەن لە نێویشاندا، ساز كردنی كۆنگرەی بزووتنەوەكەیانە، كە ئاخۆ لە مانگی 11 یا 12 بكرێت.
سەرەتاكانی دروستبوونی كۆمپانیای وشە و دواتریش راگەیاندنی بزووتنەوەی گۆڕان، ئومێدێكی زۆری خستە دڵی هاووڵاتییان لەوەی كە بزووتنەوەیەك دروست دەبێت بۆ ئەوەی نوێنەرایەتی نارەزاییەكانی شەقام بكات و گوشار بۆ چارەسەر كردنی كێشەكانیان بكات، بۆیەش لەیەكەم پڕۆسەی هەڵبژاردن بزووتنەوەی گۆڕان توانی 24 كورسی بەدەست بێنێت و وەك ئۆپۆزسیۆنێكی كارا لە پەرلەمانی كوردستان كاریان كرد.
دروستبوونی هێزێكی ئۆپۆزسیۆنی كارا لە هەر وڵاتێك نیشاندەری زیندوویەتی شەقام و ئازادی كاری سیاسییە، لەوێشە بنەماكانی گۆڕانكاری هەمەچەشنەی دەوڵەتداری سەرهەڵدەدەن.
بەڵام بۆچی بزوتنەوەی گۆڕان نەیتوانی قوورسایی سیاسی خۆی و متمانەی شەقام بپارێزێت و وای لێهات لە دواین هەڵبژاردنەكانەوە تاكە كورسییەكەیشی بەدەست نەهێنا؟ ئەمە دەشێ پرسیارە ئاڵتوونییەكە بێت كە پێویست بزووتنەوەی گۆڕان لە خۆیان بكەن، منێكی هاووڵاتی سادەش بەهەمان ئەندازەی ئەوان ئەو پرسیارە بكەم و بەدوای وەڵامەكەیدا بگەرێم.
بزووتنەوەی گۆڕان لەسەرەتاكانی دروستبوونی و چوونی بۆ نێو پەرلەمانی كوردستان بە پشت بەستن بەو دەنگانەی لە شەقامەوە پێیدرابوون، لە جیاتی ئەوەی ببێتە سەكۆیەكی بەرز و زەقی گەیاندنی دەنگی ناڕەزاییەكان و گوشار كردن بۆ نەهێشتنی ئەو كێشانەی لە دەوڵەتمەداری هەبوون، كەچی كەوتە گیانی لایەنە سیاسی دیكەی كوردستان و ئەو لایەنەی لەگەڵیان هاورا نەبایە بە دەنگ فرۆش و وێژدان فرۆش ناویان دەبرد، ئەوەی رەخنەی لێگرتبانە بە قەڵەم فرۆش ناواین دەبرد، ئەوەی دەنگی نەدایانێ بە دەنگ فرۆش ناوی دەبردن، لە لایەكی دیكەشەوە لە جیاتی ململانێی سیاسییانە بۆ باشتر و پەتەوتر كردنی دینگەكانی متمانەی شەقام دەستی كرد بە دژایەتی كردنی هەموو لایەنە سیاسییەكان و هەر رۆژ و شەوێك لە كەناڵەكانی خۆیەوە پەلاماری پیرۆزییەكانی لایەنێكی سیاسی دەدا، لە نێو ئەو لایەنانەش كەوتە دژایەتی كردنێكی زەقی پارتی دیموكراتی كوردستان، كە رەگێكی قوڵی مێژوویی و نیشتمانپەروەری لە كوردستان هەیە و خاوەن ئەزموونێكی 70 ساڵەی سیاسیی و لە ئاستی نێو دەوڵەتی و نێوخۆیش خاوەن پێگەیەكی باڵا و حیساب بۆ كراو بوو ئێستا پێگەكەی بەهێزتر نەبێت لاوازتر نییە.
بزووتنەوەی گۆڕان تۆی ڕقی سیاسی تێكەڵ بە ملمڵانێ سیاسی تەندروست كرد، ئەم ڕقەی بە پلەی یەكەم روولە پارتی بوو، بەجۆرێك پارتی هەر پڕۆژەیەكی هەبوایە باش یا خراپ ئەوان بەدوای رەخنە لێگرتنی پڕۆژەكەی پارتییان دەگەران. بۆیە زۆربەی رەخنەكانیان نە لە شەقام نە لە دامەزراوە شوێنی خۆیان نەگرت.
ئەوان بە هەموو توانایاوە وایان نیشانی هاووڵاتییان دەدا كە ئەگەر پارتی نەمێنێت كوردستان بەرەو بەهەشتێكی لێوان لێو لە خۆشگوزەرانی هەنگاو دەنێت، كە دواجار بۆ خەڵك روونبوویەوە، ئەوەی كیانی سیاسی راگرتووە و قوربانی بۆ دەدات تەنها پارتییە، داستانە قارەمانییەتەكان پردێ و سەحیلا و مەحموودیە بە نموونە.
تەواوی نوێنەرانی بزووتنەوەی گۆڕان چ لە كوردستان یا بەغدا و لە دەرەوەی وەڵاتیش خەریكی ناشیرین كردنی پارتی بوون، پێیانوابوو خۆیان جوان دەبن، بەڵام پیچەوانەی كەوتەوە، پارتی بە بەهێزی مایەوە ئەوانیش وەك مازی كەری كۆن دەپاشۆڵی دەستیان لە بنی هەنبانە بە بەتاڵی هاتە دەرەوە، هەڵبژاردنی پەرلەمانی عێراق بۆ نموونە كە نەیانتوانی یەك پەرلەمانتاریش دەربچوێنن.
بزوتنەوەی گۆڕان لە هەڵكانی بەردەوام بوو تا وای لێهات لە دژی پارتی هاوپەیمانییەتیان دروست كرد، لە بیریان چوو شەقام لە دژی یەكێتی دەنگی بە ئەوان داوە، ئەو یەكێتییە بە دەبابە چووە سەر گردەكە و ئەگەر ڕۆڵی جەنابی سەرۆك مەسعود بارزانی نەبوایە ئەو شەوە گردەكەیان دەكەوتە دەست یەكێتی.
بۆیە ئەگەر بزووتنەوەی گۆڕان لەسەر هەمان شێوازی سیاسەتكردنی رابردوو بەردەوام بێت و لە كۆنگرە پێداچوونەوە بە رۆئیا و دونیا بینینی خۆیان نەك، واباشترە لە جیاتی كۆنگرەی نوێ بوونەوە، هەڵوەشاندنەوەی خۆیان رابگەینن.
دەبێ بزووتنەوەیگۆڕان باش بزانێت ئەو دۆخەی ئێستا لە سلێمانی بەسەر خەڵك داهاتووە، بەشێكی زۆری ئەوان لێی بەرپرسن كە نەیانتوانی ئیستسماری شەقام بكەن. ئەوان بەرپرسن لەوەی تەواوی پلە و پۆستەی هەیانە لە بەغدا و هەرێم بۆ ئەوە بەكاریان نەهێنا خزمەتی نیشتمانی پێ بكەن بە پێچەوانەوە تەنها كاریان ئەوە بوو، هەرێم و پارتی ناشیرن بكەن، بۆیە شكستیان خوار و ئەگەر بەردەوامیش بن دیسانەوە شكست دەخۆن.
