زارى کرمانجى:
سەرچاوەیەکی ئاگادار ڕایگەیاند، ئەمڕۆ چوارشەممە، 2ـی نیسانی 2025، دەیان خێزانی عێراقی نیشتەجێی کەمپی هۆل گەڕانەوە کەمپی جەدعە لە موسڵ.
ئەو سەرچاوەیە بە میدیای ناوخۆیی ڕاگەیاندووە، “پرۆسەی گواستنەوەی خێزانەکانی چەکدارانی داعش لە کەمپی هۆل، لەلایەن لیژنەیەکی ناوەندییەوە سەرپەرشتی کراوە کە پێکهاتووە لە ڕاوێژکاری ئاسایشی نیشتمانی و وەزارەتی کۆچ و ئاوارە، هەروەها زیاتر لە 160 خێزان کە لە زیاتر لە 600 کەس پێکهاتبوون و زۆرینەیان ئافرەت و منداڵ بوون گەڕێندرانەوە.”
سەرچاوەکە ئاماژەی بەوەش کرد، “پرۆسەی گواستنەوەکە بە هەماهەنگی سووریا کراوە، هەروەها دابینکردنی پاس و سەلامەتی پاراستنی ئاوارەکانیش دابین کراوە”، دەشڵێت، “کۆی ژمارەی ئەو خێزانانەی لە ماوەی 23 کاروانی ڕابردوودا گواستراونەتەوە عێراق، گەیشتە نزیکەی 3000 خێزان.”
سەرچاوەکە ڕوونیشیکردەوە، ” بە پێی پلانێک پرۆسەی گەڕاندنەوەی خێزانەکان بەردەوامە، کە پشکنینی ئەمنی و گواستنەوەیان بۆ کەمپی جەدعە بۆ دەکرێت، لەگەڵ بەشداریکردنیان لە پرۆگرامەکانی شیاندنەوە و دووبارە گەڕاندنەوەیان بۆ ناو کۆمەڵگە”، گوتیشی “ئامادەکارییەکان بۆ گواستنەوەی کاروانێکی دیکە لە هەفتەی داهاتوو بە هەماهەنگی ئیدارەی کەمپی هۆل بەردەوامە.”
بەپێی ئامارەکانی ئیدارەی کەمپەکە، کەمپی هۆل کە لەلایەن هێزەکانی سووریای دیموکراتەوە بەڕێوەدەبرێت، زیاتر لە 15 هەزار و 600 هاووڵاتی سووری ئاوارە لەخۆدەگرێت کە لە چوار هەزار و 300 خێزان پێکهاتوون، ژمارەی پەنابەرە عێراقییەکانیش نزیکەی 15 هەزار کەسە، کە لە 4330 خێزان پێکهاتوون، هەروەها شەش هەزار و 389 پەنابەر لە لانیکەم لە 45 نەتەوەی جیاواز، لەوانە فەرەنسا، سوید، هۆڵەندا، ڕووسیا، تورکیا، تونس و میسری تێدایە.
